Cuairt-litir #13
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Bile Ath-leasachadh Aithneachadh Gnè
Dhearbh Seirbheis Chùirte na h-Alba gun tèid èisteachd a chumail aig Cùirt an t-Seisein ann an Dùn Èideann bho 19mh-21d den t-Sultain mun bhacadh a chur Riaghaltas na Rìoghachd Aonaichte air bile ath-leasachadh gnè Riaghaltas na h-Alba.
Chaidh am bile a dhèanadh e nas fhasa do luchd tar-ghnèitheach teisteanas aithneachadh gnè fhaighinn tro Phàrlamaid na h-Alba san Dùbhlachd, ach chleachd Alasdair Jack, Rùnaire Stàite na h-Alba, Earrann 35 de dh’Achd na h-Alba gus bacadh a chur oirre bho bhith a’ tighinn ‘na lagh san Fhaoilleach.
Bratach pròise air a ghoid
Tha na Poilis a’ sireadh fiosrachaidh as dèidh gun deach bratach pròise a ghoid bho sgìre Rathad Mhoireastain ann an Eilginn eadar 12m agus 4.30m Diardaoin 22na den Ògmhios.
Ma tha fiosrachadh aig neach sam bith bu chòir fios a chur gu Poileas Alba air 101, le àireamh na cùise, 0647, Diardaoin 22na den Ògmhios 2023.
No faodar fios a chur gu Crimestoppers gu dìomhair air 0800 555 111.
Cùis-lagha an-aghaidh UCU
Tha riochdairean an fhilm Adult Human Female air iomairt maoineachadh-sluaigh a chur air bhog airson cùirt-lagha a thoirt an-aghaidh UCU Dhùn Èideann (Edinburgh University and College Union) as dèidh gun deach dà thaisbeanadh den fhilm aca a chur dheth air sgàth gearanan bho luchd-iomairt chòraichean tar-ghnèitheach.
Club Q
Chaidh còig binnean-beatha agus 2,208 bliadhna a bharrachd a chur air Anderson Lee Aldirch airson còignear a mhurt agus 25 neach eile a leòn an-uiridh ann am mòr-losgadh aig a’ chlub-oidhche LGDTC+, Club Q, ann an Colorado Springs.
An Tuirc
Chaidh còrr ’s 100 neach a chur an grèim san Tuirc air an deireadh sheachdain as dèidh dhaibh caismeachdan pròise a toirmisgte fhrithealachadh. ann an Izmir agus Istanbul.
• • •
Cuairt-litir #12
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Suirbhidh Riaghaltas na h-Alba
Tha Riaghaltas na h-Alba a’ ruith suirbhidh gu 14mh den Iuchar ’s iad airson beachdan luchd neo-bhìnearaidh a chluinntinn air na planaichean a th’ aca gus co-ionnannachd neo-bhìnearaidh a leasachadh.
Faodar a lorg aig https://www.surveymonkey.co.uk/r/nonbeapsgfg23.
Suirbhidh Scottish Trans
Tha an carthannas Scottish Trans a’ ruith suirbhidh gu 7mh den Iuchar ‘s iad airson gnàth-eòlasan luchd tar-ghnèitheach is neo-bhìnearaidh a tha a’ fuireach ann an Alba a chluinntinn.
Faodar a lorg aig: http://surveymonkey.co.uk/r/scotexptransnonb23.
Leabhair Pháistí Éireann
Tha an carthannas Leabhair Pháistí Éireann air liosta de còrr ’s 200 leabhar LGDTC+ do chloinne is dhaoine òga a cruinneachadh gus Mìos na Pròise a chomharrachadh.
Nam measg tha ann leabhar Croí an Teaghlaigh an Grá le Sophie Beer a chaidh eadar-theangachadh chun a’ Ghaeilge le Shanna Ní Rabhartaigh agus Gillian Nic Iomhain.
Faodar an liosta iomlan a lorg aig: https://childrensbooksireland.ie/our-recommendations/pride-reading-guide.
Ceinia
Thathar ag aithris gu bheil dreachd lagh aig Riaghaltas Cheinia a chuireadh binn phrìosain co-dhiù 5 bliadhna air neach sam bith a bhrosnaicheas co-sheòrsachd, binn phrìosain 10 bliadhna airson a bhith ri feise co-sheòrsach agus binn bhàis airson “aggravated homosexuality”.
Chaidh lagh coltach ri seo a chur an gnìomh ann an Uganda sa Chèitean agus thathar ag aithris gu bheil Sudàn a Deas agus An Tansan ag ullachadh laghan coltach ri seo cuideachd.
Camarun
Tha Riaghaltas Chamarun a’ feuchainn ri bacadh a chur air an Tosgaire Fraingeach airson Còraichean LGDTC+ bho bhith a’ siubhal dhan dhùthaich gus bruidhinn aig co-labhairt air gnè agus taobhadh feise.
Tha dùil gun tadhal an Tosgaire Jean-Marc Berthon air an dùthaich bho 27 Ògmhios gu 1 Iuchar airson an tachartais ach tha Riaghaltas Chamarun air ràdh gu bheil cuspairean a’ cho-labhairt laghan na dùthaich an-aghaidh co-sheòrsachd.
NHL
Tha an Lìg Hocaidh Nàiseanta (NHL) air casg a chuir air cluicheadairean bho bhith a’ cur air geansaidhean pròise rè blàthachaidhean
Thuirt Coimiseanair an NHL, Gary Bettman, gun robh na geansaidhean a’ toirt aire air falbh bhon a’ gheama ach gum bi geansaidhean pròise fhathast ceadaichte aig geamaichean sònraichte air oidhchean pròise.
• • •
Cuairt-litir #11
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Teiripe iompachaidh
Thathar ag aithris gu bheil dreachd reachdais a chuireas casg air teiripe iompachaidh deiseil ’s e a’ feitheamh ri aonta Rishi Sunak.
Thathar a’ tuigsinn ge-tà gu bheil beàrn laghail ann a cheadachas teiripe iompachaidh a dhèanamh air inbhich a tha air aontachadh ris.
Chaidh an casg ainmeachadh o thùs ann an 2018 le Theresa May, ach chaidh a thilgeil a-mach le Boris Johnson anns a’ Mhàrt 2022.
Rinn Johnson car iomlan ann an nas lugha na aon latha ach thuirt e nach toireadh an reachdas dìon do luchd thar-ghnèitheach.
Chaidh ainmeachadh le Rùnaire a’ Chultair, Michelle Donelan, san Fhaoilleach 2023 ge-tà gun toireadh an reachdas dìon do luchd tar-ghnèitheach cuideachd.
Dh’ainmich Elon Musk Diciadain gur e faclan tàireil an th’ ann an “cis” agus “cisgender” agus gum biodh buaidh air cleachdaichean a bhios a’ cuimseachadh air cunntasan eile leis na faclan seo.
Thathar a’ cleachdadh am facal “cisgender”, no cios-ghnèitheach anns a’ Ghàidhlig, gus iomradh a thoirt air neach aig a bheil gnè a tha a’ freagairt air a’ ghnè bhith-eòlasach aca.
Bha Musk a’ freagairt tuèit bhon chleachdaiche James Esses, a thuirt gun robh e air a chuimseachadh as dèidh dha ràdh gu bheil am facal “cis” ga fhàgail a’ faireachdainn “neo-shàbhailte” agus gur e dalm-bheachdaiche a th’ ann an neach sam bith a chleachdas e gus iomradh a thoirt air-san.
An Eadailt
Dh’fhaodadh gun tèid ainmean iomadh màthair leasbach san Eadailt an cur à teisteanasan-breithe a’ chuid chloinne as dèidh do bhàillidh ann an ceann tuath na dùthaich iarraidh air britheamhan ainmean mhàthraichean nach do rugadh an cuid cloinne a chur às.
Tha dùil gun riaghail cùirt air a’ chùis nas fhaide air adhart dhan bhliadhna.
Florida
Riaghail am Britheamh Robert Hinkle Diciadain gun robh reachdas a chuireadh casg air àrachas-slàinte do luchd tar-ghnèitheach ann am Florida neo-bhun-reachdail.
Arkansas
Riaghail am Britheamh Jay Moody Dimàirt gun robh reachdas a chuireadh casg air cùram-slàinte daingneachadh gnè do luchd thar-ghnèitheach fo 18 bliadhna a dh’aois neo-bhun-reachdail.
• • •
Èirinn: Dìtidhean eachdraidheil ’son co-sheòrsachd gan cur an dàrna taobh
Dh’ainmich Riaghaltas na h-Èireann Dimàirt gun cur iad dìtidhean de dh’fhireannaich a chaidh a chur fo chasaid airson feise co-aontachail le fireannach eile fo laghan eachdraidheil an dàrna taobh.
Chaidh feise co-sheòrsach a thoirmeasg an Èirinn ann an 1861 fo laghan Shasainn nach deach an tilgeil a-mach gu 1993 agus chaidh co-dhiù 941 fireannaich a dhìteadh mus deach a dhì-eucoireachadh.
Tha còig bliadhna ann bho thug an Riaghaltas a leisgeul gu h-oifigeil dha na fireannaich a dh’fhulaing leis gun robh an taobhadh feise aca an aghaidh an lagh.
Chaidh ainmeachadh cuideachd Dimàirt gun bheilear an dùil reachdas a chur an gnìomh gus casg a chur air teiripe iompachaidh.
• • •
Cuairt-litir #10
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Laurence Fox
Sgaoil Laurence Fox, Ceannard a’ Phàrtaidh Reclaim agus neach-taisbeanaidh GB News, bhideo air Twitter Didòmhnaich anns an do chur e bratach na pròise ‘na theine fhad ’s a thuirt e “This is what I think of your vile, disgusting, child sacrificial flag”.
Cuideachd bha na faclan “Pride comes before a fall” sgrìobhte thairis air an lèine-t a bha air.
Thuirt na Poilis Metropolitan gu bheil iad a’ dèanamh measaidh air a’ bhideo.
Faodar am bhideo fhaicinn an-seo air YouTube.
Clann tar-ghnèitheach
A-rèir poileasaidh riaghaltais a chaidh a leigeil air èalaidh dha The Sun, dh’fhaodadh clann tar-ghnèitheach a bhith air am toirmeasg bho bhith a’ gabhail pàirt ann an spòrs aig an sgoil agus cha bhi iad comasach air na h-ainmean no na riochdairean a th’ orra atharrachadh aig an sgoil gun chead bho na pàrantan aca.
Thathar an dùil gun tèid am poileasaidh fhoillseachadh gu h-oifigeil an t-seachdain-sa.
Tha buidhnean-iomairt, gnìomhaichean LGDTC+ agus luchd-poileataigs air ìmpidh a chur air Rishi Sunak am poileasaidh a thilgeil a-mach ’s iad ag ràdh gu bheil e gu math coltach ris an reachdas Earrann 28, a chur Margaret Thatcher an gnìomh, a thoirmisg ùghdarrasan ionadail (a’ tort a-steach sgoiltean) bho bhith “a’ brosnachadh” co-sheòrsachd eadar 1988 agus 2003 (2000 ann an Alba).
Pròis Bhristol
Chaidh innse dha na Poilis gun deach bòrd-sanasachd Pròis Bhristol a chur ‘na theine ann an nas lugha na aon là bho chaidh a chur an àirde.
Estòinia
Bhòt Pàrlamaid na h-Eastoine Dimàirt gus pòsadh aon-sheòrsach a dhèanamh laghail san dùthaich.
Bhòt buill-phàrlamaid 55-34 airson a’ bhile, a thèid a chur an gnìomh an ath-bhliadhna.
Texas
Shoidhnig Riaghladair Texas, Greg Abbott, bile ‘na lagh a chuireas casg air boireannaich tar-ghnèitheach bho bhith a’ gabhail pàirt ann am farpaisean spòrs aig ìre colaiste.
Carragh-chuimhne Stonewall
Tha na Poilis ann an Eabhraig Nuadh a’ sireadh fiosrachaidh mu trì tachartasan anns an deach Carragh-chuimhne Stonewall a mhilleadh bho thoiseach Mìos na Pròise.
Wickes
Bha an taga-hais #BoycottWickes a’ treandadh air Twitter thairis air an deireadh sheachdain as dèidh gun do thuirt Fraser Longden, àrd-oifigear a’ chompanaidh, nach biodh fàilte air luchd-ceannach aig a bheil beachdan an-aghaidh daoine tar-ghnèitheach anns na bùithean aca.
Howard Donald
Cha bhi Howard Donald, seinneadair sa chòmhlan-ciùil Take That, a’ nochdadh air an àrd-ùrlar aig an fhèis-pròise Groovebox ann an Nottingham an ath-mhìos as dèidh gun tàinig e am follais gu bheil e air a thaic a chur ri iomadh post Twitter an-aghaidh daoine tar-ghnèitheach.
• • •
Rishi Sunak a’ dèanamh fanaid air boireannaich tar-ghnèitheach
Tha Pink News air bhideo a cho-roinneadh anns a bheil am Prìomhaire, Rishi Sunak, a’ dèanamh fanaid air boireannaich tar-ghnèitheach ’s Ceannard a’ Phàrtaidh Libearalaich Dheamocrataich, Ed Davey, airson a thaic a thoirt do chòraichean tar-ghnèitheach.
[embed]https://www.thepinknews.com/wp-content/uploads/2023/06/RISHI-SUNAK-VERTIAL-PN-LOGO.mp4[/embed]
• • •
Cuairt-litir #9
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Eucoirean gràin a’ dol an àirde an Alba
Tha fiosrachadh a dh’fhoillsich Oifis a’ Chrùin agus Seirbheis Neach-Casaid a’ Chrùin Dimàirt a’ sealltainn gu bheil an àireamh de dh’eucoirean gràin air daoine LGDTC+ an Alba air còrr air dùblachadh san deichead eadar 2013/14 agus 2022/23.
Tha na h-àireamhan a’ sealltainn gun do chlàr Poileas Alba 1,884 eucoirean gràin air sgàth taobhadh feise no dearbh aithne gnè ann an 2022/23 an taca ri 887 cùisean ann an 2013/14.
Deasbad air mìneachadh an fhacal “gnè” ann an Achd na Co-ionnannachd
Bha deasbad ann am Westminster oidhche Luain mu mhìneachadh an fhacal “gnè” ann an Achd na Co-ionnannachd.
Thàinig an deasbad mar thoradh dà athchuinge - tè le 109,463 ainmean a tha ag iarraidh air an riaghaltas an achd atharrachadh gus iomradh a thoirt air “gnè bith-eòlasach” agus tè eile le 138,886 ainmean an aghaidh an atharrachaidh.
Gabhaidh an deasbad a choimhead gu h-ìosal no tha tar-sgrìobhadh ri leughadh an-seo.
Joanna Cherry
Tha Joanna Cherry a’ fulaing càineadh an dèidh dhi a sùilean a chasadh fhad ’s a bha Kirsty Blackman a’ toirt iomradh air neach-taghaidh tar-ghnèitheach a tha air beachdan fèin-mharbhtach fhulang rè deasbad air mìneachadh an fhacal “gnè” ann an Achd na Co-ionnannachd.
Sgeama nan Eucoirean Feise Eachdraidheil (Mathanas agus Dearmadan)
Tha Oifis na Dùthcha air ainmeachadh gu bheil boireannaich is seann-ghaisgich a chaidh a dhìteadh airson gnìomhachd co-sheòrsach a-nis comasach air tagradh a dhèanamh airson mathanas.
Èirinn a Tuath
Dh’fhoillsich Coimisean Èireann a Tuath air Còraichean Daonna aithisg Diluain anns an tuirt iad gu bheil deagh adhbhar ann airson Foghlam Càirdeis is Feisealachd ath-leasachadh as dèidh gun do lorg iad gu bheil cuid de sgoiltean a’ teagaisg cloinne gu bheil càirdeasan aon-sheòrsach ceàrr.
An Eastoin
Tha Ceann-suidhe ùr na h-Eastoine, Lauri Hussar, air ràdh gum faodadh pòsaidhean is aonaidhean aon-sheòrsach a bhith air an dèanamh laghail san dùthaich an ceann ceithir seachdain.
Ma shoirbheachas bile an Riaghaltais ann am bhòt an ath-sheachdain bidh An Eastoin a’ chiad dùthaich Shobhiatach a-riamh gus pòsadh aon-sheòrsach aithneachadh.
An Ruis
Fhuair bile a chuireadh bacadh air obair-lannsa daingneachadh gnè seachad air a’ chiad leughadh aice ann am Pàrlamaid na Ruise Diciadain. Feumaidh i faighinn seachad air dà leughadh a bharrachd agus bhòt ann an Seòmar-uachdarach na Pàrlamaide mus tèid e gu Ceann-suidhe Putin airson a shoidhnigeadh ‘na lagh.
Illinois
Shoidhnig Riaghladair Illinois, J. B. Pritzker, bile ‘na lagh Diluain gus bacaidhean-leabhair a thoirmeasg san stàit.
Fon reachdas ùr, a thèid a chur an gnìomh 1 dhen Fhaoilleach 2024, chan fhaigh leabhar-lannan cothrom air maoineachadh poblach ma chuireas iad bacadh air leabhraichean.
Baile Eabhraic Nuadh
Shoidhnig Eric Adams, Àrd-bhàillidh Baile Eabhraic Nuadh, àrd-òrdugh Diluain a ghlèidheas cùram-slàinte daingneachadh gnè anns a’ chathair.
Uganda
Tha Roinn Stàit nan SA air rabhadh a thoirt do dh’Aimeireaganaich gun a bhith a’ siubhal gu Uganda as dèidh gun deach co-sheòrsachd a dhèanamh mì-laghail san dùthaich am mìos seo chaidh.
Fon lagh ùr thèid binn-phrìosain a chur air neach sam bith a bhrosnaicheas co-sheòrsachd, binn-bheatha air neach sam bith a thèid a dhìteadh de cho-sheòrsachd agus binn-bhàis air neach sam bith a thèid a dhìteadh airson “aggravated homosexuality” – ionnsaighean dhrabasta air daoine nas òige na 18, no cùisean anns a bheil cuideigin air an galarachadh le HIV.
• • •
Cuairt-litir #8
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Texas
Tha Riaghladair Texas, Greg Abbot, air bile a shoidhnigeadh a chuireas casg air cùram-slàinte daingneachadh gnè do dhaoine fo aois 18 bliadhna a dh’aois.
A bharrachd air sin bidh aig daoine fo 18 sgur de chùram-slàinte daingneachadh gnè sam bith a tha iad a’ gabhail cothrom air mar-thà.
Thèid an lagh ùr a chur an gnìomh san t-Sultain.
Maryland
Shoidhnig Riaghladair Maryland, Wes Moore, òrdugh-gnìomha Diluain gus cùram-slàinte daingneachadh gnè san stàit a ghlèidheadh.
Louisiana
Bhòt luchd-lagha ann an Louisiana Dimàirt gus cùram-slàinte daingneachadh gnè do dhaoine fo 18 bliadhna a dh’aois a thoirmeasg san stàit.
Mike Pence
Tha Mike Pence, a tha a’ seasamh airson a bhith na h-ath Cheann-suidhe air na Stàitean Aonaichte, air ràdh gu bheil e a’ cur taic làidir ri casg air cùram-slàinte daingneachadh gnè ‘s gun cur e crìoch air ceartachd phoileataigeach ma bhuannaicheas e taghadh na h-ath bhliadhna.
Innis Tìle
Bhòt Pàrlamaid na h-innis Tìle Dihaoine gus casg a chur air teiripe iompachaidh air sgàth taobhadh feise no dearbh-aithne gné.
Bhòt 53 Buill-Phàrlamaid airson a’ chasg, 0 na aghaidh agus cha do bhòt triùir.
NHS Shasainn
Thuirt NHS Shasainn Dihaoine gun sgur iad a’ toirt leigheasan a chureas bacadh air inbhidheachd do dhaoine fo 18 bliadhna a dh’aois gus an dèan iad barrachd rannsachaidh air na buannachdan agus na h-eas-bhuannachdan a th’ aca.
Thom Tills
Bhòt Riochdairean Pàrtaidh Poblachdach nan Stàitean Aonaichte Disathairne gus Seanadair Thom Tills a chronachadh as dèidh dha taic shealltainn do chòirichean LGDTC+ agus ath-leasachadh adhartach air poileasaidhean in-imrich.
iOS 17
Chaidh iOS 17 a thaisbeanadh le Apple an t-seachdain sa ‘s am measg nan ùrachaidhean a th’ ann chaidh ainmeachadh gum bi cleachdaichean comasach air riochdairean pearsanta gnàthaichte a shuidheachadh san aplacaid Contacts.
Pròis Mhoireibh
Thèid deuchainnean-cluiche fosgailte airson Pride in Moray a chumail 7f Disathairne 15mh den Ògmhios aig Talla-coimhearsnachd Spè ann am Farrais.
• • •
Drag Queen Story Time
Tha Dùghlas Ròs air bruidhinn a-mach an aghaidh tachartas draga a bhios a’ gabhail àite aig Leabhar-lann Èilginn Disathairne gus Mìos na Pròise a chomharrachadh.
Sgrìobh e air Twitter gu bheil an tachartas “Drag Queen Story Time”, a chìtheas banrìgh draga a’ leughadh leabhraichean do chlann fo 6 bliadhna a dh’aois, “mì-iomchaidh”.
Am measg nan leabhraichean a bhios Miss Lossie Mouth, no Iain Caimbeul a tha na neach-teagaisg, a’ leughadh bidh “And Tango Makes Three”, leabhar chloinne a tha stèidhichte air fìor-sgeul mu dà cheann-fionn fhireannach agus an t-isean boireannach a tha iad a’ togail.
Thuirt prìomh leabhar-lannaiche Comhairle Mhoireibh gu bheil an tachartas na dheagh dhòigh gus “co-ionnanachd, iomadachd agus in-ghabhail” a bhrosnachadh do leughadairean òga.
• • •
Cuairt-litir #7
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Alba
Chàin Kevin Stewart, Ministear na Còmhdhalach is BPA airson Obar Dheathain Meadhain, an t-amaideas homafòbach a fhauir e air na meadhanan sòisealta as dèidh dha postadh mu Ghrampian Pride air an deireadh-sheachdain.
Bha Ministear an SNP am-measg nam mìltean a bha an làthair aig an tachartas pròise an Obar Dheathain Disathairne.
Thuirt e gum feum na lìonraidhean sòisealta barrachd a dhèanamh gus stad a chur air giùlan uabhasach mar seo.
Uganda
Tha Ceann-suidhe Museveni air bile an-aghaidh co-sheòrsachd a shoidhnigeadh ‘na lagh ann an Uganda.
Fon lagh ùr thèid binn-bheatha a chur air duine sam bith a thèid a dhìteadh de cho-sheòrsachd.
A bharrachd air sin, thèid binn-bhàis a chur air neach sam bith a thèid a dhìteadh airson “aggravated homosexuality” - ionnsaighean dhrabasta air daoine nas òige na 18, no cùisean anns a bheil cuideigin air an galarachadh le HIV.
A’ Phòlainn
Thathar ag aithris gun deach boireannach a losgadh na ceann le gunna BB fhad ‘s a bha i a’ gabhail pàirt ann an caismeachd airson co-ionnannachd LGDTC+ anns a’ Phòlainn air an 20mh den Mhàrt.
Dh’fhuiling i mion-leòntan mu a ceann agus chaidh innse dhan Phoileas.
Iapan
Tha cùirt ann an Sgìre Nagoya, Iapan air riaghladh gu bheil an casg a th’ air pòsadh aon-sheòrsach san dùthaich neo-bhun-reachdail.
Ach ged is e seo an dàrna chùirt Iapanach gus an co-dhùnadh seo a ruighinn, tha dà chùirt eile san dùthaich air riaghladh ann am fàbhar a’ chaisg.
Tha pòsadhean aon-sheòrsach air an aithneachadh anns a h-uile dùthaich G7 ach Iapan.
• • •
Cuairt-litir #6
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
LGBT Youth Scotland
Tha an carthannas LGBT Youth Scotland air Twitter fhàgail is draghan aca mu sàbhailte na coimhearsnachd LGDTC+ bho chionn gabhail-thairis an lìonraidh ann an 2022.
Thuirt an Dr Mhairi Crawford gu bheil iad a’ faicinn àrdachaidh draghail ann am beachdan anabharrach agus ionnsaighean air buill a’ choimhearsnachd LGDTC+ is air a’ charthannas aca fhèin cuideachd.
Gabhaidh iad fhathast a lorg air Facebook, Instagram, LinkedIn agus an làrach-lìn aca.
Rothaireachd
Tha British Cycling air casg a chur air lùth-chleasaichean tar-ghnèitheach bho farpaisean nam ban.
Thuirt am buidheann-riaghlaidh gun robh an co-dhùnadh aca stèidhichte air “cothromachd”.
Fon phoileasaidh ùr aca, feumaidh lùth-chleasaichean tar-ghnèitheach farpais ann an roinn fhosgailte còmhla ris na fireannaich.
Iowa
Chaidh lagh a shoidhnigeadh le Riaghladair Iowa, Kim Reynolds, Dihaoine a chuireas casg air teagasg cuspairean co-cheangailte ri dearbh-aithne gnè agus taobhadh feise do chloinne eadar aois 5 agus 12.
Tha an lagh cuideachd a’ cur air rianairean-sgoile fios a leigeil do phàrantan ma dh’iarras sgoilear ainm no riochdairean pearsanta diofraichte a chleachdadh.
A bharrachd air sin, tha an lagh a’ leigeil le pàrantan iarraidh leabhraichean is stuthan-teagaisg a thoirt a-mach às an t-seòmar-teagaisg.
Tha e a’ tighinn as dèidh gun do shoidhnig i dà lagh cheannsachail eile sa Mhàrt - Senate File 538 a chur cas air cùram-slàinte daingneachaidh gnè do dhaoine sam bhith fo aois 18 agus Senate File 482 a chur casg air sgoilearan tar-ghnèitheach bho bhith a’ cleachdadh an taighe-bhig a cho-fhreagaireas ris an dearbh-aithne gnè aca.
Cìopras
Bhòt Pàrlamaid Chìopras Diardaoin gus teiripe iompachaidh a dhèanamh ‘na eucoir.
Bidh daoine sam bith a thèid a dhìteadh air a shon buailteach do binn phrìosan dà bhliadhna agus/no peanas-airgid suas ri €5,000.
• • •
Cuairt-litir #5
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Ron DeSantis
Tha Ron DeSantis, Riaghladair Fhlorida, air ainmeachadh gun sheas e airson a bhith na Cheann-suidhe nan Stàitean Aonaichte ann an 2024.
Chaidh DeSantis na Riaghladair Fhlorida ann an 2019 agus e air a bhith a’ toirt ionnsaigh air còraichean na coimhearsnachd LGDTC+, nam ban agus nam mion-shluaghan cinnidheach bhon uair sin.
Tha buidhnean a leithid Equality Florida, Human Rights Campaign agus NAACP air rabhadh a thoirt do luchd-tadhail o chionn ghoirid gu bheil an stàit a-nis nàimhdeil do dhaoine LGDTC+ agus dhaoine dhubha.
Louisiana
Bhòt Seanadairean ann an Louisiana Diciadain an-aghaidh bile a chuireadh casg air cùram-slàinte daingneachadh gnè do dhaoine fo aois 18.
Chall am bile le ach aon bhòt as dèidh gun do bhot aon sheanadair Phoblachdach na h-aghaidh còmhla ris na seanadairean deamocratach gu lèir.
Thuirt Seanadair Fred Mills gu bheil e a’ cur earbsa ann an dotairean an co-dhùnadh as fheàrr a dhèanamh dha na euslaintich aca.
Montana
Tha Riaghladair Mhontana, Greg Gianforte, air bile a shoidhnigeadh a mhìneachas “gnè” gu laghail mar bhìnearaidh eadar boireannach no fireannach ‘s a dhùineas a-mach daoine neo-bhìnearaidh ‘s tar-ghnèitheach.
A’ Phòlainn
Tha Mikołaj Pawlak, Coimiseanair airson Còraichean Chloinne Phòlainn, air gairm airson sgrùdadh a dhèanamh air sgoiltean a tha càirdeil ri dhaoine LGDTC+ gus “eucoirich agus spùinneadairean-cloinne” a sireadh.
Tha e a’ tighinn as dèidh gun deach liosta de na sgoiltean as in-ghabhalaiche air an dùthaich fhoillseachadh na bu tràithe air a’ mhìos ‘s nochd àrd-sgoil Collegium Gedanense ann an Gdańsk aig mullach an liosta.
Chaidh an liosta, a tha stèidhichte air bhòtaichean nan sgoilearan, a thòiseachadh le Dominik Kuc ann an 2018 gus cothrom a thoirt do dh’oileanaich air sgoil “fosgailte agus ceadach” a lorg.
Romàinia
Tha an ECHR (Cùirt Eòrpach nan Còraichean Daonna) air riaghladh gum feum Romàinia càraidean aon-sheòrsach aithneachadh.
Thàinig an co-dhùnadh as dèidh gun tug aon chàraid air fhichead cùis-lagha an-aghaidh na dùthcha.
Co-dhùin an EHCR gun robh an dùthaich air Artaigeil 8 de Chunnradh an Aonaidh Eòrpaich a briseadh le bhith a’ diùltadh aithneachadh laghail do dh’aonaidhean-catharra.
EuroPride 2023
Chaidh ainmeachadh gum bi Christina Aguilera na prìomh sheinneadair aig EuroPride 2023.
Thèid EuroPride na bliadhna seo a chomharrachadh ann an Valleta, Malta le sreath de thachartasan eadar 7mh agus 17mh den Sultain ‘s caismeachd pròise agus consairt air an 16mh.
Dh’ainmich an ILGA Malta na dùthaich as càirdeil do dhaoine LGDTC+ san Roinn Eòrpa airson an ochdamh bliadhna leantainneach na bu tràithe air a’ mhìos seo - thùit An RA gu àireamh 17.