Cuairt-litir #70
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Soho
Chaidh fireannach a chur an grèim fo Achd na Slàinte-inntinn an dèidh dha ionnsaigh a thoirt air fireannach eile ann an Lunnainn.
Bha Linus Karp agus a bhràmair a’ coiseachd ann an Soho oidhche Mhàirt nuair a bha e air a bhualadh mun a cheann.
Thuirt bràmair Kharp, Mgr Martin, gum faca e an neach-ionnsaigh a’ bualadh ann am fireannach eile agus a’ tilgeil smugaid air. Chur Martin an neach-ionnsaigh ris an làr agus chum e an grèim e gus an d’ràinig na Poilis.
Thuirt Poilis a’ Mhet gu bheil iad ga rannsachadh mar eucoir-gràin homafòbach.
Miami
Tha fireannach air dol às àicheadh gun do dh’fheuch e ri tar-chaileag a mhurt ann am Port-adhair Eadar-nàiseanta Mhiami 20 An t-Iuchar.
Bha an nighean, 17, a chaidh ainmeachadh mar D.J. leis a’ chùirt, na suidhe air an làr is i ag ithe biadh nuair a thug Alexander Love, 29, ionnsaigh oirre.
Chaidh a sàthadh 18 tursan le sgian-bhùidseir agus bha aice ri dol fo obair-lannsa èiginneach gus a beatha a shàbhaladh.
Thathar ag aithris gu bheil an dithis aca gun dachaigh agus gun robh iad a’ fuireach anns a’ phort-adhair, ach chan eil e cinnteach nan robh iad eòlach air a chèile ron ionnsaigh.
Thagair Love gun deach a dhrugachadh, gun do chur cudeigin rudeigin ann an toll a thòine agus gun robh e airson an goirteachadh.
Tha na Poilis air ràdh nach eil iad cinnteach fhathast nam b’ e eucoir-gràin a bh’ ann no nach b’ e.
Michigan
Chaidh Michigan an fhicheadamh stàit gus casg a chur air am modh-dìona laghail ris an canar “gay panic defense”.
‘S e gay panic denfense a th’ ann nuair dh’fheuchas neach-ionnsaigh ris a’ choire a chur air neach-fhulaing LGDTC+ le bhith a’ tagairt gun tug an neach-fhulaing ionnsaigh dhrabasta orra-san.
Chaidh an reachdas ùr a shoidhnigeadh ‘na lagh leis an Riaghladair Gretchen Whitmer Dimàirt 23 An t-Iuchar.
Nebraska
Bhòt buill Àrd-chùirt Nebraska 6-1 ann an fàbhar caisg air cùram-slàinte daingneachadh gnè agus casgaidhean-breith an dèidh dà sheachdain dheug.
Thàinig an riaghladh an dèidh gun tug an ACLU an t-Àrd-neach-tagraidh Michael Hilgers gu cùirt às leth a’ bhuidhinn Planned Parenthood of the Heartland a bha a’ tagairt gu robh am bile neo-bhun-reachdail.
Tha Bun-reachd Nebraska ag ràdh nach fhaod bilean dèiligeadh ri barrachd air aon chuspair agus thagair an ACLU gun robh am bile seo a’ dèiligeadh ri dà chuspair fa-leth; cùram-slàinte daingneachadh gnè agus casgaidhean-breith.
Riaghail an t-Àrd-chùirt, ge-tà, gur e modhan meadaigeach a th’ ann an cùram-slàinte daingneachadh gnè agus casgaidhean-breith agus gur e modhan meadaigeach cuspair a’ bhile.
Astràilia
Tha rannsachadh a’ leantainn an dèidh gun deach ionnsaigh a thoirt air dithis fhear gèidh ann an Canberra an dèidh dhaibh bhith air an tàladh gu àiteachan iomallach tron aplacaid suirghe Grindr.
Thathar ag aithris gun tug ceathrar ionnsaigh air a’ chiad fhear 16 An t-Iuchar agus gun tug seachdnar ionnsaigh air an dàrna fhear 20 An t-Iuchar.
Thuirt na Poilis gum bu chòir do chleachdaichean aplacaidean suirghe a leithid Grindr coinneachadh ri chèile ann an àiteachan poblach.
Gàna
Dhiùlt Àrd-chùirt Ghàna Diciadain cùis-lagha an-aghaidh lagh cholonaidheach a rinn feise cho-sheòrsach mì-laghail san dùthaich.
Bha an casg air a ion-chorpachadh ann an lagh na dùthcha nuair a fhuair i neo-eisimeileachd bho Bhreatainn ann an 1960 agus dh’fhaodadh binn 3 bliadhna sa phrìosain a chur air neach sam bith a thèid a dhìteadh fodha.
Thuirt am Britheamh Paul Baffoe-Bonnie gum foillsich a’ chùirt adhbharan a’ cho-dhùnaidh aca san àm a tha ri teachd.
• • •
Cuairt-litir #69
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Murt ann an Lunnainn / Bristol
Tha fireannach air nochdadh aig Cùirt nam Maighstirean-Lagha ann an Wimbledon fo chasaid gun do mhurt e dithis fireannach gèidh.
Chaidh Yostin Andres Mosquera a chur an greim às dèidh mar a chaidh buill-bhodhaig a lorg ann am màileidean ann am Bristol agus ann am flat ann an Shepherd’s Bush.
Chaidh an dithis neach-fhulaing ainmeachadh mar Albert Alfonso, 62, agus Paul Longworth, 71.
Thathar ag aithris gu bheil Poilis a’ Mhet air na marbhaidhean a chlàradh mar eucoir gràin o chionn ‘s gun robh an dithis fhireannach nan seann bràmairean.
Tha Poilis a’ Mhet airson cluinntinn bho neach sam bith aig a bheil fios mu na thachair. Faodar fios a chur thuca air 101 agus an àireamh 306/12Jul a thoirt seachad. No faodar fios gun ainm a chur gu Crimestoppers air 0800 555 111.
Droch-bheul ann am Birmingham
Tha Poilis ann am Birmingham air dealbhan CCTV de chòignear fireannach a tha iad a’ sireadh às dèidh mar a chaidh droch-bheul homafòbach a thoirt air ball a’ phobaill taobh a-muigh Café Soya in the Arcadian Disathairne an 30mh den Mhàrt.
Bu chòir do neach sam bith a tha eòlach air na fireannaich fios a chur dhan Phoilis air 101 agus an àireamh 20/331067/24 a thoirt seachad. No faodar fios gun ainm a chur gu Crimestoppers air 0800 555 111.
Teiripe Iompachaidh
Chaidh seisean ùr Pàrlamaid na Rìoghachd Aonaichte fhosgladh Diciadain.
Thuirt an Rìgh Teàrlach gun chuireadh an riaghaltas ùr Làbarach aige casg air na cleachdaidhean ris an canar “teiripe iompachaidh”.
‘S e seo a-nis an treasamh turas o chionn 2018 gu bheil Òraid a’ Mhonairc air a’ chasg a ghealltainn.
Chaidh ainmeachadh airson a’ chiad turas ann an 2018 leis a’ Phrìomh Mhinistear Theresa May. Dh’fheuch Boris Johnson an casg atharrachadh gus nach biodh luchd tar-ghnèitheach air an dìon, ach bha aige ris an atharrachadh a thrèigsinn às dèidh gun deach a dhubh-chàineadh leis a’ phoball.
J.D. Vance
Tha Donald Trump air an Seanadair J.D. Vance a thaghadh gus seasamh airson dreuchd an Iar-Chinn-Suidhe.
Tha Vance air ràdh roimhe nach eil e airson co-ionnannachd pòsaidh a ghlèidheadh ann an lagh agus gum bhòt e an-aghaidh achd a bheireadh dìon do phòsaidhean aon-sheòrsach is ioma-chinnidheach.
Tha e cuideachd air iomradh a thoirt air dearbh-aithne gnè mar “ideòlas cronail” agus e air cànan ion-ghabhalach, a leithid am facal Tùsanach Aimeireaganach “dà-spioradach”, a chàineadh.
A bharrachd air sin tha e air reachdas a mholadh a chuireadh casg a bhith a’ toirt seachad cùram-slàinte daingneachadh gnè do dh’euslaintich nas òige na 18 bliadhna a dh’aois.
California
Tha e a-nis mì-laghail do sgoiltean ann an California innse do phàrantan ma tha oileanach airson eadar-ghluasad sòisealta a dhèanamh aig an sgoil.
Chaidh an lagh ùr a chur an gnìomh sa bhad an dèidh don Seanadair Gavin Newsom a shoidhnigeadh ‘na lagh Diluain.
Dh’ainmhich Elon Musk gu bheil an lagh seo agus laghan eile coltach ris a’ toirt ionnsaigh air teaghlaichean agus companaidhean agus mar sin gun gluais e prìomh-oifisean Twitter agus SpaceX à Chalifornia gu Teagsas.
Chaidh ainmeachadh Dimàirt gu bheil sgìre sgoile agus buidheann de phàrantan air cùis-lagha a thoirt an-aghaidh Newsom is iad a’ tagairt gu bheil an lagha ùr a’ briseadh na còraichean aca mar phàrantan.
Buirciona Faso
Tha Ministear a’ Cheartais, Eadasso Rodrigue Bayala, air ainmeachadh gun tèid feise cho-sheòrsach cho-aontachail a dhèanamh ‘na eucoir ann am Buirciona Faso.
Tha pòsadh aon-sheòrsach mì-laghail san dùthaich mar-thà.
• • •
Cuairt-litir #68
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Casgan inbhidheachd
Thathar ag aithris gu Rùnaire na Slàinte ùr, Wes Streeting, airson an casg sealach a chur na Tòraidhean air NHS Shasainn bho bhith a’ toirt seachad casgan inbhidheachd do dh’euslaintich ùra a dhèanamh maireannach.
Chleachd Rùnaire na Slàinte a bh’ ann roimhe, Victoria Atkins, cumhachdan èigeannach gus an casg a chur an gnìomh air thoiseach air an Taghadh Coitcheann agus bha e gus ruith gu ruige an 3mh den t-Sultain.
Thog an Good Law Project agus an carthannas TransActual UK cùis-lagha an-aghaidh a’ chaisg, agus tha Stiùiriche an Good Law Project, Jo Maugham, air ràdh gu bheil Streeting air innse don Àrd-chùirt gu bheil e airson an casg a chur an gnìomh gu maireannach.
Suella Braverman
Thuirt Rùnaire na Dùthcha a bh’ ann roimhe, Suella Braverman, ann an òraid do cho-labhairt Tòraidheach ann an Washington gur e am bratach-pròise adhartach agus tòraidhean libearalach as coireach gun do chaill Am Pàrtaidh Thòraidheach aig an Taghadh Coitcheann.
“The Progress flag flew over our buildings as if they were occupied territory, ars i.
“I wanted to scrap the unconscious bias training which basically taught people how bad and racist Britain was.
“I was told that ‘I was on the wrong side of history’ by my senior civil servant.
“I couldn’t even get the flag of a horrible political campaign I disagreed with taken down from the roof of the government department I was supposed to be in charge of.
“My question, why is this happening, went to 10 Downing Street, to the prime minister’s office.
“And that’s where the answer failed to come from.
“Because, to repeat this point once more, far, far too many Tory politicians agreed that the Progress flag must be flown.
“It shows how liberal and progressive we are, which is something many Conservatives want us to be.
“The Progress flag says one monstrous thing to me: That I was a member of a government that presided over the mutilation of children in our hospitals.”
“We won a great majority in 2019 promising to do what the people wanted,” she said.
“We were going to use our Brexit freedoms and stop waves of illegal migrants. We were going to cut taxes. We were going to stop the lunatic woke virus. We did none of this.”
“Our problem is us. Our problem is that the liberal Conservatives who trashed the Tory party think it was everyone’s fault but their own.
“My party governed as liberals and we were defeated as liberals. But seemingly, as ever, it is Conservatives who are to blame.”
An Eaglais Shasannach
Tha Seanadh na h-Eaglaise Sasannaich air bhòtadh airson molaidhean a leigeadh le luchd-clèire gèidh pòsadh.
Bhòt 22 easbaigean, 99 luchd-clèire agus 95 buill neo-chlèireach airson na molaidhean an taca ris na 12 easbaig, 88 luchd-clèire agus 91 buill neo-chlèireach a bhòt nan aghaidh.
Ionnsaigh ann an Stockton
Tha Poilis ann an Stockton, Siorrachd Durham air dearbhadh gun deach triùir bhalaich a chaidh a chur an greim fo chasaid gun do shàth iad tar-bhoireannach an leigeil mu sgaoil air urras fhad ’s a tha rannsachaidhean a’ leantainn.
Tha na poilis airson cluinntinn bho neach sam bith a bha ann an sgìre Rathad Norton oidhche Mhàirt an 2na den t-Iuchar. Faodar fios a chur thuca le bhith a’ cur fòn gu 101 agus an àireamh 123844 a thoirt seachad.
Murt ann am Alabama
Tha Poilis ann am Birmingham, Alabama a’ sireadh fireannaich an dèidh gun deach a bhràmar fhaighinn marbh.
Chaidh corp Deundray Dominique Cottrell, 31, lorg ann an seada aig taigh falamh.
Tha Poilis Bhirmingham air ràdh gu bheil iad den bheachd gun deach Cottrell a mhurt agus iad airson bruidhinn ris a bhràmar, Julian Morris, an dèidh fios fhaighinn gun robh e ga ghiùlan fhèin ann an dòigh amharasach an dèidh do Chottrell a dhol a dhìth.
Teiripe Iompachaidh
Tha an trì buidhnean slàinte-inntinn as motha ann an Èirinn, air iarraidh air Riaghaltas na h-Èireann casg a chur air na cleachdaidhean ris an canar “teiripe iompachaidh”.
Chruinnich Coláiste Síciatraithe na hÉireann, Cumann Síceolaithe Éireann agus Cumann na hÉireann um Chomhairleoireacht agus Síciteiripe ann am Baile Àtha Cliath an-diugh gus am meòmhrachan a shoidhnigeadh air beulaibh am Ministear airson Clann, Co-ionnannachd, Ciorraim, Amalachas agus Òigridh, Roderic O’Gorman.
Murt ann am Pennsylvania
Tha fireannach, 29, an greim ann am Pennsylvania fo chasaid gun do mhurt e deugaire tar-ghnèitheach.
Chaidh corp Pauly Likens, 14, a lorg faisg air stòr-uisge ann an Sharpsville agus bha iad air a bhith an dì-bhallachadh.
Dh’fhàg iad taigh charaid mu 9.30f air an 22na den t-Ògmhios agus sheall dealbhan CCTV gun deach iad a-steach car fhireannaich an ath latha.
Fhuair Poilis fios gun robh iad a dhìth air an 25mh den t-Ògmhios agus chaidh an corp a lorg an ath latha.
Chaidh dràibhear a’ chàr, DaShawn Watkins, a chur an greim fo chasaidean gun d’rinn e murt, ionnsaigh throm, droch-dhìol air corp agus gun do dh’fheuch e ri fhianais a mhilleadh.
Peanas-airgid air Grindr
Tha cùirt ann an Nirribhidh air peanas-airgid NOK 65m (mu £4.6m) a chur air Grindr an dèidh rannsachaidh a lorg gun an aplacaid suirghe air fiosrachadh dìomhar mu na cleachdaichean aca a reic ri chompanaidhean malairteach a reic am fiosrachadh ri chompanaidhean treas-phàrtaidh eile.
Chaidh a’ chùis-lagha a thogail le Comhairle Luchd-caitheimh Nirribhidh (Forbrukerrådet) a thagair gun robh Grindr air laghan prìobhaideachd na dùthcha a bhriseadh.
Lùth-chleasaichean tar-ghnèitheach
Tha Stàit West Virginia agus Stàit Idaho air iarraidh air Àrd-chùirt nan Stàitean Aonaichte co-dhùnadh mas urrainn do stàitean casgan a chur air lùth-chleasaichean tar-ghnèitheach bho fharpaisean spòrs nam ban.
• • •
Cuairt-litir #67
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Trans Kids Deserve Better
Bha Trans Kids Deserve Better, buidheann de luchd-iomairt tar-ghnèitheach, a’ togail fianais air leac taobh a-muigh prìomh-oifisean NHS Shasainn fad ceithir latha an t-seachdain seo.
Dhìrich dithis dheugaire an togalach Disathairne le bratach a leugh “We are not pawns for your politics” is bha iad a’ togail fianais an aghaidh co-dhùnadh NHS Shasainn a chur casg air a bhith a’ toirt seachad casgan inbhidheachd do dh’euslaintich ùra fo 18 bliadhna a dh’aois a chaidh ainmeachadh air thoiseach air an taghadh coitcheann.
Bha mòran luchd-iomairt òga eile air cruinneachadh gus taic a chur thuca thairis air an deireadh sheachdain.
Thàinig iad sìos Dimàirt an dèidh dhaibh fantainn air an leac fad 75 uair gu leth.
Rinn am podcast “What the Trans!?” agallamh còmhla riutha Diluain is faodar èisteachd ris gu h-ìosal.
Keir Starmer
Tha Keir Starmer air bruidhinn a-mach an aghaidh còraichean tar-ghnèitheach a-rithist is e air ràdh nach eil còir aig tar-bhoireannaich air àiteachan boireannach a chleachdadh fiù ’s ma tha GRC (Teisteanas Aithneachadh Gnè) aca.
Chaidh fhaighneachd air Starmer le pàipear-naidheachd an Times an dèidh don ùghdar JK Rowling sgrìobhadh air Twitter: “Do biological males with gender recognition certificates have the right to enter women-only spaces? It’s a simple yes/no question, @UKLabour. Given that you intend to make it easier for men to gain said piece of paper, women have the right to an answer.”
Thuirt Starmer nach eil an còir aca, nach bu chòir dha bhith aca agus gum bu chòir do dh’àiteachan boireannach a bhith air an dìon.
Tha an aithris as ùire seo air tighinn seachdain an dèidh dha ràdh gum bu chòir do thar-bhoireannaich seòmraichean-taoibh ospadail a chleachdadh seach uàrdan boireannach agus gu bheil e a’ cur taic ri casg a thathar a’ moladh a chur air sgoiltean ann an Sasainn bho bhith a’ teagaisg clann mu dhearbh-aithnean tar-ghnèitheach.
Ionnsaigh air tar-bhoireannach
Tha na poilis ann an Siorrachd Durham a’ rannsachadh eucoir gràin an dèidh ionnsaigh air tar-bhoireannach ann an Stockton oidhche Mhàirt.
Tha triùir bhalach, 12, 14 agus 16 bliadhna a dh’aois, an grèim fo chasaid gun do shàth iad i.
Fhuair am fulangaiche, a tha mu 20 bliadhna a dh’aois, leigheas aig an làrach an toiseach, mus robh i air a toirt a dh’ospadal airson obair-lannsa air a cas.
Tha na poilis airson cluinntinn bho neach sam bith a bha ann an sgìre Rathad Norton air an oidhche. Faodar fios a chur thuca le bhith a’ cur fòn gu 101 agus an àireamh 123844 a thoirt seachad.
Campa Samhraidh Chléire
Bidh Meitheal Chléire agus AerachAiteachGaelach a’ ruith campa cànain do luchd-labhairt LGDTC+ na Gaeilge an ath mhìos.
Thèid a chumail 12-18 An Lùnastal ann an Cléire, Corcaigh.
Tha barrachd fhiosrachaidh mu a dheidhinn air Eventbrite.
Zaniar Matapour
Chaidh am fireannach a thug ionnsaigh air club-oidhche LGBTQ+ ann an Oslo rè Mìos na Pròise 2022, a dhìteadh de mhurt agus de cheannairceachd.
Nochd Zaniar Matapour aig a’ chùirt Diardaoin far an deach binn phrìosain 30 bliadhna, agus 20 bliadhna air a’ char as lugha a chur air.
Bhàsaich dithis fhireannach 54 agus 60 bliadhna a dh’aois agus bha na ficheadan de dhaoine eile air an goirteachadh nuair a thug Matapour ionnsaigh air club-oidhche an London Pub.
Samuel Woodward
Chaidh fireannach ann an California a dhìteadh airson fear eile a mharbhadh an dèidh dhaibh coinneachadh tron aplacaid suirghe Tinder.
Chaidh Samuel Woodward, 26, a chur an greim ann an 2018 fo chasaid gun do mhurt e an t-oileanach Iùdhach gèidh, Blaze Bernstein, 19, an dèidh dhaibh coinneachadh aig Lake Forest.
Chaidh corp Bernstein a lorg ann an uaigh ao-domhain is e air a bhith a shàthadh 20 turas.
Chuala a’ chùirt gun robh Woodward ceangailte ri Atomwaffen Division, buidheann Nua-Nàsach ann an Teagsas agus gun robh air air fireannaich gèidh eile a thargaideachadh air Tinder roimhe.
Chaidh Woodward a dhìteadh de mhurt agus de bhith ri eucoir-gràin agus tha dùil gun tèid binn-bheatha sa phrìosan air 24 An Dàmhair.
A’ Chairtbheil
Tha reachdas ùr an aghaidh na coimhearsnachd LGDTC+ air dol tron a’ chiad leughadh aige ann am Pàrlamaid na Cairtbheile.
Chuireadh an reachdas casg air: cruinneachaidhean a bhrosnaicheadh càirdeasan aon-sheòrsach gu poblach; càraidean aon-sheòrsach bho bhith ag uchd-mhacachadh cloinne; luchd tar-ghnèitheach bho bhith ag atharrachadh an gnè air sgrìobhainnean oifigeil; agus “propaganda LGBT” ann an foghlam.
Tha pòsadh aon-sheòrsach mì-laghail fo bhun-reachd na dùthcha mar-thà.
Tha dùil gun tèid an reachdas dhan dàrna agus an uair sin an treasamh leughadh as t-fhoghar.
Istanbul
Thathar ag aithris gun deach 15 neach a chur an grèim ann an Istanbul Didòmhnaich an dèidh gun tug còrr is 100 neach pàirt ann an caismeachd pròise a bha air a thoirmeasg le Riaghaltas na Tuirce.
• • •
An Taghadh Coitcheann
Leis gu bheil na pàrtaidhean poileataigeach uile air na manifestothan aca fhoillseachadh a-nis, seo agaibh geàrr-chunntas air na tha iad ag ràdh mu chòraichean LGDTC+.
Pàrtaidh Uaine na h-Alba
Tha manifesto na h-Uainich ag ràdh:-
-
gun cuireadh iad casg air cleachdaidhean ris an caran “teiripe iompachaidh” a dh’fheuchas ri taobhadh-feise no dearbh-aithne gnè neach atharrachadh;
-
gun dèanadh iad cinnteach gum faigheadh pàrantan neo-bhìnearaidh is aon-sheòrsach cothrom air fòrladh pàrantachd;
-
gun iarradh iad air Rùnaire na Stàite airson Alba an casg a chaidh a chur air ath-leasachaidhean gnè an Alba a thogail;
-
gun seasadh iad an aghaidh oidhirpean gus Achd na Co-ionnannachd atharrachadh gus mìneachadh an fhacail “gnè” atharrachadh gu “gnè bith-eòlasach”;
-
agus gun cuireadh iad taic do dh’iomairtean airson còraichean bhoireannach agus LGDTCEN+ air feadh an t-saoghail.
Pàrtaidh Nàiseanta na h-Alba
Tha manifesto an SNP ag ràdh:-
-
gun seasadh iad airson còraichean a’ choimhearsnachd LGDTE;
-
agus gum biodh iad comasach còraichean LGDTE leasachadh le cumhachdan làn a thigeadh le neo-eisimeileachd.
Pàrtaidh Alba
Tha manifesto a’ phàrtaidh Alba ag ràdh:-
-
gun cuireadh iad dìon air còraichean bhoireannach, stèidhichte air gnè.
-
gu bheil iad airson seanadh shaoranach a chur air bhonn gus sgrùdadh a dhèanamh air an dòigh as fheàrr reachdas aithneachadh gnè ath-leasachadh.
Pàrtaidh Làbarach na h-Alba
Chan eil manifesto nan Làbaraich ag ràdh mòran mu chòraichean LGDTC+, ach thuirt iad gu bheil iad airson molaidhean na h-aithisge Cass a chur an gnìomh an Alba.
Tha manifesto Pàrtaidh Làbarach na Rìoghachd Aonaichte ag ràdh:-
-
gun cuireadh iad molaidhean na h-aithisge Cass an gnìomh;
-
gun dìonadh iad àitheachan aon-sheòrsach;
-
agus gun cuireadh iad casg air cleachdaidhean ris an canar “teiripe iompachaidh”.
Pàrtaidh Libearalach Dheamocratach na h-Alba
Tha manifesto nan Libearalaich ag ràdh:-
-
gun seasadh iad airson còraichean dhaoine ge b’e dè an taobhadh-feise no an dearbh-aithne gnè a th’ aca;
-
gun cuireadh iad casg air na cleachdaidhean ris an canar “teiripe iompachaidh”;
-
gun atharraicheadh iad reachdas aithneachadh gnè gus an riatanas mu fhianais-leigheis a thoirt às;
-
agus gun aithnicheadh iad dearbhan-aithne neo-bhìnearaidh ann an lagh.
Pàrtaidh Tòraidheach na h-Alba
Tha manifesto nan Toraidhean ag ràdh:-
-
gun cuireadh iad molaidhean na h-aithisg Cass a chur an gnìomh an Alba;
-
gun cuireadh iad an aghaidh oidhirp sam bith gus Bile na Aithne Gnè a thoirt air ais;
-
gun dèanadh iad soilleir ann an lagh gu bheil Achd na Co-ionnannachd stèidhichte air “gnè bith-eòlasach”;
-
agus gun dìonadh iad àiteachan aon-sheòrsach ann an toglaichean poblach.
Reform UK
Tha manifesto Reform UK ag ràdh:-
-
gun cuireadh iad casg air “ideòlas tar-ghnèitheach” ann am bun-sgoiltean agus ann an àrd-sgoiltean;
-
gun cuireadh iad casg air neach-cloinne bho bhith ag atharrachadh na riochdairean aca, no bhith a’ dèanamh eadar-ghluasad sòisealta aig an sgoil;
-
gun iarradh iad air sgoiltean innse do na pàrantan nuair a bhios neach-cloinne airson rudan mar seo a dhèanamh;
-
agus gun iarradh iad air sgoiltean àiteachan aon-sheòrsach a thabhann.
• • •
Cuairt-litir #66
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Dàta a’ Chunntais-shluaigh
Tha dàta a’ chunntais-shluaigh a’ sealltainn gu bheil còrr is 180,000 neach leasbach, gèidh no dà-sheòrsach, agus cha mhòr 20,000 neach tar-ghnèitheach a’ fuireach an Alba.
Thuirt 46% den 19,990 den fheadhainn thar-ghnèitheach gu bheil iad ag aithneachadh mar neo-bhìnearaidh.
Tha na figearan a’ ciallachadh gu bheil 0.44% de mhuinntir Alba nas sìne na 16 bliadhna tar-ghnèitheach, is 4% leasbach, gèidh no dà-sheòrsach.
Keir Starmer
Tha Keir Starmer air ràdh ann an agallamh le LBC gum bu chòir do thar-bhoireannaich seòmraichean-taoibh ospadail a chleachdadh seach uàrdan boireannach.
Thuirt e cuideachd ann an grunn agallamh madainn Dimàirt gu bheil e a’ cur taic ri casg a thathar a’ moladh a chur air sgoiltean ann an Sasainn bho bhith a’ teagaisg clann mu dhearbh-aithnean tar-ghnèitheach.
An Ruis
Tha neach-poilitigs anns an Ruis air ràdh ann an agallamh le Novaya Gazeta Baltiya gun deach sparradh orra dì-eadar-ghluasad a dhèanamh gus nach biodh iad air an cur gu ospadal-inntinn.
Dh’iarr iad air Àrd-chùirt na Ruise riaghladh nan robh còir aca a bhith beò mar neach tar-ghnèitheach, ach dhiùlt iad co-dhùnadh a dhèanamh.
Mathanas
Tha Ceann-suidhe nan Stàitean Aonaichte, Joe Biden, air mathanas oifigeil a thabhann do sheann-shaighdearan a chaidh a dhìteadh airson a bhith ri feise co-sheòrsach.
Bha feise co-sheòrsach co-aontachail mì-laghail am measg shaighdearan Feachdan Armaichte nan Stàitean Aonaichte eadar 1951 agus 2013.
Thathar a’ measadh gu bheil mu 2,000 sheann-shaighdear ann a tha ion-ròghnach air tagradh a chur a-steach airson mathanas agus cothrom fhaighinn air na sochairean air a bheil iad airidh.
Àrd-chùirt nan Stàitean Aonaichte
Tha Àrd-chùirt nan Stàitean Aonaichte air aontachadh riaghladh air cùis-lagha an aghaidh reachdas a rinn e mì-laghail ann an Tennessee cùram-slàinte daingneachadh gnè a thoirt seachad do dhaoine nas òige na 18 bliadhna a dh’aois.
Tha e air tighinn an dèidh do triùir dheugairean, na pàrantan aca agus dotair a bhios a’ toirt seachad cùram slàinte daingneachadh gnè cùis-lagha a thogail an aghaidh a’ chaisg.
Tha Rianachd a’ Chinn-shuidhe Biden agus grunn bhuidheann mheadaigeach air an taic a chur ris a’ chùis-lagha cuideachd.
Tha 25 stàit eile air casgan coltach ris an fhear aig Tennessee a chur an gnìomh.
‘S e seo a’ chiad tùras gum bi cothrom aig an Àrd-chùirt riaghladh air a’ chuspair seo agus mar sin bidh an co-dhùnadh aca air leth chudromach airson còraichean tar-ghnèitheach anns an SA.
• • •
Cuairt-litir #65
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Murt Peter Coshan
Tha Àrd-chùirt Ghlaschu air binn prìosain 22 bliadhna air a char as lugha a chur air fireannach a mhurt seann thidsear an dèidh coinneachadh ris tron aplacaid suirghe Grindr.
Chaidh Peter Coshan, 75, a mhurt le Paul McNaughton, 29, ann am flat ann an Leith san Dàmhair 2022.
Bha McNaughton air na deichead mhìltean nòt a ghoid bho Coshan bho thachair iad le chèile ann an 2021.
Chaidh McNaughton a chuideachadh leis a charaid-àrais, Paul Black, 65, gus corp Coshan a chur am falach, a chur ann am màileid agus fhàgail ri taobh balla ann an camas-rathaid ann an Northumberland.
Chaidh binn prìosain 5 bliadhna gu leth air a’ char as lugha air Black airson fiaradh a chur air cùrsa a’ cheartais.
Pròis Dhùn Dhè
Nochd fireannach aig Cùirt an t-Siorraim ann an Dùn Dè Diardaoin ann an co-cheangal ri eucoir gràin aig Pròis Dhùn Dhè Disathairne seo chaidh.
Ged nach deach aithris a dhèanamh dhaibh, thuirt Poileas Alba gun deach Darren Howey, 28, a chur an grèim an dèidh dhaibh dealbhan bhideo fhaicinn air na meadhanan sòisealta.
Faodar Howey a chluinntinn anns a’ bhideo, a chaidh a chlàradh leis fèin, is e ag èigheach “f***ing gay clown” agus “f*** you, you f***ing fa***t b*****d” air na daoine a tha an làthair aig an tachartas.
Thathar ag aithris gun deach Howey a dhìteadh roimhe airson eucoirean co-cheangailte ri drugaichean is gràin-cinnidh.
Thèid binn air san Lùnastal.
Blackburn
Tha na Poilis ann an Lancashire air ochdnar a chur ann grèim ann an co-cheangal ri ionnsaigh homafòbach air dithis taobh a-muigh stèisean trèana ann am Blackburn tràth madainn Dimàirt.
Bha an dithis air an goirteachadh mu na h-aodainnean.
Tha na Poilis air ràdh gu bheil iad fhathast ga rannsachadh agus iad airson cluinntinn bho neach sam bith aig a bheil fiosrachadh mu na thachair.
Pròis Kyiv
Bha còrr ‘s 500 neach an làthair aig tachartas pròise ann an Kyiv Didòmhnaich seo chaidh.
B’ e seo a’ chiad tachartas pròise a chaidh a chumail sa bhaile bho thug an Ruis làn ionnsaigh air an Ucràin ann an 2022.
Club Q
Tha Cùirt Sgìreil nan Stàitean Aonaichte air Anderson Lee Aldrich a dhìteadh de 74 cùisean de dh’eucoirean gràin agus 55 binnean-bheatha is 190 bliadhna a bharrachd sa phrìosan a chur air.
Bhàsaich còignear agus bha 19 neach eile air an goirteachadh nuair a thug Aldrich ionnsaigh air a’ chlub-oidhche LGDTC+, Club Q ann an Colorado Springs san t-Samhain, 2022.
Pròis Bhaltimore
Tha na Poilis air dearbhadh gur e mace a chaidh a leigeil a-mach san adhar aig tachartas pròise ann am Baltimore Disathairne a chaidh.
Mar a chaidh aithris roimhe bha grunn neach air an goirteachadh fhad ‘s a bha iad a’ teicheadh às a’ chaismeachd phròise an dèidh gun deach “stuth ceimigeach” a leigeil a-mach san adhar.
Tha na Poilis cuideachd air dearbhadh a-nis gun deach am mace a leigeil a-mach an dèidh argamaid eadar dà bhuidhean a bha an làthair aig an tachartas, agus nach e ionnsaigh a dh’aona ghnothaich air a’ chaismeachd a bh’ ann.
Stonewall
Tha na Poilis ann an Nuadh Eabhrac a’ rannsachadh an dèidh gun deach dà leth a dhèanamh air còrr ‘s 150 bratach-pròise a bha air an taisbeanadh taobh a-muigh Carragh-cuimhne Nàiseanta an Stonewall Inn.
‘S e seo an dàrna bliadhna an sreath a chèile gun deach an taisbeanadh a mhilleadh.
Tatù homafòbach
Tha lìg rugbaidh ann an Cronulla, New South Wales air air ràbhadh oifigeil a thoirt don chluicheadair, Joshua Taylor-Miles, air sgàth ‘s gu bheil tatù a leughas “eat sh*t f****t” air a shliasaid.
A bharrachd air sin tha tatù air a shliasaid eile a leughas “snort lines and f***”.
Chaidh aithris a dhèanamh dhan lìg an dèidh do luchd-leantainn na tatùthan fhaicinn ann an dealbhan a chaidh a cho-roinneadh air na meadhanan sòisealta aca.
Thathar ag aithris gun deach innse do Taylor-Miles ha na tatùthan a chur am falach nuair a bhios e a’ cluich air no gun rachadh casg a chur air bho bhith a’ cluich san NSWRL (New South Wales Rugby League).
Dùthaich nan Tàidh
Tha Seanadh Dùthaich nan Tàidh air ghabhail ri bile a nithear pòsadh co-sheòrsach laghail san dùthaich.
Bhòt 130 buill air a shon, 18 na aghaidh agus cha do bhòt ceathrar.
Thèid am bile a-nis air adhart dhan Rìgh Maha Vajiralongkorn airson soidhnigeadh ‘na lagh.
Naimibia
Tha Àrd-chùirt Naimibia air riaghladh gu bheil lagh a rinn feise co-sheòrsach mì-laghail neo-bhun-reachdail o chionn s gun robh e stèidhichte air claon-bhreith agus claonaidhean sòisealtasach.
• • •
Cuairt-litir #64
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Lynn Conway
Tha luaidh ga dhèanamh air Lynn Conway a th’ air bàsachadh aig aois 86.
B’ e eòlaiche coimpiutaireachd, einnseanair-dealain agus gnìomhaiche airson còraichean tar-ghnèitheach a bh’ innte.
Dh’obraich i aig IBM anns na 1960an, ach chaidh a chur às a dreuchd ann an 1968 nuair a dh’ainmich i gun robh i tar-ghnèitheach agus gun robh i airson eadar-ghluasad a dhèanamh.
Rinn i an uair sin eadar-ghluasad ann an uaigneas, mus do thoisich i ag obair aig Xerox PARC ann an 1973.
Bha an obair a rinn i aig IBM agus Xerox PARC air leth chudromach ann a bhith a’ dèanamh e nas fhasa meanbh-sgealban (microchips) a dhealbhadh agus a shaothrachadh.
Ann an 1985 chaidh i na ollamh ann an einnseanaireachd-dealain agus saidheans-compiutaireachd aig Oilthigh Mhichigan gus an do leig i dheth a dreuchd ann an 1998.
Thàinig i a-mach mar thar-ghnèitheach ann an 1999/2000 agus thoisich i a’ sgrìobhadh mu a beatha air an làrach-lìn aice. Cuideachd chleachd i an làrach-lìn aice gus naidheachdan agus goireasan a cho-roinneadh le luchd tar-ghnèitheach eile.
Rinn IBM leisgeul oifigeil dhi ann an 2020, agus dh’aidich iad gun robh an obair aice air leth chudromach dhan t-soirbheas aca.
Gnè
Tha cunntas-bheachd YouGov a’ sealltainn gu bheil an dàrna leth de mhuinntir Bhreatainn airson Achd na Co-ionnannachd atharrachadh gus am biodh gnè air a mhìneachadh mar ghnè bhith-eòlasach.
Thuirt 23% de dh’fhreagraiche gu bheil iad na aghaidh, agus thuirt 27% gu bheil iad eadar an dà bharail.
Sheall na toraidhean sgaradh mòr eadar na buidhnean-aoise ge-tà: tha 63% de dhaoine nas sìne na 65+ airson an atharrachadh is 12% na aghaidh, ach chan eil ach 31% de dhaoine eadar 18 & 24 bliadhna a dh’aois air a shon is 43% dhiubh na aghaidh.
Tachartas pròise Shifnal
Chaidh ainmeachadh gun tèid a’ chiad tachartas pròise a-riamh ann an Shifnal a chumail ann an Eaglais Naoimh Anndra.
Thuirt eagraiche an tachartais gu bheil e airson ‘s gum bi daoine LGDTC+ a’ faireachdainn gu bheil an eaglais a’ cur fàilte orra agus gu bheil e airson seann chnapan-starra is gnàth-ìomhaighean a bhriseadh sìos.
Thèid an tachartas a chumail Didòmhnaich 23mh den Ògmhios aig 6f.
Weston-super-Mare
Tha na Poilis ann an Weston-super-Mare a’ rannsachadh eucoir-gràin an dèidh gun deach bratach pròise a bha taobh a-muigh oifisean comhairle a’ bhaile a thoirt sìos agus a chur ‘na theine.
Thuirt iad gun do thachair e eadar 5f Oidhche Chiadain agus 7:30m Diardaoin.
Chaidh bratach pròise ùr a chur an àrd ‘na àite.
Eaglais Meathodach na h-Èireann
Tha Eaglais Meathodach na h-Èireann air leisgeul a dhèanamh airson fàilligeadh taic a thoirt do bhuill a’ choimhearsnachd LGDTC+ is na teaghlaichean aca agus iad air oillt cho-sheòrsach de gach seòrsa a chàineadh.
Tha iad cuideachd air ràdh ge-tà gur e aonadh eadar fear agus bean a th’ ann am pòsadh agus nach lean iad an Eaglais Meathodach ann am Breatainn le bhith a’ ceadachadh pòsadh aon-sheòrsach.
Dublin Gay Men’s Choir
Tha Eaglais Chaitligeach Naoimh Anndra ann am Baile Àtha Cliath air cuirm-chiùil le Dublin Gay Men’s Chorus a chur dheth is iad air ràdh gu bheil an tachartas a’ dol an agaidh misean na h-Eaglais Caitligiche.
Chaidh an tachartas ainmeachadh sa Ghiblean agus bha dùil gun tèid air adhart e 23mh den Ògmhios.
Thuirt a’ chòisir gu bheil leth-iongnadh orra, gu h-àraid air sgàth ‘s gun do chùm còisir LGDTC+ eile cuirm-chiùil san aon eaglais an-uiridh.
Pròis Bhaltimore
Chaidh grunn neach a ghoirteachadh ann am Baltimore an-dè fhad ‘s a bha iad a’ teicheadh às a’ chaismeachd phròise an dèidh gun deach “stuth ceimigeach” a leigeil a-mach san adhar.
Dhearbh na Poilis gu bheil iad ga rannsachadh, ach nach eil fianais sam bith ann aig an àm seo gur e ionnsaigh a dh’aona ghnothaich air a’ chaismeachd a bh’ ann.
Florida
Tha Cùirt Sgìreil nan Stàitean Aonaichte air casg seasmhach a chur air reachdas Florida a rinn e mì-laghail cùram slàinte daingneachadh gnè a thoirt seachad do luchd tar-ghnèitheach.
Riagail a’ chùirt gun robh an reachdas neo-bhun-reachdail agus e a’ dèanamh leth-bhreith air luchd tar-ghnèitheach.
Ann an riaghladh sgrìobhte, thuirt am Britheamh Robert Hinkle: “Transgender opponents are of course free to hold their beliefs. But they are not free to discriminate against transgender individuals just for being transgender.”
Lean e, “In time, discrimination against transgender individuals will diminish, just as racism and misogyny have diminished. To paraphrase a civil-rights advocate from an earlier time, the arc of the moral universe is long, but it bends toward justice.”
Tha rianachd Riaghladair Ron DeSantis air ràdh ge-tà gun dèan iad ath-thagradh an aghaidh an riaghladh.
Oregon
Tha na Poilis ann an Oregon air mion-aoiseach a chur a grèim fo chasaid gun do chur iad gunna BB ri uinneag an leabhar-lann ionadail air sgàth ‘s gun robh brathach-pròise innte.
• • •
Cuairt-litir #63
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Achd na Co-ionnanachd
Tha na Tòraidhean air ràdh gun atharraich iad Achd na Co-Ionnanachd ma bhuannaicheas iad an taghadh coitcheann an ath mhìos.
Thuirt iad gu bheil iad airson dìon laghail a chur air a’ ghnè bhoireann is a dhèanamh nas fhasa do bhuidhnean stad a chur air tar-bhoireannaich bho bhith a’ cleachdadh ghoireasan bhoireannach a leithid taighean-beaga, seòmraichean-locair agus àitichean-dìon.
Tha iad cuideachd air ràdh gun cùm Westminster smachd air gnothaichean co-cheangailte ri gnè agus co-ionnanachd seach na Riaghaltasan tiomnaichte ann an Alba, anns a’ Chuimrigh agus ann an Èirinn a Tuath.
Chan eil e soilleir ciamar a chuireadh am poileasaidh an gnìomh gu pragtaigeach - cha robh freagairt aig Kemi Badenoch nuair dh’iarr am preasantair BBC Radio 4, Mishal Husain, oirre grunn thursan Diluain nam biodh teisteanas breith thùsail riatanach gus cothrom fhaighinn air goireasan boireannach.
Chan eil e soilleir nas motha nam biodh na h-atharrachaidhean a’ toirmeasg tar-fhireannaich bho bhith a’ cleachdadh ghoireasan fhireannach.
Waterstones
Tha India Willoughby air Watersones a dhubh-chàineadh airson leabhhar de dh’aistean ghnè-chriotaigeach a bhrosnachadh aon latha an dèidh dhaibh Mìos na Pròise a chomharrachadh.
Cho-roinn Waterstones post Disathairne gus Mìos na Pròise a chomharrachadh anns a bhrosnaich cruinneachadh de leabhraichean le ùghdarran LGDTC+ - nam measg bha Pageboy leis an cleasaiche thar-ghnèitheach, Elliot Page; Transitional le Munroe Bergdorf; agus Who’s Afraid of Gender? le Judith Butler.
Ach, cho-roinn iad an uair sin liosta de leabhraichean ùra Didòmhnaich a thug a-steach The Women Who Wouldn’t Wheesht - cruinneachadh de dh’aistean le iomairtichean gnè-chriotaigeach a leithid JK Rowling agus Joanna Cherry.
Mermaids Èireann a Tuath
Tha an carthannas Mermaids air ionad ùr fhosgladh ann am Beul Feirste gus àite sàbhailte a chruthachadh do dh’òigridh thar-ghnèitheach is neo-bhìnearaidh agus na teaghlaichean aca.
Colorado
Tha Pàrtaidh Poblachdach Cholorado air post-d a chur a-mach dhan bhuill aca anns an tug iad iomradh air daoine LGDTC+ mar “godless groomers”, “evil” agus “woke creeps” a tha airson cron a dhèanamh air clann.
An lùib a’ phuist-d (a ghabhas a leughadh gu h-ìosal), tha bhideo air a bheil “God Hates Flags”, a chaidh a thogail bho searmon a rinn An t-Aoghaire Mark Driscoll an aghaidh daoine LGDTC+.
The month of June has arrived and, once again, the godless groomers in our society want to attack what is decent, holy, and righteous so they can ultimately harm our children.
Above is a great sermon from Pastor Mark Driscoll titled: Black and White in a Rainbow World.
(Warning: Don't watch if you are easily triggered, or intolerant of the Gospel of Jesus Christ like Kyle Clark from 9 News.)
Here's a short excerpt from the sermon to consider:
"Progressivism is a demonic lie. God doesn't need to improve his message because he got it right the first time. Unlike those of us who think that there needs to be progress, there doesn't need to be progress, there needs to be obedience to perfection... and that is the Word of God."
Throughout June we will share more sermons from Pastor Driscoll and encourage all to listen to his messages and resist the evil that is trying to indoctrinate children, undermine parents, and harm families.
Thank you, and as we said last year, together, we can protect our children and future… but only if you get involved and defend the most vulnerable in our society from these woke creeps.
For our children,
Dave Williams
Chairman, Colorado Republicans
P.S. Feel free to read our email from last year below and, remember... God hate Pride.
A bharrachd air sin tha iad cuideachd air post a cho-roinneadh air na meadhanan sòisealta aca anns a bheil iad a’ gairm air an luchd-leantainn aca brataichean pròise a losgadh.
Minnesota
Tha na Poilis ann am Minnetonka, Minnesota a rannsachadh eucoir-gràin an dèidh gun tug àrd-sgoilear ionnsaigh air oileanach tar-ghnèitheach ann an taigh-beag.
Bha Cobalt Sovereign, 17, anns an taigh-beag fireannach nuair a thug balach dòrn mun aodann dhi. Chiall i cùl-fhiacaill agus chaidh a peirceall a bhriseadh ann an dà àite.
‘S e tar-chaileag a th’ ann an Sovereign, ach thuirt i gun do chleachd i an taigh-beag fireannach air sgàth ‘s gum b’ fheàrr leatha faireachdainn mì-chomhfhurtail an àite a bhith a’ dèanamh daoine eile mì-chomhfhurtail le bhith a’ cleachdadh na taighe-bhig bhoireannaich.
Missouri
Tha cùirt ann am Missouri air riaghladh gum feum Sgìre Sgoile Blue Springs $4m a phàigheadh do dh’oileanach tar-ghnèitheach an dèidh dhaibh casg a chur air bho bhith a’ cleachdadh an t-seòmair-locair fhireannach.
Texas
Tha ceathrar dheugaire an grèim ann an Killeen, Texas fo chasaid gun do chleachd iad an aplacaid suirghe Grindr gus fireannach a dhochainn agus a robaigeadh ri aghaidh gunna.
Chaidh Dusty Andrew Bailey Jr., 17, agus an triùir eile, nach gabh ainmeachadh air sgàth ‘s gu bheil iad 16, 16 agus 15 bliadhna a dh’aois, a chur an grèim an dèidh gun do tharraing am fulangaiche aire oifigeir-phoilis a bha a’ dràibheadh seachad orra.
Coirèa a Deas
Nochd na deicheadan mhìltean airson caismeachd pròise ann an Seoul Distathairne ged nach dh’fhuair an caismeachd cead a dhol air adhart.
Thathar a’ measadh gun robh mu 150,000 neach an làthair aig an tachartas a chaidh a dhiùltadh le ùghdarrasan a’ bhaile airson an dàrna bhliadhna.
Duolingo
Tha Duolingo air susbaint LGDTC+ a thoirt às an aplacaid anns an Ruis.
Tha e a’ tighinn as dèidh gun do dh’iarr riaghlaiche an eadar-lìn, Roskomnadzor, orra sgrùdadh a dhèanamh air an t-susbaint gus susbaint ris an canar “propaganda LGDT” a thoirt às.
Dh’fhaodadh gun tèid peanas-airgid suas ri 4 millean rùbal (mu £35,000) air companaidh sam bith a bhrosnaicheas “propaganda” LGDTC+ san dùthaich.
Thuirt neach-labhairt Duolingo gu bheil iad a’ cur taic ri chòraichean LGDTC+, ach gu bheil lagh na Ruise gan casg bho shusbaint àraidh a ghabhail a-steach.
L’App
Tha an iomairtiche gnè-chriotaigeach Jenny Watson air innse do phàipear-naidheachd am Mail on Sunday gun cleachd L’App, an aplacaid suirghe leasbach aice, teicneòlas aithneachaidh-aodainn gus casg a chur air tar-bhoireannaich bho bhith a’ clàradh cunntasan.
Thuirt i gu bheil “leasbaich feumach air aplacaid as urrainn dhaibh a chleachdadh gun a bhith a’ faighinn teachdaireachdan bho fhireannaich a tha ag aithneachadh mar thar-ghnèitheach”.
Queer Running Club
Tha Queer Running Club, air maoineachadh luach £5,000 fhaighinn bho Phride in London.
Thuirt an cluba-ruith gu bheil iad airson na duilgheadasan a tha ro lùth-chleasaichean tar-ghnèitheach is neo-bhìnearaidh a shoillseachadh agus gun cleachd iad am maoineachadh gus rèisean 5 cilemeatair agus 10 cileameatair a chur air dòigh an ath mhìos ann an Hackney.
• • •
Cuairt-litir #62
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Poileas Alba
Dh’fhoillsich Àrd-chonstabal Poileas Alba, Jo Farrell, litir Diciadain anns an tug i leisgeul dhan a’ choimhearsnachd LGDTC+ airson a’ phàirt a bh’ aig Poileas Alba ann a bhith a’ dèanamh gaol agus dearbh-aithne ‘nan eucoirean.
Rinn Farrell leisgeul airson na h-ana-ceartasan agus leth-bhreith a tha an coimhearsnachd LGDTC+ air a fhulang o chionn ghoirid agus gu h-eachdraidheil.
Thuirt i gur e an t-amas aice seirbheis a chruthachadh a tha saor bho leth-bhreith agus gum bi oifigearan-ceangail shònraichte air an toirt a-steach a-rithist gus obrachadh còmhla ri coimhearsnachd LGDTC+ na h-Alba.
Casgan-inbhidheachd
Dh’ainmich Riaghaltas na Rìoghachd Aonaichte Diciadain nach fhaod casgan-inbhidheachd a bhith air an toirt do dh’euslaintich ùra fo aois 18 bliadhna a dh’ aois ann an Alba, ann an Sasainn no anns a’ Chuimrigh.
Tha an riaghladh, a thèid a chur an-gnìomh 3mh den t-Ògmhios fad trì mìos, a’ cur casg air dotairean prìobhaideach anns an Rìoghachd Aonaichte agus an fheadhainn a tha clàraichte ann an Coimhearsnachd Eaconomach na h-Eòrpa no anns an Eilbheis bho bhith a’ toirt seachad cungaidhean-leighis anns a bheil buserelin, gonadorelin, goserelin, leuprorelin acetate, nafarelin, no triptorelin do dh’euslaintich ùra.
Wes Streeting
Tha Rùnaire Dùbhlanach na Slàinte, Wes Streeting, air ràdh nach bu chòirear measadh gur e dalm-bheachdairean a tha ann an daoine gnè-chriotaigeach.
Bha Streeting a’ bruidhinn aif fèis litreachais is ealain ann an Hay-on-Wye nuair a thuirt e gu bheil e “ceàrr” agus “neo-tharbhach” gam measadh mar “dalm-bheachdairean” no “claon-bhreitheach”.
B’ àbhaist Streeting a bhith na oifigear àrd-rangach aig a’ charthannas LGDTC+, Stonewall.
Chaidh a dhubh-chàineadh anns a’ Ghiblean an dèidh dha ràdh gu bheil a’ gabhail aithreachas gun d’ thuirt e roimhe gur e “fireannaich a th’ anns an tar-fhireannaich, boireannaich a th’ anns an tar-bhoireannaich”.
Christian Concern
Tha am buidheann Christian Concern air athchuinge a thòiseachadh an aghaidh taisbeanadh de bhrataichean pròise adhartach air Sràid Regent ann an Lunnainn.
‘S e a th’ ann am bratach pròise adhartach brathach pròise eile a tha a’ toirt a-steach dathan a bharrachd gus daoine eadar-sheòrsach, tar-ghnèitheach agus daoine LGDTC+ de dhath a riochdachadh.
Tha am buidhean a’ tagairt gu bheil na brataichean a’ brosnachadh ideòlas tar-ghnèitheach a tha a’ dèanamh cron air clann.
Massachusetts
Bhòt Bòrd Cathair Williamstown 175-90 gus a dhèanamh laghail brataichean pròise adhartach a chur an àrd air toglaichean poblach.
Tennessee
Shoidhnig Riaghladair Thennesse, Bill Lee, bile ùr ‘na lagh Dimàirt a tha a’ dèanamh e mì-laghail do dh’inbhich mion-aoisich a chuideachadh a shiubhail taobh a-muigh na stàite gus cothrom fhaighinn air cùram slàinte daingneachadh gnè.
Thèid an lagh ùr a chur an gnìomh 1d An t-Iuchar agus dh’fhaodadh gun tèid binn 1 bhliadhna sa phrìosain air neach sam bith a thèid a dhìteadh fodha.
Miss Universe
Tha co-shealbhadair a’ bhuidhinn a bhios a’ ruith an taisbeanaidh, Miss Universe, Anne Jakapong Jakrajutatip, air ràdh gum faod tar-bhoireannaich, boireannaich phosta agus boireannaich dhealaichte farpais san taisbeanadh ach nach fhaod iar a bhuannachadh.
Thàinig beachd Jakrajutatup, a tha na tar-bhoireannach, am follais an dèidh gun do leig cuideigin gun ainm air èalaidh clàradh de choinneamh aig an robh buill-bùird a’ bhuidhinn.
• • •
Cuairt-litir #61
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Cardiff
Tha na Poilis ann an Cardiff a’ rannsachadh eucoir gràin homafòbach as dèidh gun deach ionnsaigh a thoirt air neach-stèidheachaidh an iomairt Drag Queen Story Hour UK, Sebastian Samuel, agus a bhràmair.
Dh’fhàg iad ionad, far an do dh’iarr Samual air a bhràmair a phòsadh, mu 3m Didòmhnaich, nuair a thoisich dithis fhireannach a’ tilgeil slugaidhean homafòbach orra. Chaidh Samuel an uair sin a chur ann am paisean.
Tha na Poilis airson ’s gun cur neach sam bith aig a bheil fiosrachadh mu na thachair fios a chur thuca air 101 agus an àireamh 2400163187 a thoirt seachad.
Foghlam
Tha cunntas-beachd ùr YouGov a’ sealltainn gu bheil a’ mhòr-chuid dhen bheachd gum bu chòir do sgoilearan ionnsachadh mu dheidhinn dearbhan-aithne gnè eadar-dhealaichte.
Thuirt 61% de dhaoine gum bu chòir do sgoilearan ionnsachadh gun urrainn do neach an gnè atharrachadh, agus thuirt 60% gum bu chòir dhaibh ionnsachadh gu bheil daoine neo-bhìnearaidh ann.
Carolina a Deas
Tha Riaghladair Carolina a Deas, Henry McMaster, air bile a shoidhnigeadh ‘na lagh a tha a’ cur casg air dotairean bho bhith a’ toirt seachad cùram slàinte daingneachadh gnè do neach sam bith fo aois 18 bliadhna a dh’aois.
Fon lagh ùr, a chaidh a chur an gnìomh sa bhad, bidh e cuideachd mì-laghail maoineachadh poblach a chleachdadh gus cùram-slàinte daingneachadh gnè a thabhann do neach sam bith ge bith dè an aois a tha iad.
Tha an lagh cuideachd a’ cur air nursaichean, tidsearan agus rianairean sgoile innse do phàrantan ma tha oileanach airson eadar-ghluasad a dhèanamh aig an sgoile.
Illinois
Ghabh buill dà thaigh Stàite na h-Illinois ri bile ùr a leigeas le neach tar-ghnèitheach an ainm no an gnè a th’ air teisteanasan-breith no ceadan-dràibhidh a fhuair iad taobh a-muigh na stàite a cheartachadh. Thèid am bile a-nis air adhart gu Riaghladair J.B. Pritzker airson soidhnigeadh ’na lagh.
Minnesota
Shoidhnig Riaghladair Mhinnesota, Tim Walz, lagh ùr a tha a’ cur casg air sgoiltean, colaistean agus leabhar-lannan bho bhith a’ cur casg air leabhraichean LGDTC+.
Buenos Aires
Tha luchd-casaid ann am Buenos Aires air casaid muirt a chur às leth deichnear oifigear-poilis as dèidh mar a chaidh tar-bhoireannach, Sofia Fernández, fhaighinn marbh fhad ’s a bha i ann an grèim.
Thuirt na Poilis an tòiseach gun d’fhuair Fernández, 39, bàs aithghearr às dèidh clisgidh-chridhe, ach thuirt iad an dèidh seo gun do chur i làmh na beatha fèin. Lorg an sgrùdadh ge-tà gun deach a mùchadh às dèidh dhi air a bhith air a bualadh.
Seòladh
Tha buidheann-riaghlaidh seòladh na cruinne air bhòtadh gus casg a chur air tar-bhoireannaich bho fharpaisean nam ban nan deach iad tro dh’inbhidheachd mar fhireannach no ma tha ìre teisteostaroin aca a tha nas àirde na 2.5 nanomole anns gach liotair.
• • •
Cuairt-litir #60
Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.
Alba
Tha Prìomh Mhinistear ùr na h-Alba, John Swinney, air dearbhadh ann an agallamh le BBC Radio Scotland gu bheil an riaghaltas fhathast airson casg a chur air cleachdaidhean ris an canar “teiripe iompachaidh”.
Thuirt e ge-tà gum feum iad smaoineachadh air freagairtean a’ cho-chomhairleachaidh agus air toraidhean an sgrùdaidh a rinn Dr Hilary Cass air cùram slàinte daingneachadh gnè a tha NHS Shasainn a’ toirt seachad do dhaoine òga mus tèid iad air adhart.
Dhearbh Swinney cuideachd san agallamh gu bheil e a’ creidsinn gur e boireannaich a th’ ann an tar-bhoireannaich.
Sruighlea
Chaidh ainmeachadh gun tèid tachartas pròise a chumail ann an Sruighlea airson a’ chiad turas.
Tha eagraichean air iomairt maoineachadh-sluaigh a thòiseachadh airson an tachartas a thèid a chumail Disathairne 21d latha den t-Sultain.
Foghlam
Dh’ainmich an Riaghaltas Diardaoin, gun tèid sgoiltean ann an Sasainn air an casg bho bhith a’ teagaisg sgoilearan nas òige na 9 bliadhna a dh’aois mu fheise, agus sgoilearan gu lèir mu dhearbhan-aithne gnè.
Lichtenstein
Bhòt buill pàrlamaid Lichtenstein 24-1 airson pòsadh aon-sheòrsach a dhèanamh laghail. Tha dùil gun tèid an lagh ùr a chur an gnìomh 1d Am Faoilleach 2025.
Mississippi
Tha Riaghladair Mhississippi, Tate Reeves, air bile a shoidhnigeadh ‘na lagh a chuireas casg air luchd tar-ghnèitheach bho bhith a’ cleachdadh na taighean-beaga a tha a’ co-fhreagairt ris an dearbh-aithne gnè aca.
Buenos Aires
Tha triùir bhoireannach leasbach air bàsachadh agus tè eile san ospadal as dèidh gun deach an taigh-aoigheachd anns an robh iad a’ fuireach a chur ‘na theine.
Thuirt na Poilis gun deach an taigh a’ losgadh le ragaichean a bha air am bogadh le stuth lasrachd agus gu bheil iad air fireannach, 62, a bha cuideachd a’ fuireach san taigh-aoigheachd a chur an grèim.