Postaichean as ùire
Cuairt-litir #24
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Blaby
Tha Comhairle-pharaiste Bhlaby air àicheadh a dhèanamh gu bheil pròiseas fastaidh homafòbach aca.
Tha e air tighinn as dèidh dhaibh iarrtasan obrach bho Ande Savage, 56, agus Glynn Smith, 65 a dhiùltadh ‘s an dithis thagraichean a’ creidsinn gur ann mar thoradh air an taobhadh feise aca nach robh iad air am fastadh.
Thug an dithis fhireannach iomradh air an taobhadh feise aca san iarrtasan aca, ‘s thuirt iad gun d’fhulaing iad ceistean borb agus ionnsaigheach mu a dheidhinn rè na h-agallamhan aca.
Michigan
Tha Stàit Michigan air cleachdaidhean ris an canar “teiripe iompachaidh” a thoirmeasg.
Bhòt Seanadh na Stàite 21-15 airson a’ chasg san Ògmhios agus chaidh a shoidhnigeadh ‘na lagh 26 den Iuchar.
Tha an lagh a’ toirmeasg “cleachdadh no leigheas sam bith a chleachdas neach-proifeasanta slàinte-inntinn mar oidhirp air taobhadh feise no dearbh-aithne gnè a th’ aig neach atharrachadh.
A-rèir a’ charthannas LGDTC+, The Trevor Project, bha 15 sa cheud den òigridh LGDTC+ ann am Michigan fo bhagairt “teiripe iompachaidh” an-uiridh [Tùs].
Florida
Chaidh tar-fhireannach beò-leatromach agus an leanabh aige a mharbhadh ann an Winter Haven, Florida 21 den Iuchar.
Tha Oifis an t-Siorraim ann an Siorrachd Polk ag aithris gun do thilg Riley John Groover, 26, a chèile, Camdyn Rider, 21, faisg air an taigh aca, mus do chur e an urchair ann fhèin.
Bha dùil aig Rider ris an leanabh an ath-mhìos.
Ghàna
Tha dùil gun gabh Pàrlamaid Ghàna ri lagh a dhèanadh e mì-laghail a bhith ri feise co-sheòrsach, a bhith tar-ghnèitheach agus iomairt airson còraichean LGDTC+.
Tha a’ phàrlamaid air a bhith ga dheasbad fad dà bhliadhna mar-thà agus tha a’ mhòr-chuid de bhuill-phàrlamaid air an taic a chur ris.
Thuirt buidheann de dh’eòlaichean nan Nàiseanan Aonaichte ann an 2021 gum brosnaich an lagh “teiripe iompachaidh”, obair-lannsa neo-riatanach air clann eadar-sheòrsach agus èigneachadh de leasbaich mar oidhirp gus an dèanamh eile-sheòrsach.
Thuirt Eaglais Anglach Ghàna ann an 2022 gun robh an lagh ro chruaidh.
• • •
Cuairt-litir #23
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Rannsachadh truailleadh fala
Bheir am Prìomhaire Rishi Sunak fianais an-diugh do rannsachadh an truaillidh fala.
Thathar a’ creidsinn gun do chaill mu 3,000 neach am beatha agus gun deach HIV agus Hepatitis C a chur air mu 30,000 neach as dèidh dhaibh fuil thruaillte fhaighinn anns na 70’an agus na h-80’an.
Keir Starmer
Tha Keir Starmer air ràdh a-rithist gur e “inbheach boireann” a th’ ann am boireannach.
Nochd Ceannard nan Làbarach air prògram Nicky Campbell air BBC Radio 5 Live sa mhadainn ‘s e a’ freagairt sreath de chèistean bhon a’ phoball.
Nuair a thog Campbell a’ cheist mu Phoileasaidh Aithneachadh Gnè nan Làbarach, thuirt Starmer gu gramail gur e “inbheach boireann a th’ ann am boireannach”.
Tha aithris Starmer air tighinn dà latha as dèidh do Rùnaire Dùbhlanach airson Boireannaich agus Co-ionnannachd ainmeachadh nach ceadaich Na Làbaraich fèin-aithneachadh agus gum biodh riatanas ann fhathast airson fianais-leigheis mus faigheadh neach tar-ghnèitheach Teisteanas Aithneachadh Gnè.
Balach tar-ghnèitheach, 13, air fhaighinn marbh
Tha balach tar-ghnèitheach, 13, air làmh a chur na bheatha fhèin mar thoradh air burraidheachd as dèidh dha tighinn a-mach aig an sgoil aige.
Thathar ag aithris gun deach Onyx John fhaighinn marbh 16mh den Iuchar aig taigh a mhàthair ann an Beaudesert, Queensland.
Dh’innis a phiuthar, Lambert Ivy, do Daily Mail Australia robh Onyx a’ fulaing burraidheachd aig an sgoil ‘s air loidhne.
Thuirt i cuideachd gun do dh’fheuch nigheanan aig an sgoil ionnsaigh a thoirt air an-uiridh agus ged a thuirt an sgoil gun dèiligeadh iad ris, cha robh buaidh sam bith ann a-riamh dha na nigheanan.
Dhearbh neach-labhairt Roinn Foghlam Queensland gu bheil rannsachadh a’ leantainn aig an sgoil.
Farpaisean snàmh na Cruinne
Tha buidheann-riaghlaidh snàmh na cruinne, World Aquatics, air ainmeachadh gun tèid roinn mheasgaichte a chruthachadh gus am bi lùth-chleasaichean tar-ghnèitheach fhathast comasach air farpais.
Bha am buidheann air ainmeachadh mar-thà san Ògmhios nach biodh tar-bhoireannaich comasach air farpais ann an farpaisean nam ban tuilleadh.
Thuirt Ceann-suidhe a’ bhuidheann Dimàirt air thoiseach air farpaisean na cruinne ann an Iapan gun tèid barrachd fhiosrachaidh mu na planaichean aca leigeil mu sgaoil a dh’aithghearr.
• • •
Cuairt-litir #22
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Poileasaidh Aithneachadh Gnè nan Làbarach
Tha Rùnaire Dùbhlanach airson Boireannaich agus Co-ionnannachd air planaichean a’ Phàrtaidh Làbarach airson Achd Aithneachadh Gnè ath-leasachadh a cho-roinneadh.
Sgrìobh Annelises Dodds sa phàipear-naidheachd The Guardian gu bheil a’ pròiseas a dh’fheumas luchd tar-ghnèitheach leantainn gus an gnè aca atharrachadh “sàithteach, seann-fhasanta agus tàmailteach” agus gu bheil iad airson a chur às dhan bhiurocrasaidh agus a dhèanamh nas sìmplidhe.
Dhearbh i ge-tà nach ceadaich iad fèin-aithneachadh agus gum biodh riatanas ann fhathast airson fianais-leigheis, ach an àite Pannal Aithneachadh Gnè, biodh breithneachadh-leigheis bho aon dhoctair “gu leòr”.
Tha seo a’ dol an-aghaidh poileasaidh Pàrtaidh Làbarach na h-Alba a tha airson cur às dhan fheum airson fianais-leigheis agus fèin-aithneachadh a cheadachadh.
Binn phrìosain ‘son ionnsaigh air fireannaich gèidh
Chaidh binn phrìosain a chur air reiceadair thaighinn as dèidh dha ionnsaigh a thoirt air dithis fhireannach gèidh ann am Birmingham.
Thug Usman Murtza ionnsaigh air John-Paul Kesseler agus Anthony Smith sa Dhàmhair 2021 nuair a chunnaic e gun robh iad a’ cumail grèim air làmhan a chèile.
Bhuail e Kessler le botal - ga fhàgail le gearradh os cionn a shùil - agus bhuail e an dithis fhireannach mun gàirdeanan le pìob mheatailteach.
Theich e sa chàr aige nuair a rach buill den phoball an-sàs.
Chuala a’ chùirt gun d’fhàg an ionnsaigh Smith mì-chomhfhurtail a’ cumail grèim air làmh a chèile gu poblach tuilleadh agus gun do thòisich Kessler a’ gabhail barrachd alcol.
Thuirt Murtza gu bheil e air a thàmailteachadh leis na rinn e agus gu bheil e air leth duilich.
Chaidh binn phrìosain 16 mìos a chur air leis gun robh an ionnsaigh air adhbharachadh le gràin co-sheòrsachd.
Èirinn
Chaidh fireannach, 24, a chur an grèim ann an Dùn Dealgan Dihaoine fo chasaid gun robh e a’ cleachdadh an aplacaid Grindr gus fireannaich gèidh a thargaid agus robaigeadh.
Nochd Michael Quinn ann an Cùirt-sgìre Bhaile Àtha Cliath Disathairne fo dà chasaid robaireachd agus aon chasaid gun d’rinn e oidhirp air robaireachd.
Chaidh a chumail an grèim gus an nochd e aig Cùirt-sgìre Dhùn Dealgan Diciadain.
An Ruis
Tha Ceann-suidhe na Ruise, Vladimir Putin, air bile a shoidhnigeadh ‘na lagh a chuireas às dhan chòir a bh’ aig luchd tar-ghnèitheach air cùram-slàinte gnè, pòsadh agus uchd-mhacachadh.
Fon lagh ùr tha obair-lannsa daingneachadh gnè agus cùram-slàinte gnè eile a-leithid teiripe ionadachadh bhrodagan toirmeasgte.
Tha an lagh cuideachd a’ cur casg air luchd tar-ghnèitheach bho bhith ag uchd-mhacachadh cloinne agus a’ cur às do phòsaidhean ma tha gin de na cèilean tar-ghnèitheach.
Tha e cuideachd mì-laghail a-nis gnè neach atharrachadh air sgrìobhainnean oifigeil a-leithid ceadan-siubhail - bha seo air a bhith laghail san Ruis o chionn 1998.
• • •
Cuairt-litir #21
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
A’ Bheilg
Bhòt Pàrlamaid na Beilge Diardaoin gus casg a chur air cleachdaidhean ris an canar “teiripe iompachaidh”.
‘S e seo cleachdadh sam bith a dh’fheuchas taobhadh feise no dearbh aithne gnè neach atharrachadh.
Thèid binn-phriosain suas ri 2 bhliadhna agus/no peanas-airgid suas ri luach €2,400 a chur air neach sam bith a thèid a dhìteadh fon lagh ùr.
Ohio
Tha Seanadair JD Vance air bile a mholadh a dhèanadh e mì-laghail obair-lannsa daingneachadh gnè agus cùram-slàinte daingneachadh gnè a leithid blocaichean-inbhidheachd, a thabhann do dh’òigridh ann an Ohio.
Tha am bile a’ moladh peanais-airgid luach $250,000 air neach sam bith a bhriseas e.
Thuirt Vance nuair a dh’ainmich e am bile Dimàirt nach bu chòir do dhoctairean bhith comasach air obair-lannsa daingneachadh gnè a dhèanamh air mion-aoisich, ach tha seo mì-laghail anns na Stàitean Aonaichte, an Rìoghachd Aonaichte agus sa’ mhòr-chuid de dhùthchannan eile air feadh an t-saoghail mar-thà.
Arizona
Tha britheamh feadarail ann an Arizona air casg sealach a chur air lagh a chuireadh casg air boireannaich agus nigheanan tar-ghnèitheach bho sgiobaidhean spòrs boireannach.
Cha tèid an lagh a chur an gnìomh a-nis gus an riaghal a’ chùirt air cùis-lagha a tha pàrantan dithis nighean tar-ghnèitheach air toirt an-aghaidh na stàite.
Tha iad ag ràdh gu bheil an lagh a’ briseadh Title IX - lagh feadarail a chuireas casg air sgoiltean agus prògraman foghlaim eile a fhuaireas maoineachadh poblach bho bhith a’ dèanamh leth-bhreith a thaobh gnè - agus clàs bun-reachd nan Stàitean Aonaichte air dìonan co-ionnannachd.
Thuirt am britheamh, Jennifer G. Zipps, nuair a dheònaich i an casg sealach nach eil fianais sam bith ann gu bheil buannachd a bharrachd aig nigheanan tar-ghnèitheach a bhios a’ gabhail bacaidhean inbhidheachd fo òrdugh-cungaidh thairis air nigheanan eile agus gu bheil slàinte-inntinn nan nigheannan an urra ris an comas aca a bhith beò mar nigheanan anns a h-uile suidheachadh nam beathannan.
Peru
Tha àrd chùirt ann am Peru air riaghladh gu bheil còir aig càraidean aon-sheòrsach air am pòsaidhean a chlàradh gu laghail.
Bha a’ chùirt a’ riaghladh air cùis-lagha a thog saoranach leasbach an-aghaidh RENIEC, oifis-chlàraidh na dùthcha, as dèidh dhaibh diùltadh am pòsadh aice a chlàradh.
Phòs i fhad ‘s a bha i thall-thairis ann an 2019, agus ged a tha co-sheòrsachd laghail san dùthaich, dhiùlt RENIEC am pòsadh a chlàradh leis gu bheil còd catharra na dùthcha ag ràdh gur e aonadh eadar fear agus bean a th’ ann am pòsadh.
Riaghail a’ chùirt ge-tà gun do bhris RENIEC a’ chòir bhun-reachdail a th’ aig an saoranach air teaghlach agus mar sin gum feum iad am pòsadh aice a chlàradh.
Justin Fashanu
Chaidh dealbh-balla a nochdadh ann an Norwich a’ comharrachadh beatha Justin Fashanu.
Chluich Fashanu airson Norwich City eadar 1978 agus 1981 agus chaidh e na chiad chluicheadair dubh gus cìs luach £1m fhaighinn nuair a thar-aisig e gu Nottingham Forrest.
Chaidh e cuideachd na chiad chluicheadair ball-coise proifeasanta gèidh nuair a thàinig e a-mach ann ann agallamh leis an Sun ann an 1990.
Ged a dh’fhulaing e gràin-chinnidh agus gràin cho-sheòrsachd rè na 90’an, ach lean e air cluiche gu proifeasanta mus chaidh e na còidse anns na Stàitean Aonaichte.
Ann an 1998 rinn balach 17 bliadhna a dh’aois ann am Maryland casaid air Fashanu gun d’tug e ionnsaigh dhrabasta air.
Rinn e àiceadh gun d’thug e ionnsaigh dhrabasta air a’ bhalach, agus thuirt e gun robh am feise co-aontachail.
Bha feise co-sheòrsach mì-laghail ann am Maryland ag an àm ge-tà agus bha eagal air nach faigheadh e triail chomthromach is mar sin theich e air ais a Shasainn far an do chur e làmh na bheatha fhèin.
B’ e 2022 mus tàinig cluicheadair ball-coise proifeasanta gèidh eile a-mach.
• • •
Cuairt-litir #20
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Seann-ghaisgich LGDTC+
Tha am Prìomhaire, Rishi Sunak, air leisgeul oifigeil a dhèanamh do sheann-ghaisgich LGDTC+ airson a’ chron a chaidh a dhèanamh orra mar thoradh air a’ chasg a bh’ air luchd-obrach LGDTC+ sna feachdan armaichte ro 2000.
Thàinig leisgeul an Riaghaltais as dèidh gun deach tòraidhean ath-sgrùdadh neo-eisimeileach mu eòlasan sheann-ghaisgich LGDTC+ fhoillseachadh.
Fon seann lagh, bhiodh pearsachan LGDTC+ air an leigeil mu sgaoil gun urram is gun pheinnsean. Chaidh ionnsaighean agus ionnsaighean drabasta a thoirt air cuid agus chaidh dubh-mhàl a dhèanamh air cuid eile.
Thathar a’ creidsinn gun tug an casg buaidh air mu 5,000 neach.
Chaidh an casg a thilgeil a-mach ann an 2000 as dèidh gun d’thug seann-ghaisgich LGDTC+ Riaghaltas an RA gu Cùirt Eòrpach nan Còraichean Daonna agus gun do riaghail a’ chùirt gun robh an casg na bhriseadh den chòir aca air prìobhaideachd.
King Lawal
Chaidh Comhairliche Tòraidheach ann an Siorrachd Northampton a chur às a dhreuchd rè ùine as dèidh dha tuèiteadh gur e peacadh a th’ ann am Pròis.
Bha King Lawal a’ toirt iomradh air dealbh de chaismeachd pròise nuair a sgrìobh e:
“When did Pride become a thing to celebrate.”
“Because of Pride Satan fell as an arch Angel. Pride is not a virtue but a Sin.”
“Those who have Pride should Repent of their sins and return to Jesus Christ. He can save you. #PrideMonth #Pride23 #PrideParade.”
Chaidh Lawal a chasg bho na Tòraidhean fhad ’s a tha Prìomh-oifis Iomairt nan Tòraidhean (CCHQ) a’ dèanamh rannsachaidh.
Rothaireachd
Tha buidheann-riaghlaidh rothaireachd na cruinne, Union Cycliste Internationale, air tar-bhoireannaich a thoirmeasg bho fharpaisean nam ban.
Fon riaghailt ùr, chan fhaod lùth-chleasaichean a chaidh tro inbhidheachd mar fhireannach pàirt a ghabhail ann am farpaisean nam ban agus bi aca ri farpais ann an roinn mheasgaichte an-aghaidh nam fireannach.
Bha buidheann-riaghlaidh rothaireachd Bhreatainn air tar-bhoireannach a thoirmeasg bho fharpaisean nam ban mar-thà sa’ Chèitean.
• • •
Cuairt-litir #19
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Carthannasan air gealltainn taic a thoirt do luchd tar-ghnèitheach is neo-bhìnearaidh
Tha còrr is 100 carthannas air gealltanas a shoidhnigeadh gun bheir iad taic do luchd tar-ghnèitheach is neo-bhìnearaidh agus gun dèan iad cinnteach gu bheil an roinn carthannais na àite sàbhailte dhaibh.
Nam measg, tha Oxfam, Samaritans, Mermaids agus an LGBT Foundation uile air gabhail ris an iomairt Stand With Trans a chaidh a chruthachadh leis a’ bhuidheann Charity So Straight gus carthannasan a dhèanamh nas càirdeile agus nas in-ghabhalaiche do luchd LGDTC+.
Na Tìrean Ìsle
Dh’ainmich an Comann Ball-coise Duitseach Rìoghail Diluain gun tèid stad a chur air geamaichean an ath-sheusan ma sheinneas luchd-taic òrain homafòbach.
A bharrachd air sin bidh luchd-taic air an toirmeasg bhon stèideam fad 18 mìos ma tha iad air am faighinn ciontach de ghiùlain oilbheumach.
An Ruis
Fhuair bile a chuireadh bacadh air obair-lannsa daingneachadh gnè seachad air an dàrna leughadh aice ann am Pàrlamaid na Ruise Diardaoin.
Tillidh i dhan phàrlamaid Dihaoine airson an leughadh mu dheireadh mus tèid i air adhart gu bhòt san t-seòmar uachdarach agus ma shoirbheachais i an sin thèid i air adhart gu Ceann-suidhe Putin airson a shoidhnigeadh ‘na lagh.
Tar-fhireannach fo amharas brathaidh san Ruis
Tha Seirbheis Fheadarail na Sàbhailteachd (FSB) air tar-fhireannach a chur an grèim san Rùis fo amharas brathaidh.
Cha deach an neach ainmeachadh fhathast, ach thuirt am FSB gu bheil iad air gnìomhaiche den ghluasad LGDT a bha air an gnè atharrachadh roimhe bho bhoireann gu fireann a chur an grèim fo amharas brathaidh airson taic-airgead a thoirt seachad do dh’Arm na h-Ucràin.
Chaidh a’ bhinn as àirde airson brathadh san Ruis àrdachadh bho 20 bliadhna gu binn-bheatha sa Ghiblean.
Eaglais Meathodach nan Stàitean Aonaichte
Tha Pink News ag aithris gu bheil còrr is 6,000 co-thional air briseadh air falbh bho Eaglais nam Meathodach anns na Stàitean Aonaichte mar thoradh air sgaradh nam measg mu chlèirich gu fosgailte gèidh agus ministearan a’ beannachadh pòsaidhean aon-sheòrsach.
Bhòt ceannardan na h-eaglaise ann an 2019, 438-384 gus bacadh a chumail air ministearan gèidh agus pòsadh aon-sheòrsach ach bha cuid air a’ chasg a chur gu taobh bhon uair sin.
Thathar ag aithris gun do dh’fhàg 4,172 dhiubh an eaglais nàiseanta san Ògmhios agus gu bheil a’ mhòr-chuid dhiubh mu dheas agus gu iar-mheadhannach.
Kansas
Dh’òrdaich britheamh aig cùirt-shiorrachd ann an Shawnee, Kansas Diluain stad a chur air leigeil le luchd-ghnèitheach an gnè a nochdas air na ceadan-dràibhidh aca atharrachadh.
Tennessee
Tha Cùirt-tagraidh anns na Stàitean Aonaichte air lagh a thoirmisgeas doctairean ann an Tennessee bho bhith a’ toirt cùram slàinte daingneachadh gnè do dh’òigridh tar-ghnèitheach ath-shuidheachadh.
• • •
Cuairt-litir #18
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Stonewall
Leigidh Àrd-oifigear Stonewall, Nancy Kelley, a dhith a dreuchd aig deireadh na mìos.
Tha Kelley air a bhith an ceann na buidhne airson trì bliadhna ’s rè na h-ùine sin i air còireachan tar-ghnèitheach a bhrosnachadh, iomairt airson ath-leasachaidhean aithneachadh gnè ann an Alba, caismeachd aig Trans Pride ann an Lunnainn agus iomairt airson crìoch a chur air cleachdaidhean iompachaidh.
Thuirt Kelley gur e “pribhleid” a th’ air a bhith ann a bhith an ceann na buidhne agus gun lean i oirre “a’ seasamh leis a’ choimhearsnachd againn”.
Rugbaidh Uladh
Tha Pròis Bheul Feirste air ràdh nach fhaod sgioba rugbaidh Uladh caismeachd na bliadhna seo fhrithealadh.
’S e “Stand by your trans” sluagh-ghairm tachartas na bliadhna seo a thèid a chumail Disathairne 29mh den Iuchar.
Bha Rugbaidh Uladh air tagradh a chur a-steach airson a bhith na phàirt den chaismeachd 2023, ach chaidh a dhiùltadh leis na h-eagraichean mar thoradh air a’ phoileasadh a chur Aonadh Rugbaidh na h-Èireann (IRFU) an gnìomh an-uiridh a chuireas casg air tar-bhoireannaich bho rugbaidh nam ban.
A’ Ghreig
Tha rannsachadh poilis a’ leantainn as dèidh mar a chaidh tar-bhoireannach fhaighinn marbh san Àithne Diluain.
Thathar ag aithris gun deach Anna Ivankova, 31, a sàthadh iomadh turas agus gun deach fios a chur dhan Phoilis nuair a dh’fheuch an uachdaran ris a’ mhàl a thogail.
Cha deach neach-amharais sam bith lorg fhathast.
An Laitbhe
Chaidh Edgars Rinkēvičs air mhionnan Oifis Ceann-suidhe na Laitbhe Disathairne, ga dhèanamh a’ chiad Cheann-suidhe Eòrpach a-riamh a tha gu fosgailte gèidh.
• • •
Cuairt-litir #17
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Pòsadh aon-sheòrsach
Dh’fhoillsich YouGov rannsachadh Diluain a tha a’ sealltainn gu bheil taic airson pòsadh aon-sheòrsach san Rìoghachd Aonaichte air a dhol an àirde.
Tha toraidhean a’ chunntais-bheachd as ùire a’ sealltainn gu bheil 78 sa cheud a’ cur taic ri pòsadh aon-sheòrsach an taca ri 42 sa cheud ann an 2011 agus thuirt aonar anns gach sianar gu bheil iad na aghaidh, an taca ri 21 sa cheud ann an 2011.
Tha 47 sa cheud eòlach air cuideigin ann am pòsadh aon-sheòrsach, agus tha 84 sa cheud eòlach air cuideigin a tha leasbach, gèidh no dà-sheòrsach.
Lorgar na toraidhean an-seo.
Pròis Bhristol
Dh’ainmich eagraichean Pròis Bhristol Dimàirt nach fhaod pàrtaidhean phoileataigeach pàirt a ghabhail anns an tachartas aca am-bliadhna no sam àm ri teachd gus an nì iad barrachd gus còirichean na coimhearsnachd LGDTC+ air fad a dhìon.
LGB Alliance
Dhiùlt mòd-ceartais cùis-lagha a’ charthannais Mermaids a bha ag amas air inbhe carthannais a striopadh bhon LGB Alliance.
Thagair Mermaids leis gu bheil an LGB Alliance an-sàs ann an gnìomhachd an-aghaidh luchd tar-ghnèitheach, an àite a bhith ag iomairt airson còraichean leasbach, gèidh agus dà-sheòrsach, nach bu chòir inbhe carthannais a bhith orra.
Riaghail an dithis bhritheamh Diardaoin nach eil còir laghail aig Mermaids dùbhlan a thoirt air inbhe a’ chaidreachais agus mar sin dhiùlt iad a’ chùis.
Baile Àtha Cliath
Dh’aidich balach, 16 bliadhna a dh’aois, ann an Cúirt Leanaí Baile Átha Cliath Diciadain gun d’tug e ionnsaigh air càraid leasbach sa bhaile an-uiridh.
Chuala a’ chùirt gun do chleachd e cànan tàireil homafòbach agus gun d’thug e dòrn dhaibh a-rithist is a-rithist.
Thathar ag aithris nach robh am balach eòlach air Robyn Deane, 22, no Kate McCabe, 25, ach gun d’thug e ionnsaigh orra nuair a thug iad cudail dha chèile aig àite-stad bus.
Chuir am britheamh Paul Kelly dàil air binn gus an t-Sultain gus an tèid sealltainn ri aithisgean.
Tha inbheach fireannach a chaidh an-sàs cuideachd a’ feitheamh ri triail fa leth aig a’ Chúirt Chuarda.
Swansea
Chaidh dealbhan-balla LGBTC+ ann an Swansea a mhilleadh le teachdaireachdan an-aghaidh luchd-LGDTC+.
Dh’earb an carthannas, Charitable Housing, air ealainiche Natasha John na dealbhan-ball a chruthachadh gus Mìos na Pròise a chomharrachadh.
Ach tha John air dealbhan a cho-roinneadh air Instagram a-nis a’ sealltainn gun deach an milleadh le graffiti a leughas “only 2 genders” agus stiocairean le teachdaireachdan a leithid “stop grooming our kids” orra.
Chaidh aithris a dhèanamh ris na Poilis.
An Ruis
Tha Ceann-suidhe na Ruise, Vladimir Putin, air clionaigean òrdachadh leigheas a thoirt do luchd LGDTC+ airson tinneas-inntinn.
Tha an òrdugh a’ cur car air co-dhùnadh 1999 gus co-sheòrsachd a chur às an liosta de thinneasan-inntinn.
Chaidh co-sheòrsachd a dhì-sheòrsachadh mar tinneas-inntinn le Buidheann Slàinte na Cruinne ann an 1990.
Nàisean Navajo
Tha Riochdaire Comhairle an Nàisean Navajo, Seth Damon, air bile a mholadh a dhèanadh pòsadh aon-sheòrsach laghail anns an Nàisean Navajo.
Tha pòsadh aon-sheòrsach air a bhith toirmisgte san treubh bho chionn 2005 nuair a chaidh lagh a chur an gnìomh a mhìnich pòsadh mar aonadh eadar fireannach agus boireannach.
Carolina a Tuath
Chleachd Riaghladair Carolina a Tuath, Roy Cooper, veto Diciadain gus stad a chur air trì bilean a chuireadh casg air cùram-slàinte daingneachadh gnè do dh’òigridh, air nigheanan tar-ghnèitheach bho fharpais ann an spòrs na sgoile, agus air foghlaim LGDTC+ ann an sgoiltean.
Carolina a Deas
Tha dithis a chur an grèim as dèidh mar a chaidh tar-fhireannach, 18, fhaighinn marbh ann am Pageland, Carolina a Deas.
Chaidh Jacob Williamson a dhìth 30mh den Ògmhios agus chaidh a fhaighinn marbh feasgar Dimàirt.
Chaidh dithis a chur an greim as dèidh rannsachadh is Joshua Newton, 25, fo chasaid muirt agus bacadh a chur air ceartas agus Victoria Smith, 22, fo chasaidh bacadh a chur air ceartas agus airson a bhith na neach-cuideachaidh.
Cha deach a dhearbhadh fhathast an deach Williamson a mhurt mar thoradh air a’ dhearbh-aithne a bh’ aige.
Salt Lake City
Tha na Poilis ann an Salt Lake City, Utah a’ rannsachadh as dèidh gun deach co-dhiù còig brataich pròise a losgadh.
• • •
Cùis-lagha Sweet Cakes gus tilleadh dhan Chùirt Uachdarach
Nì taigh-fuine Sweet Cakes by Melissa ath-thagradh an aghaidh co-dhùnadh cùirte 2013 gun d’rinn iad leth-bhreith nuair a dhiùlt na fuineadairean Crìosdaidheachd cèic-bhainnse a dhèanamh do chàraid leasbach.
Chuir Cùirt Oregon peanas-airgid luach $135,000 air na fuineadairean ann an 2013 as dèidh gun d’rinn an càraid casaid gun d’rinn an taigh-fuine leth-bhreith orra.
Dh’fheuch fuineadairean Aaron agus Melissa Klein ath-thagradh a dhèanamh an aghaidh an co-dhùnadh ann an 2019 ach chaidh a’ chùis dhiùltadh le Cùirt Uachdarach nan Stàitean Aonaichte.
Tha iad air ràdh a-nis ge-tà gu bheil iad airson tilleadh dhan Chùirt Uachdarach, as dèidh gun do riaghail a’ chùirt seachdain seo chaidh gum faodadh dealbhaiche-lìn ann an Colorado luchd-ceannaich LGDTC+ a dhiùltadh air sgàth ’s gur e Crìosdaidh a th’ innte.
• • •
Cuairt-litir #16
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Mhàiri Black
Tha Mhàiri Black, BP an SNP airson Pàislig agus Siorrachd Rinn Friù, air ainmeachadh gun seas i sìos aig an ath thaghadh.
Tha Black air seasamh airson co-ionnannachd agus còraichean LGDTC+ bho chaidh a taghadh gu Westminster ann an 2015.
Thuirt i ris a’ phod-chraoladh The News Agents, gur bheil i sgìth dhen “àrainneachd puinnseanach” a th’ ann an Westminster.
Am BBC
Tha am BBC air innse don luchd-obrach naidheachd aca gun a bhith a’ frithealadh tachartasan Pròis a dh’fhaodadh a bhith air am faicinn mar fhianais-dùbhlain.
Thathar ag aithris gun deach an stiùireadh a co-roinneadh le àrd-mhanaidsearan Diluain, as dèidh Pròis Lunnainn a chaidh a chumail air an deireadh-sheachdain ach air thoiseach air Pròìs Tar-ghnèitheach Lunnainn a thèid a chumail air an deireadh-sheachdain seo tighinn.
Cunntas-sluaigh na h-Èireann 2027
Tha an carthannas LGBT Ireland air iarraidh air Prìomh Oifis Staitistig na h-Èireann ceistean mu dhearbh-aithne gnè agus taobhadh-feise a chur ris a’ Chunntas-sluaigh 2027.
Tha an carthannas a’ moladh ceistean a leithid: “Dè an gnè bith-eòlasach a chaidh a buileachadh ort nuair a rugadh tu?”; “An do rugadh tu le eadar-dhealachadh dhe na buill-ghineamhainn (ris an canar “eadar-sheòrsach” no “DSD”)?”; “Dè an tuairisgeul as fheàrr air do ghnè?”; agus “Dè do thaobhadh-feise?” a chur ris a’ chunntas-sluaigh.
Thuirt iad gun cuidich am fiosrachadh seo an Riaghaltas gus neo-ionnannachdan a tha a’ toirt buaidh a’ a choimhearsnachd LGDTC+ a thomhas.
Iòrac
Chaidh bile a chur a-steach gu Pàrlamaid na h-Ìorac ag amas air co-sheòrsachd a thoirmeasg gu h-oifigeil san dùthaich.
• • •
BPA den bheachd gun deach a chur às a dhreuchd airson taic a chur ri ath-leasachaidhean gnè
Tha am BPA, Jamie Greene, air ràdh gu bheil e a’ creidsinn gun deach a chur às a dhreuchd air being-aghaidh nan Tòraidhean air sgàth ’s gun do chur e a thaic ri Bile Ath-leasachadh Aithneachadh Gnè Riaghaltas na h-Alba.
Chaidh Greene a chur às a dhreuchd mar Neach-labhairt airson Ceartas nuair a rinn Ceannard Pàrtaidh Tòraidheach na h-Alba, Douglas Ross, iomlaid dhreuchd air buill a’ chaibineit aige nas tràithe air an t-seachdain seo.
Thuirt Greene ri The Sunday Show air BBC Radio Alba nach deach adhbhar a thoirt dha carson a chaidh a chur às a dhreuchd, ach gun deach innse do luchd-naidheachd Thaigh an Ròid gur e a thaic airson a’ bhile as coireach.
• • •
Cuairt-litir #15
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Teiripe Iompachaidh
Tha Pàrtaidh Uaine na h-Alba air film ghoirid ùr (a ghabhas a choimhead gu h-ìosal) a cho-roinneadh mu Chomhairliche Blair Anderson agus an eòlas aige air teiripe iompachaidh.
Lunnainn
Thèid còig pleitean ùra a chur an àirde air feadh Lunnainn gus coimhearsnachd agus eachdraidh LGDTC+ a’ bhaile a chomharrachadh.
Poblachd na Seice
Ghabh seòmar ìosal pàrlamaid Poblachd na Seice ri bile Diardaoin a dhèanas pòsadh aon-sheòrsach laghail san dùthaich.
Bhòt buill-phàrlamaid 68-58 airson a’ bhile a thèid air adhart a-nis gu comataidhean far an gabh atharrachaidhean a mholadh mus till i air ais dhan t-seòmar ìosal airson a’ bhòt mu dheireadh.
As dèidh sin feumaidh an t-Seanadh bhòtadh air a son mus tèid i dhan Cheann-suidhe airson soidhnigeadh ‘na lagh
Tha companasan-catharra laghail san dùthaich mar-thà, ach chan eil eil iad a’ leigeil le càraidean aon-sheòrsach clann uchd-mhacachadh, sealbh fhaighinn air toglaichean no peinnsean banntrach fhaighinn.
Brunswick Ùr
Chaidh atharrachaidhean ùra do Phoileasaidh Dearbh-aithne Gnè is Taobhadh Feise, no Poileasaidh 713, a chur an gnìomh ann am Brunswick Ùr an-diugh a chuireas casg air tidsearan bho bhith a’ cleachdadh riochdairean pearsanta ròghnaichte oileanaich fo 16 bliadhna a dh’aois gun chead bho na pàrantan aca.
Mura faigh iad cead, tha am poileasaidh ag ràdh gun tèid an oileanach a chur gu neach-obrach sòisealta no saidhg-eòlaiche gus dòigh a lorg bruidhinn ris na pàrantan aca.
Chaidh am poileasaidh atharrachadh cuideachd gus an earrann a thug iomradh air leigeil ri oileanaich cluich le sgiobaidhean-spòrs a cho-fhreagair ris an dearbh-aithne gnè aca a thoirt às.
Thuirt Prìomhaire Blaine Higgs gun deach am poileasaidh atharrachadh as dèidh na ceudan de ghearanan bho thidsearan agus phàrantan ach chaidh an Riaghaltas aige a chàineadh air sgàth ’s nach tug iad fianais seachad agus nach dh’fhuair luchd-lagha cothrom air bhòtadh air na h-atharrachaidhean.
Puerto Rico
Tha na Poilis ann am Puerto Rico a’ rannsachadh as dèidh gun deach tar-bhoireannach Afra-Latina a mhurt Didòmhnaich.
The Telemundo Puerto Rico ag aithris gun deach Channell Perez Ortiz, 29, a mhurt nuair a chaidh losgadh oirre agus gun deach seachd no ochd peilearan a lorg aig an làrach air cùlaibh oilthigh ann an Carolina.
Thathar ag aithris gur i co-dhiù an 13mh neach tar-ghnèitheach a chaidh a mhurt anns na Stàitean Aonaichte bho thoiseach na bliadhna.