Cuairt-litir #54

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

JK Rowling

Chaidh càineadh a dhèanamh air JK Rowling an dèidh dhi fanaid a dhèanamh air tar-ghnèithich a-rithist.

Ann am post Twitter gus Là nam Màthraichean a chomharrachadh, sgrìobh Rowling, “Happy Birthing Parent Day to all whose large gametes were fertilised resulting in small humans whose sex was assigned by doctors making mostly lucky guesses”.

Thuirt an cleasaiche, George Takei, gun do “chuir e bròn air” faclan den leithid a leughadh.

Thuirt an craoladair Narinder Kaur gu bheil e brònach gun do thagh Rowling burraidheachd a dhèanamh air buidheann de dhaoine a tha air am màbadh mar-thà.

Keir Starmer

Tha Keir Starmer air a thaic a nochdadh do chasg air tar-bhoireannaich a’ farpais ann an spòrs nam ban.

Tha iomadh bhuidheann-riaghlaidh spòrs, leithid Aonadh Rugbaidh na h-Alba, air casgan a chur air tar-bhoireannaich o chionn ghoirid.

Thuirt Starmer ris The Telegraph na bu tràithe air an t-seachdain seo gu bheil e a’ cur taic ri co-dhùnaidhean nam buidhnean-riaghlaidh.

Stoke-on-Trent

Chaidh binn 10 bliadhna sa phrìosain air fireannach a dh’èignich fireannach ann an Stoke-on-Trent anns an Fhaoilleach 2022.

Chaidh Pawel Flak, 39, a dhìteadh san Dùbhlachd. Chaidh cuideachd a chur air clàr nan eucoireach feise fad a bheatha.

Casgan-inbhidheachd

Dh’ainmich NHS Shasainn Dimàirt nach tèid casgan-inbhidheachd a thabhann tro òrdugh-cungaidh do dh’euslaintich thar-ghnèitheach òga ùra.

Tha casgan-inbhidheachd air an cleachdadh gus dàil a chur air atharrachaidhean gun iarraidh nam feartan gnè.

Thuirt a’ charthannas, Mermaids, gur e briseadh-dùil mòr a th’ anns an naidheachd agus gun toir e buaidh mhòr air a’ choimhearsnachd.

An Fhraing

Bhòt Buill-phàrlamaid na Frainge airson bile a tha ag amas air airgead-dìolaidh a thoirt don fheadhainn a chaidh a dhìteadh de cho-sheòrsachd eadar 1942 agus 1982.

Thèid am bile a-nis air adhart don t-Seanadh airson sgrùdadh.

Nirribhidh

Tha fear, 44, a tha fo chasaid cheannairceachd air dol as àicheadh na casaid.

Chaidh dithis fhear a mharbhadh agus grunn neach a bharrachd a leòn ann am mòr-losgadh taobh a-muigh club-oidhche LGDTC+ ann an Oslo rè Mìos na Pròise 2022.

Chaidh Zaniar Mataport a chur an grèim fo goirid an dèidh na h-ionnsaighe.

Chuir an neach-casaid, Sturla Henriksbø, às leth Mataport gun do loisg e 10 peilear o bheart-ghunna agus 8 a bharrachd o ghunna-làimhe mus deach a bhacadh le luchd-amhairc.

Thuirt Henriksbø cuideachd gun robh Matapour, a rugadh ann an Ioràn, air ùmhlachd a nochdadh don Stàit Ioslamach ron ionnsaigh.

Tha a’ chùis-lagha fhathast a’ dol is dùil gun tig e gu crìoch sa Chèitean.

Nex Benedict

Tha Àrd-sgrùdaiche Meadaigeach Oklahoma air ràdh gun do chur an deugaire tar-ghnèitheach, Nex Benedict, làmh na bheatha fhèin.

A-rèir aithisg a chaidh sgaoileadh Diciadain, b’ e tar-dhòs de dhrogaichean fochann bàis dha.

Bhàsaich Benedict, a bha dà-sprioradach agus a chleachd na riochdairean e/iad, 8mh An Gearran.

Bha e air a bhith san ospadal an latha roimhe an-dèidh gun tug trì chaileagan ionnsaigh air ann an taigh-beag sgoile.

Achd Eucoir Gràin is Òrdugh Poblach (Alba) ga chur an gnìomh

Tha Riaghaltas na h-Alba air ainmeachadh gun tèid Achd Eucoir Gràin is Òrdugh Poblach (Alba) a chur an gnìomh 1d An Giblean.

Leudachaidh an achd an reachdas a th’ ann an-dràsta le bhith:

  • a’ cur aois ris mar fheart ùr ann an co-cheangal ri tromachadh eucoirean tro chlaon-bhreith;
  • a’ cruthachadh eucoirean ùra co-cheangailte ri bhith a’ dùsgadh fuath a’ buntainn ris na feartan clàraichte: aois, ciorram, creideamh, taobhadh feise, dearbh-aithne tar-ghnè, agus atharrachaidhean nam feartan gnè;
  • ag ùrachadh a’ mhìneachaidh air dearbh-aithne thar-ghnè gus iomradh a thoirt air tar-bhoireannaich, tar-fhireannaich agus daoine neo-bhìnearaidh aig nach eil dearbh-aithne a tha boireann no fireann;
  • a’ toirt air falbh an teirm “eadar-sheòrsach” agus a’ cruthachadh roinn air leth airson atharrachaidhean nam feartan gnè.

Tha an achd a’ cuideachd a’ cur às don eucoir lagh cumanta de thoibheim. Cha deach casaid a thogail mun eucoir sin o chionn 1843.

A-rèir figearan a chaidh fhoillseachadh le COPFS (Oifis a’ Chrùin ⁊ Seirbheis Neach-casaid a’ Chrùin) an-uiridh, thuit an àireamh de dh’eucoirean gràin ann an Alba le 2% ann an 2022-23.

Sheall na figearan cuideachd, ge-tà, gu bheil an àireamh de dh’eucoirean gràin a’ buntainn ri taobhadh feise air àrdachadh bho 16% ann an 2013-14 gu 33% ann an 2022-23, agus gun robh 55 eucoirean gràin a’ buntainn ri dearbh-aithne tar-ghnè ann an 2022-23.

Cuairt-litir #53

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

An t-Seic

Bhòt Pàrlamaid na Seice Diciadain gus companasan-catharra aon-sheòrsach a dhèanamh laghail.

Fon bhile, bidh càraidean aon-sheòrsach cuideachd comasach air clann uchd-mhacachadh cho fhad ’s a tha aon dhiubh na phàrant bith-eòlasach don leanabh.

Dhiùlt iad co-ionnannachd pòsaidh agus còraichean uchd-mhacachaidh làn a dhèanamh laghail ge-tà.

Feumaidh an Seanadh agus Ceann-suidhe Petr Pavel aonta a chur ris a’ bhile fhathast mus tèid a stèidheachadh ann an lagh.

Nex Benedict

Chruinnich daoine air feadh nan Stàitean Aonaichte thairis air na deireadh sheachdain gus an deugaire Nex Benedict a chuimhneachadh.

Mar a chaidh aithris roimhe, bhàsaich Benedict latha an dèidh gun tug trì nigheannan ionnsaigh orra ann an taigh-beag sgoile.

Chaidh iomairt sluagh-mhaoineachaidh a thòiseachadh air GoFundMe gus an teaghlach a chuideachadh leis na cosgaisean tìodhlacaidh.

Indiana

Tha e a-nis mì-laghail cùram-slàinte daingneachadh gnè, a leithid casgan-inbhidheachd, a thabhann do mhion-aoisich ann an Indiana an dèidh do Chùirt nan Ath-thagraidhean òrdugh-bacaidh a bh’ air Bile 480 a thogail.

Tennessee

Shoidhnig Riaghladair Bill Lee bile ’na lagh 21d An Gearran a nithear e laghail do dh’oifigich ann an Tennessee diùltadh càraidean aon-sheòrsach a phòsadh.

Utah

Dhiùlt Taigh Riochdairean na h-Utah bile Diluain a chuireadh casg air brataichean bogha-froise bho sheòmraichean-teagaisg.

Jesse Baird / Luke Davies

Chaidh dà chorp a lorg leis na Poilis ann an Sydney a bha a’ coimhead airson a’ phreasantair t.bh., Jesse Baird, agus a bhràmair, Luke Davies.

Chaidh an cuirp a lorg air làrach dùthchail ann am Bungonia, baile beag mu 115 mìle taobh a-muigh Sydney.

Mar a chaidh aithris roimhe, nochd oifigear-poilis agus seann bhràmair Baird, Beau Lamarre, sa chùirt Dihaoine seo chaidh fo dà chasaid mhuirt an dèidh mar a chaidh fuil agus peilear bho a ghunna a lorg air taigh Baird.

Gàna

Tha Pàrlamaid Ghàna air gabhail ri bhile a nithear e mì-laghail aithneachadh mar LGDTC+ no iomairt airson còraichean LGDTC+.

Fon bhile, dh’fhaodadh binn suas ri trì bliadhnaichean sa phrìosain a chur air daoine LGDTC+.

Cuideachd cuireadh am bile binn suas ri còig bliadhnaichean sa phrìosain air an fheadhainn a bhios a’ ruith no a’ maoineachadh buidhnean-iomairt LGDTC+, no 10 bliadhna air neach sam bith a tha an-sàs ann am buidhnean-òigridh LGDTC+.

Tha feise ghèidh mì-laghail ann an Gàna mar-thà agus i air a pheanasachadh le trì bliadhnaichean sa phrìosan.

Twitter

Tha Ars Technica ag aithris gu bheil Twitter air poileasaidh a chuireas casg air cleachdaichean bho bhith a’ toirt iomradh air seann ghnè no ainm neach tar-ghnèitheach a chur an gnìomh a-rithist.

Bha an lìonra-sòisealta air a chùl a chur ris a’ phoileasaidh sa Ghiblean 2023.

Riaghaltas na RA a’ sireadh £150,000 bho Riaghaltas na h-Alba

Dhearbh Rùnaire Stàite na h-Alba, Alister Jack, Diciadain gum bi Riaghaltas na Rìoghachd Aonaichte a’ sireadh airgid-dìolaidh airson na cosgaisean laghail aca rè na cùise-lagha a thog Riaghaltas na h-Alba nan aghaidh airson bacadh a chur air Bile Ath-leasachadh Aithneachadh Gnè Phàrlamaid na h-Alba.

Riaghail Cùirt an t-Seisein san Dùbhlachd gun robh an ordugh earrainn 35 a chleachd Jack gus bacadh a chur air a’ bhile laghail.

Thathar ag aithris gu bheil iad airson mu £150,000 fhaighinn air ais.

Tha luchd-pàighidh cise air £230,000 a phàidheadh mar-thà airson cosgaisean Riaghaltas na h-Alba.

Dealbh air fhoillseachadh an dèidh eucoir gràin

Dh’fhoillsich na poilis ann an Sheffield dealbh de dh’fhireannach a tha iad airson bruidhinn ri ann an co-cheangal ri eucoir gràin homafòbach a thachair mu 3:50m air an 30mh latha den Dùbhlachd taobh a-muigh Dempseys, bàr gèidh air Sràid Hereford.

‘S urrainnear fios a chur dhaibh air 101 is an àireamh 14/227336/23 a thoirt seachad.

‘S urrainnear cuideachd fios a chur, gun a bhith a’ fàgail ainm, gu Crimestoppers air 0800 555 111.

Riaghaltas na h-Alba a’ sireadh beachdan air casg air teiripe-iompachaidh

Tha Riaghaltas na h-Alba air co-chomhairleachadh a thòiseachadh air na planaichean aca a chur casg air cleachdaidhean ris an canar “teiripe iompachaidh”.

‘S e a th’ ann an “teiripe iompachaidh” cleachdadh sam bith a dh’fheuchas ri taobhadh feise, no dearbh-aithne gnè, neach atharrachadh.

Fon chasg a tha am beachd, dh’fhaodadh do neach no buidheann sam bith a bhith air an dìteadh ma nì iad cron (corporra no saidhg-eòlach) air neach le bhith a’ feuchainn ris an taobhadh-feise no gnè atharrachadh.

Faodar barrachd fhiosrachaidh mun a’ cho-chomhairleachadh, a bhios a’ ruith dhan 2na latha den Ghiblean, fhaighinn an-seo.

Bile na h-Aithne Gnè

Tha Riaghaltas na h-Alba air dearbhadh nach dèan iad tagradh an-aghaidh co-dhùnadh Cùirt an t-Seisein gun robh an casg a chur air reachdas aithne gnè Pàrlamaid na h-Alba laghail.

Thuirt Rùnaire a’ Chaibineit airson Ceartas Sòisealta, Shirley-Anne Somerville, gur e poileasaidh an Riaghaltais a th’ anns an reachdas fhathast, gun do bhòt mòr-chuid de bhuill a’ Phàrlamaid air a shon, agus nach tèid a tharraing air ais.

Tha riaghladh Cùirt an t-Seisein a’ ciallachadh, ge-tà, nach faigh am bile aonta bhon Rìgh agus mar sin cha ghabh a chur an gnìomh.

Thuirt an Leas-phrìomh-mhinistear, Shona Robison, gun coimheadaidh an Riaghaltas a-nise ri cùram is seirbheisean shlàinte do luchd tar-ghnèitheach ath-leasachadh.

Dithis air am faighinn ciontach de mhurt Bhrianna Ghey

Chaidh dithis dheugairean fhaighinn ciontach de mhurt an deugaire thar-ghnèithich, Bhrianna Ghey.

Chaidh Ghey, 16, a fhaighinn marbh ann am pàirc ann an Warrington sa Ghearran as dèidh dhi a bhith air a sàthadh 28 tursan.

Cha ghabhadh Caileag X agus Balach Y ainmeachadh o chionn ‘s gu bheil iad 16 bliadhna a dh’ aois.

Thèid binn a chur orra gu foirmeil an ath-mhìos, ach thuirt am britheamh gun tèid binn beatha a chur orra.