A’ Chiad Fèis-pròise Tar-ghnèitheach ann an Alba
Thèid a’ chiad Fèis Pròise Tar-ghnèitheach ann an Alba a chumail Disaithairne 31 Màrt 2018 eadar 12-5f.
An tòiseach bidh caismeachd sìos a’ Mhìle Rìoghail gu Pàrlamaid na h-Alba far am bi luchd-labhairt a’ toirt òraid.
As dèidh sin coinnichidh luchd-frithealaidh aig Ionad Co-labhairt Iain Mac an t-Saoir far am bi diofar bùthan-obrach, mic-fosgailte agus cabadaich gu leòr ann.
Bidh fàilte chridheil air daoine tar-ghnèithich agus na càirdean aca. Ma tha sibh airson dol cuiribh fios gu TransPride Scotland le bhith a’ clàradh an seo: https://www.eventbrite.co.uk/e/trans-pride-scotland-tickets-43137513464
Airson barrachd fhiosrachaidh thoiribh sùil air na làraichean-lìn seo:-
Làrach-lìn: www.transpridescotland.org
Bùthan-obrach: https://www.transpridescotland.org/workshop-schedule
Twitter: https://twitter.com/TransPrideScot
Facebook: https://www.facebook.com/transpridescotland/
• • •
Casg air tar-ghnèithich ann an seirbheisean armailteach nan Stàitean Aonaichte
Chaidh a dhearbhadh le Ceann-suidhe nan Stàitean Aonaicte Donald Trump gu bheil casg air a chuid as motha de thar-ghnèithich le mì-rian ghnèitheach bho sheirbheis armailteach.
A-rèir an aithris aige chaidh am poileasaidh ùr seo leasachadh mar thoradh air sgrùdadh farsaing a rinn ceannardan armailteach agus sìobhalta. A bharrachd air an aithris chaidh meòrachadn bho Rùnaire an Dìon James Mattis fhòillseachadh far an do dh’innis e gu Trump gu bheil cunnartain mòra ann a bhith a’ toirt cead do thar-ghnèithich a bhith a’ gabhail anns na feachdan armailteach air sgàth ’s gum feumadh iad a bhith saor bho shreath de riaghailtean inntinneil, corporra agus gnèitheach agus gum faodadh iad bacadh a chur air ullachadh agus co-ionnannachd an aonaid agus droch-bhuaidh a thoirt air èifeachdas na feachdan armailteach.
Thuirt Runaire Mattis gum faodadh tar-ghnèithich gabhail anns na feachdan armailteach ma tha iad air a bhith seasmhach agus ag aithneachadh an gnè bith-eòlasach aca airson 36 mìosan às dèidh a chèile. A’ dol air adhart thuirt e nach tèid casg a chur air buill le mì-rian gnèitheach ma tha iad air am breithneachadh as dèidh gabhail ann agus mura h-eil iad airson an gnè aca atharrachadh gu h-oifigeil. Mu dheireadh thuirt e gum faod buill seirbheis a chaidh a dhearbhadh le mì-rian ghnèitheach eadar an t-àm a thàinig poileasaidh an rianachd roimhe gu buil agus ceann-latha èifeachdah a’ phoileasaidh ùir an gnè aca atharrachadh ma thogras iad agus gum faigh iad leigheas a tha a dhìth.
• • •
A’ Chiad Fèis-pròise Pheairt
Thèid a’ chiad Fèis-pròise a chumail ann an Siorrachd Pheairt Disathairne 11 Lùnastal 2018.
Chaidh a chur an cèill gu bi am buidheann-eagrachaidh ag obair ann an compàirteachas le Comhairle Pheairt & Cheann Rois gus tachartas eadar-mheasgte a chumail a’ bhios a’ toirt misneachadh dhan choimhearsnachd LGBT a tha a’ fuireach san sgìre.
Tha am buidheann-eagrachaidh ag obair gu dlùth ri buidheann-eagrachaidh a’ chiad Fèis-pròise Fhìobha ann an 2017 air sgàth ’s rannsachadh a tha a’ sealltainn gun do chuir an fhèis acasan còrr ’s £150,00 ri eaconamaidh na sgìre agus gun robh còrr ’s 3000 neach an làthair.
Tha an naidheachd seo a’ ciallachadh gu tèid 11 Fèisean-pròise a chumail air feadh Alba am-bliadha. Nam measg tha Obair Dheathainn, Dùn Dè, Glaschu, Dùn Èideann agus fiù ’s Eilean Bhòid.
Ma tha sibh airson cuideachadh aig an fhèis leigibh fios dhan bhuidheann-eagrachaidh air Facebook no post-d: info@perthshirepride.com
• • •
Càineadh mu phostair oilbheumach ann an taigh-seinnse Lìteach
Chaidh càineadh a dhèanamh air an taigh-seinnse The Office ann an Lìte mu phostair oilbheumach a th’ anns na taighean-beaga aca.
Tha am postair air ainmeachadh Office Banter agus e a’ liostadh diofar abhcaidean a tha gràin-chinnidheach, gnèithealach agus gràineil ri luchd-LGBT.
Am-measg na h-abhcaidean, tha eisimpleirean mar:
“What’s the hardest part of rollerblading? Telling your parents that you are gay.”
“What did Boy George say to Michael Jackson? You Beat It, and I’ll cumma cumma cum.”
“Did you hear about the Chinese couple that had a retarded baby? They named him Sum Ting Wong.”
Ann am post air Facebook sgaoil Kevin Tierney dealbh dhen soidhne comhla ris am brath: “Toilet walls in the office on Easter road… take this racist/sexist/homophobic s*** down eh..”.
Sgrìobh Hellish Scott: “1970’s style s***e humour should be left in the 70s along with Jimmy Savile and all the other wonderful things from the time when ‘things were different’.”
Agus sgrìobh John Baird: ‘It’s maybe not offensive to everyone however it is outdated, cheap and crass. Much like the establishment itself.’
Cha deach freagairt a thoirt seachad leis The Office fhathast ach tha iad air an duilleag Facebook aca a dhùineadh a-nis.
• • •
Riaghaltas na h-Alba airson laghan a thaobh dearbh-aithne ghnèitheach ath-leasachadh
Tha Riaghaltas na h-Alba air ràdh gum bi iad a’ dol air adhart le planaichean gus laghan a thaobh dearbh-aithne ghnèitheach ath-leasachadh as dèidh gun do chur Riaghaltas Bhreatainn dàil air na planaichean acasan.
Dh’ainmich Justine Greening, Rùnaire an Fhoghlaim agus Ministear nam Ban, anns an t-Iuchar 2017 gum bidh Riaghaltas Bhreatainn ath-leasachadh an lagh a thaobh dearbh-aithne ghnèitheach.
Ach anns an Dùbhlachd sgrìobh The Sunday Times gum bidh Riaghaltas Bhreatainn a’ cur dàil air na planaichean aca air sgàth ’s gur e cùis “iomadh-fhillte” agus “co-roinnteach” a th’ ann.
Ach tha Riaghaltas na h-Alba a-nis ag ràdh gum bidh iadsan a’ dol air adhart leis an ath-leasachadh agus tha iad air co-chomhairle a chur air bhog a’ sireadh molaidhean airson atharrachaidhean dhan Gender Recognition Act 2004.
Thig a’ co-chomhairle gu crìoch 1 Màrt 2018.
Thuirt BP Angela Crawley ri Pink News: “Tha 2018 gu bhith na bhliadhna cudromach a thaobh co-ionannachd LCDTE ann an Alba.”
“Leis an ath-leasachadh a tha Riaghaltas na h-Alba a’ moladh bidh Alba na ceannabhaidh air feadh an t-saoghal a thaobh co-ionannachd tar-ghnèitheach le bhith ga dhèanamh nas sìmplidh agus nas cùramaiche airson daoine tar-ghnèitheach a bhith a’ faighinn aithneachadh laghail dhen dearbh-aithne gnèitheach aca agus airson daoine tar-ghnèitheach a bhith air an aithneachadh airson a’ chiad turas anns an Rìoghachd Aonaichte.”
• • •
42 tagraichean LCDT+ a’ sireadh taghaidh ann an Teagsas am bliadhna
A-rèir an iris OutSmart tha co-dhiù 42 tagraichean LCDT+ a’ sireadh taghaidh ann an Teagsas am bliadhna.
Tha dithis dhe na tagraichean a’ sireadh taghaidh mar Riaghladair, aonar mar bhall Àrd-chuirt Theagsais, triùir mar bhuill Seanadh Theagsais, deichnear mar bhuill Taigh Theagsais, ochdnar mar bhuill a’ Mhór-dhàil agus dusan eile a’ sireadh oifisean laghail eile.
Am measg na tagraichean tha còignear a tha tar-ghnèitheach, triùir Ameireaganach-Afraganach, sianar Spàinnteach agus tha 38 dhiubh buill anns a’ Phartaidh Deamocratach.
Bha Lupe Valdez na Siorram ann an Siorrachd Dhallais eadar 2005 agus 2017 agus i a-nis a’ sireadh taghaidh mar Riaghladair. Thuirt i ri OutSmart, “‘S e mòmaid phròiseil a tha seo ann an eachdraidh Theagsais.
“Tha e iongantach gu bheil fear ghèidh agus leasbach comasach air taghadh a sireadh dhan oifis as àirde ann an Stàit Theagsais agus e a’ sealltainn an adhartais a tha sinn air a dhèanamh mar chomann-sòisealta,” ars Jeffrey Payne, a tha a’ sireadh taghaidh mar Riaghladair cuideachd.
• • •
Co-labhairt “An Equal Future?” a’ beachdachadh air na dhìth airson Alba a dhèanamh na dùthaich nas in-ghabhalaiche
Tha Òigridh LGDT na h-Alba agus Clann ann an Alba gu bhith a’ cumail co-labhairt gus beachdachadh air na dhìth airson Alba a dhèanamh na dùthaich nas in-ghabhalaiche.
Thèid an co-labhairt “An Equal Future?” a chumail 1 An Gearran 2018 mar phàirt den mhìos air eachdraidh LGBT agus mar phàirt de Bliadhna na h-Òigridh 2018.
’S e amas na co-labhairt a bhith a’ leasachadh agus a’ neartachadh na sgilean agus an tuigse aig luchd-proifeiseanta a bhith a’ cruthachadh àrainneachdan a bhios sàbhailte, taiceil agus in-ghabhalach ris an òigridh LGBT.
Bidh iomadh taisbeanaidhean, deasbadan agus bùthan-obrach ann a’ toirt a-steach na cuspairean na leanas:
- Life in Scotland for LGBT Young People – 2018 Research
- Experiences of LGBT young people
- Gender identity in early and primary years
- LGBT and mental health
- Addressing homophobic, biphobic and transphobic bullying
- Inclusive play, activity and sport for LGBT children and young people
Tha am prògram slàn ri leughadh an seo.
Airson barrachd fhiosrachaidh tadhalaibh air an làrach-lìn aig Clann ann an Alba no cuiribh post-d thuca.
• • •
Ceann-suidhe an Eaglais Mhormonach air bàsachadh
Tha Ceann-suidhe ùr gu bhith aig an Eaglais Mhormonach (Church of Jesus Christ of Latter-day Saints) as dèidh gun do bhàsaich Thomas S. Monson Dimàirt ann an Salt Lake City. Bha e ceithir fichead sa deich bliadhna a dh’aois.
Bha Monson na Cheann-suidhe an eaglais fad 54 bliadhna agus thairis air na bliadhnaichean sin tha seallaidhean gu math traidiseanta air a bhith aige.
Cha robh buill co-sheòrsach ceadaichte san eaglais nan robh iad fosgailte mun gnèitheachd aca agus cha robh pòsadh aon-sheòrsach ceadaichte. A bharrachd air seo cha robh e ceadaichte airson boireannaich a bhith nan sagartan.
Thathar an dùil gun tèid Russell M. Nelson ainmeachadh na cheannard an eaglais agus gum bi e a’ cumail ris na h-aon sheallaidhean a bh’ aig Monson, gu h-àraid a thaobh daoine LGDT+.
Ann an 2016 thuirt Nelson gur e toil Dhé a tha anns na poileasaidhean a th’ aig an eaglais.
Nam broinn, tha na poileasaidhean seo ag ràdh gur e naomh-thrèigich a tha ann an daoine co-sheòrsach phòsta agus nach eil clann de phàrantan co-sheòrsach ceadaichte san eaglais gun a bhith a’ diùltadh na pàrantan aca.
• • •
Bàsaire ISIS fo chasaid ann an Ioràc
Tha feachdan tèarainteachd ann am Mosul, Ioràc air bàsaire ISIS a chur fo chasaid.
Tha am bàsaire, Abu Omer no ‘White Beard’ ainmeil airson fìr ghèidh a mhurt.
Tha mìltean de fhìr ghèidh air a bhith gan fuadachadh ann an Ioràc agus Siria air sgàth ’s gu bheil am buidheann ISIS gan targaideachadh.
Tha Omer air a bhith a’ falachadh ann am Mosul fad sia mìosa o chionn ’s gun d’ thug feachdan Ioràcach smachd air a’ bhaile anns an t-Iuchar 2017.
A-rèir am buidheann-naidheachd ionadail, AhlulBayt, ’s e daoine ionadail a dh’innse dha na feachdan Ioràcach far an robh Omer a’ falachadh.
• • •
Riaghaltas a’ toirt maoineachadh de £75,000 dhan charthannas Òigridh LCDT na h-Alba
Gheibh an carthannas Òigridh LCDT na h-Alba (LGBT Youth Scotland) £75,000 bho Riaghaltas na h-Alba mar phàirt dhen sgeama “Bliadhna na h-Òigridh” a bhios iad a’ ruith fad 2018.
‘S e a h-amas a bhith a’ brosnachadh Alba tron òigridh againn. Bidh a’ bhliadhna seo a’ comharrachadh euchdan na h-òigridh agus a’ cruthachadh chothroman do dh’òigridh a bhith soirbheachail aig ìre ionadail, nàiseanta agus eadar-nàiseanta.
A bharrachd air Òigridh LCDT na h-Alba bidh an Riaghaltas a’ roinn maoineachadh de £14m a-measg còrr ’s 100 buidheann a leithid Scouts Scotland, Save the Children agus Barnardo’s.
Tha clàir phoblach a’ sealltainn gu bheil teachd-a-steach Òigridh LCDT na h-Alba air àrdachadh £250,000 san bhliadhna mu dheireadh agus ann am Màrt 2017 ruig am maoineachadh gu lèir aca suas ri £1.1m. Thathar an dùil gum faigh an carthannas còrr ’s £300,000 bho phrògraman co-ionnanachd eile aig an Riaghaltas.
• • •
Riaghailtean nas fuasgailte a thaobh fireannaich co-sheòrsach a’ toirt seachad fala
Tha Seirbheis Fala na h-Alba (SNBTS) air ràdh gun tèid na riaghailtean a thaobh fala a thoirt seachad atharrachadh a-màireach.
Am-measg na h-atharrachaidhean bidh fireannaich co-sheòrsach/dà-sheòrsach comasach air fala a thoirt seachad mura h-eil iad air a bhith ri feise le fireannach eile sna trì mìosan roimhe.
O chionn 2011 cha robh fireannaich comasach air fala a thoirt seachad ma tha iad air a bhith ri feise le fireannach eile sa bhliadhna roimhe agus ro 2011 bha casg air fireannaich co-sheòrsach bho bhith a’ toirt seachad fala. Chaidh an casg a chur an sàs anns na 1980an air sgàth eagail mun ghalair HIV.
Am measg na h-atharrachaidhean eile bidh tabhairtichean comasach air fala a thoirt seachad an dèidh ceithir mìosan, seach bliadhna, ma tha iad air tattoo, piercing, acupuncture no endoscopy fhaighinn agus sia mìosan, seach naoi, an dèidh leanabh a bhreith .
Thathar an dùil gum bi 2000 a bharrachd comasach air fala a thoirt seachad air sgàth ’s na h-atharraichean seo.
Ma tha sibh ag iarraidh barrachd fhiosrachaidh mu dheidhinn na h-atharraichean seo faodaidh sibh fòn a chur dhan SNBTS air 0345 90 90 999 no post-d a chur dhaibh.
• • •
Leo Varadkar na chiad Phrìomhaire co-sheòrsach aig Èirinn
Chaidh Leo Varadkar a thaghadh mar cheannard am pàrtaidh poilitigeach Fine Gael an-diugh agus e a-nis gu bhith a chiad Prìomhaire (Taoiseach) co-sheòrsach ann an eachdraidh na h-Èirinn.
Aig 38 bliadhna a dh’aois tha e cuideachd am Prìomhaire as òige ann an eachdraidh na dùthaich.
Bhòt 60% dhen colaiste taghaidh air a shon agus thathar an dùil gum bi e a’ toirt smachd air am pàrtaidh sna seachdainnean a tha romhainn.
Thuirt Mgr Varadkar, “If my election shows anything it’s that prejudice has no hold in this Republic… When my father travelled 5,000 miles to build a new home in Ireland, I doubt he ever dreamed his son would grow up to be its leader and that despite his differences his son would be treated the same and judged by his actions and character not his origins or identity.”
Thàinig Mgr Varadkar às a chlòsaid ann an 2015 ron referendum air pòsaidhean aon-sheòrsach agus nas anmoiche air a’ bhliadhna rinn e òraid làidir ann an Dáil Éireann a’ moladh dhaibh gum bu chòir do phòsaidhean aon-sheòrsach a bhith laghail.