Highland Pride 2024 air ainmeachadh

Tha eagraichean Highland Pride air ainmeachadh gum bi iad a’ comharrachadh Pròis 2024 anns an Ògmhios / an Iuchar le sreath de thachartasan air feadh na Gàidhealtachd.

09 Am Màrt 2024

Hebridean Pride ann an cunnart dùnadh

Tha Hebridean Pride air ainmeachadh gun tèid an cur mu sgaoil an ceann cola-deug mura lorg iad co-dhiù 5-7 neach a bhios deònach smachd a thoirt air stiùireadh an tachartais.

05 Am Màrt 2024

Cuairt-litir #53

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

03 Am Màrt 2024

Cuairt-litir #52

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

25 An Gearran 2024

22 daoine air an cur gu bàs anns an Eaman airson casaidean co-cheangailte ri co-sheòrsachd

Tha Amnesty International ag aithris gu bheil dà chùirt anns an Eaman air binn-bhàis a chur air 22 daoine airson casaidean co-cheangailte ri co-sheòrsachd.

San Fhaoilleach chur cùirt ann an Dhamar binn-bhàis air naoinear - seachdnar gu bhith air an cur gu bàs le clachadh agus an dithis eile le ceusadh - agus binnean prìosain eadar 6 mìosan agus 10 bliadhna air 23 daoine a bharrachd airson casaidean co-cheangailte ri co-sheòrsachd agus “gnìomhan mì-mhoralta”.

Cuideachd chur cùirt ann an Ibb binn-bhàis air 13 oileanaich agus binn chuipidh air triùir a bharrachd 1d den Ghearran airson “co-sheòrsachd a sgaoileadh”.

17 An Gearran 2024

Luchd-obrach LGDT+ ag iarraidh reachdaire ùr Oilthigh Dhùn Èideann a chur às a dhreuchd

Chaidh an sgrìobhaiche Simon Fanshawe a shuidheachadh na reachdaire air Oilthigh Dhùn Èideann Diluain.

Bha e na cho-stèidheadair a’ bhuidhinn-iomairt, Stonewall, ach e air càineadh a dhèanamh air a’ bhuidheann o chionn grèis a-nis airson taic a chur dhan iomairt airson còraichean thar-ghnèitheach.

Ann an 2019 rinn e òraid aig tachartas cur air bhog a’ bhuidhinn LGB Alliance a bhios ag iomairt an-aghaidh còraichean thar-ghnèitheach.

Ann an 2022 sgrìobh e artaigil ann an Daily Mail anns an tuirt e gun robh beachdan na buidhne a-thaobh còraichean thar-ghnèitheach a’ criomadh còraichean bhoireannach agus ann an 2023 sgrìobh e artaigil airson UnHerd anns an tuirt e gum bu chòir dhan ghluasad LGD (Leasbach, Gèidh is Dà-sheòrsach) sgaradh bhon ghluasad airson còraichean thar-ghnèitheach.

Thuirt neach-labhairt Lìonra Pròis an oilthighe ris The National gu bheil seo a’ sealltainn a-rithist nach eil àrd-sgioba stiùiridh an oilthighe a’ cumail ris na poileasaidhean aca fhèin air Co-ionnannachd, Iomadachd agus Ion-ghabhaltas.

Thuirt neach-labhairt an oilthighe gu bheil an reachdaire air an ainmeachadh is air an taghadh leis na h-oileanaich agus an luchd-obrach, agus o chionn ‘s nach do sheas neach sam bith eile ‘son taghadh chaidh Simon Fanshawe a shuidheachadh na reachdaire.

15 An Gearran 2024

Cuairt-litir #51

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Rishi Sunak

Chaidh càineadh a dhèanamh air a’ Phrìomhaire, Rishi Sunak, Diciadain an dèidh dha muinntir thar-ghnèitheach a chleachdadh gus goth a thoirt air Keir Starmer, fhad ‘s a bha màthair Brianna Ghey, an deugaire tar-ghnèitheach a chaidh a mharbhadh an-uiridh ann an Culcheth, an làthair aig Taigh nan Cumantan.

Liz Truss

Thuirt Liz Truss Dimàirt aig tachartas a chur am faigsean Tòraidheach ùr “PopCon” (Popular Conservatisim) air bhog, gur e “eastramaichean na làimhe chlì” a th’ ann an luchd-àrainneachd agus an fheadhainn a bhios a’ cur taice ri dhaoine LGDTCEN+ agus mion-shluaghan cinnidheach.

An Ruis

Tha Associated Press ag aithris gun deach peanas-airgid ₽1,500 air an neach-ealain, Inna Mosina, Diluain airson dealbhan anns a bheil brataich a’ bhogha-froise a’ nochdadh a cho-roinneadh air Instragram.

Thathar ag aithris gur e Mosina a-nis an treasamh neach a chaidh a dhìteadh airson bogha-froise a thaisbeanadh.

A-rèir Reuters, chaidh peanas-airgid 1,000 air fireannach Diardaoin seo chaidh airson dealbh anns a bheil bratach LGBTQ+ a’ nochdadh a phostadh air loidhne agus tha The Daily Beast ag aithris gun deach binn còig latha sa phrìosan air Anastasia Yershova Diluain seo chaidh an dèidh dhi fireannaich a dh’iarr oirre fàinneachan-cluaise air dathan a’ bhogha-fhroise a thoirt oirre a dhiùltadh.

Riaghail Àrd-chùirt na Ruise san t-Samhain 2023 gur e buidheann “eastramach” a th’ anns an “iomairt eadar-nàiseanta LGDT”.

Suirbhidh Aimeireaganaich Tar-ghnèitheach

Tha an NCTE (National Center for Transgender Equality) air toraidhean tràtha na suirbhidhe 2022 aca fhoillseachadh agus iad a’ sealltainn gu bheil 94 sa cheud den fheadhainn a thug pàirt san suirbhidh nas toilichte an dèidh dhaibh eadar-ghluasad a dhèanamh.

Thuirt 98 sa cheud den fheadhainn a bha air teiripe bhrodagan a thòiseachadh agus 97% den fheadhainn a chaidh fo obair-lannsa daingneachadh gnè gu bheil iadsan nas toilichte.

Cha tuirt ach 3 sa cheud gun robh riarachadh beatha nas lugha aca an dèidh dhaibh eadar-ghluasad a dhèanamh.

Sgioba Oilimpeach nan Stàitean Aonaichte

Tha Riochdaire Florida, Greg Steube, agus Seanadair na h-Alabama, Tommy Tuberville, air bile a chur air adhart a chuireadh casg air tar-bhoireannaich bho bhith a’ farpais ann an sgioba boireannach nan Stàitean Aonaichte aig na Geamannan Oilimpeach 2024 ann am Paras.

Tha riaghailtean an IOC (Comataidh Oilimpeach Eadar-Nàiseanta) ag ràdh gum faod lùth-chleasaichean farpais san gnè fhaighte aca cho fhad ‘s gun d’rinn iad eadar-ghluasad ro aois 12.

09 An Gearran 2024

Cuairt-litir #50

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Brianna Ghey

Chaidh binn phrìosain 22 bliadhna aig a’ char as giorra air Scarlett Jenkinson, 16, agus 20 bliadhna aig a’ char as giorra air Eddie Ratcliffe, 16, airson Brianna Ghey, 16 a mharbhadh ann an Warrington sa Ghearran 2023.

O chionn ‘s gu bheil an dithis aca fhathast nam mion-aoisich, bha casg air an ainmeachadh fhad ‘s a bha a’ chùis-lagha ann, ach cho-dhùin am britheamh an casg a thogail air thoiseach air binn a chur orra an-diugh air sgàth nàdar “sònraichte” na cùise.

Laurence Fox

Riaghail Àrd-chùirt Shasainn is na Cuimrigh Diluain gun do chur Laurence Fox, stèidheadair a’ phàrtaidh phoileataigich Reclaim, droch-alladh air seann urrasair Stonewall, Simon Blake, agus an cleasaiche draga, Crystal nuair a thuirt e gur e spùinneadairean-cloinne a bh’ annta rè argamaid air an lìonra sòisealta X (Twitter) san Dàmhair 2020.

Dh’fheuch Fox an dithis acasan a thoirt gu cùirt an dèidh dhaibh ràdh gur e neach gràin-chinnidh a’ bh’ ann airson ràdh gum biodh e a’ seachnadh Sainsbury’s o chionn ‘s gun robh a’ mhòr-bhùth a’ comharrachadh Mìos Eachdraidh nan Daoine Dubha ach cho-dhùin am britheamh nach toireadh na tùeitean air an robh Mgr Fox a’ toirt iomradh buaidh mhòr air a chliù.

Wes Streeting

Tha Wes Streeting, Rùnaire Dùbhlanach na Slàinte air a thaic a fhoillseachadh airson uàrdan ospadal fa-leth do dh’euslaintich thar-ghnèitheach.

Thuirt Streeting ann an agallamh le Sky News Diluain gun robh seann Rùnaire na Slàinte, Steve Barclay, a’ dèanamh ceapan-coireachaidh de luchd thar-ghnèitheach nuair a thuirt e an-uiridh gun robh e airson tar-bhoireannaich a thoirmeasg bho uàrdan bhoireannach.

Thuirt Streeting san aon agallamh ge-tà gum faodadh uàrdan fa-leth a bhith ann do dh’euslaintich bhoireannach, fireannach agus tar-ghnèitheach.

Alan Turing ga chomharrachadh

Dealbh den charragh-chuimhne le @whitecube air Instragram.

Chaidh carragh-chuimhne fhoillseachadh aig Colaiste an Rìgh ann an Cambridge gus an neach-saidheans Alan Turing a chomharrachadh.

B’ e neach-matamataig agus “athair” coimpiutairean digiteach agus AI a bh’ ann an Turing.

Air feadh an Dàrna Cogadh bha e na chòd-cnacair aig Pàirc Bletchley ann an Sasainn agus bhrist e an Inneal Enigma aig na Gearmailtiche.

Ann an 1952 chaidh a dhìteadh airson a bhith ri feise le fear eile agus thug an riaghaltas roghainn dha eadar prìosan no spoth ceimigeach.

Thagh e spoth ceimigeach ach as dèidh dà bhliadhna a’ fuireach leis na buaidhean, thug Turing ùthachd dha fhèin, cha robh e ach 41 bliadhna a dh’aois.

Ann an 2009, thabhann Prìomh Mhinistear na Rìoghachd Aonaichte, Gordon Brown, a leisgeul air teaghlach Thuring airson a làimhseachadh.

Ann an 2013 thug Bànrigh Ealasaid II mathanas an dèidh bàis dha agus ann an 2017 thug lagh ris an canar “Lagh Thuring” mathanas dhan a h-uile fireannach a chaidh a dhìteadh gu h-eachdraidheil de cho-sheòrsachd.

“Teiripe Iompachaidh”

Tha Stonewall ag iarraidh air a h-uile neach post-d a chur dhan BP aca air thoiseach air an dàrna leughadh de bhile a chuireadh casg air cleachdaidhean ris an canar “teiripe iompachaidh” Dihaoine 1d Am Màrt.

Faodaidh sibh a’ cheangal seo a chleachdadh gus post-d a chur dhan BhP agad.

Florida

Tha leas-stiùiriche-ghnìomha an FLHSMV (Florida Department of Highway Safety and Motor Vehicles) air meòmhrachan a sgaoileadh a tha a’ moladh nach eil luchd tar-ghnèitheach ceadaichte an gnè a nochdas air na ceadan-dràibhidh aca atharrachadh.

Tha Taigh Riochdairean Fhlorida a’ deasbad bile an-dràsta a dhèanadh e riatanach gnè bith-eòlasach neach nochdadh air a’ chead-dràibhidh aca, ach cha deach a stèidheachadh ann an lagh fhathast agus mar sin chan eil e soilleir ma tha am meòmhrachan seo laghail.

Ma tha, agus leis gu bheil e laghail do luchd tar-ghnèitheach ann am Florida an gnè a nochdas air an teisteanas-breith aca atharrachadh dhèanadh e suidheachadh neònach far am faodadh neach tar-ghnèitheach a bhith an dà chuid boireannach air an teisteanas-breith aca, agus fireannach air a’ chead-dràibhidh aca, no a chaochladh.

Snàmh

Tha an snàmhaiche, Lia Thomas, air World Aquatics a thoirt gu lagh a dh’ionnsaigh car a chur air a’ chasg a th’ air tar-bhoireannaich bho fharpaisean nam ban.

Thoirmeasg World Aquatics tar-bhoireannaich bho fharpaisean nam ban san Ògmhios 2022. Stèidhich iad roinn ùr a tha fosgailte do neach sam bith, ach cha do chlàraich neach sam bith air a shon rè Chupa na Cruinne 2023. Pròis Dhùn Dè 2024

Chaidh ainmeachadh gun tèid Pròis Dhùn Dè 2024 a chumail Disathairne 15mh An t-Ògmhios aig Gàrradh Slessor.

Cumaibh sùil air na meadhanan sòisealta aca air Instagram, Facebook, agus X airson barrachd fhiosrachaidh.

02 An Gearran 2024