Cuairt-litir #6
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
LGBT Youth Scotland
Tha an carthannas LGBT Youth Scotland air Twitter fhàgail is draghan aca mu sàbhailte na coimhearsnachd LGDTC+ bho chionn gabhail-thairis an lìonraidh ann an 2022.
Thuirt an Dr Mhairi Crawford gu bheil iad a’ faicinn àrdachaidh draghail ann am beachdan anabharrach agus ionnsaighean air buill a’ choimhearsnachd LGDTC+ is air a’ charthannas aca fhèin cuideachd.
Gabhaidh iad fhathast a lorg air Facebook, Instagram, LinkedIn agus an làrach-lìn aca.
Rothaireachd
Tha British Cycling air casg a chur air lùth-chleasaichean tar-ghnèitheach bho farpaisean nam ban.
Thuirt am buidheann-riaghlaidh gun robh an co-dhùnadh aca stèidhichte air “cothromachd”.
Fon phoileasaidh ùr aca, feumaidh lùth-chleasaichean tar-ghnèitheach farpais ann an roinn fhosgailte còmhla ris na fireannaich.
Iowa
Chaidh lagh a shoidhnigeadh le Riaghladair Iowa, Kim Reynolds, Dihaoine a chuireas casg air teagasg cuspairean co-cheangailte ri dearbh-aithne gnè agus taobhadh feise do chloinne eadar aois 5 agus 12.
Tha an lagh cuideachd a’ cur air rianairean-sgoile fios a leigeil do phàrantan ma dh’iarras sgoilear ainm no riochdairean pearsanta diofraichte a chleachdadh.
A bharrachd air sin, tha an lagh a’ leigeil le pàrantan iarraidh leabhraichean is stuthan-teagaisg a thoirt a-mach às an t-seòmar-teagaisg.
Tha e a’ tighinn as dèidh gun do shoidhnig i dà lagh cheannsachail eile sa Mhàrt - Senate File 538 a chur cas air cùram-slàinte daingneachaidh gnè do dhaoine sam bhith fo aois 18 agus Senate File 482 a chur casg air sgoilearan tar-ghnèitheach bho bhith a’ cleachdadh an taighe-bhig a cho-fhreagaireas ris an dearbh-aithne gnè aca.
Cìopras
Bhòt Pàrlamaid Chìopras Diardaoin gus teiripe iompachaidh a dhèanamh ‘na eucoir.
Bidh daoine sam bith a thèid a dhìteadh air a shon buailteach do binn phrìosan dà bhliadhna agus/no peanas-airgid suas ri €5,000.
• • •
Cuairt-litir #5
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Ron DeSantis
Tha Ron DeSantis, Riaghladair Fhlorida, air ainmeachadh gun sheas e airson a bhith na Cheann-suidhe nan Stàitean Aonaichte ann an 2024.
Chaidh DeSantis na Riaghladair Fhlorida ann an 2019 agus e air a bhith a’ toirt ionnsaigh air còraichean na coimhearsnachd LGDTC+, nam ban agus nam mion-shluaghan cinnidheach bhon uair sin.
Tha buidhnean a leithid Equality Florida, Human Rights Campaign agus NAACP air rabhadh a thoirt do luchd-tadhail o chionn ghoirid gu bheil an stàit a-nis nàimhdeil do dhaoine LGDTC+ agus dhaoine dhubha.
Louisiana
Bhòt Seanadairean ann an Louisiana Diciadain an-aghaidh bile a chuireadh casg air cùram-slàinte daingneachadh gnè do dhaoine fo aois 18.
Chall am bile le ach aon bhòt as dèidh gun do bhot aon sheanadair Phoblachdach na h-aghaidh còmhla ris na seanadairean deamocratach gu lèir.
Thuirt Seanadair Fred Mills gu bheil e a’ cur earbsa ann an dotairean an co-dhùnadh as fheàrr a dhèanamh dha na euslaintich aca.
Montana
Tha Riaghladair Mhontana, Greg Gianforte, air bile a shoidhnigeadh a mhìneachas “gnè” gu laghail mar bhìnearaidh eadar boireannach no fireannach ‘s a dhùineas a-mach daoine neo-bhìnearaidh ‘s tar-ghnèitheach.
A’ Phòlainn
Tha Mikołaj Pawlak, Coimiseanair airson Còraichean Chloinne Phòlainn, air gairm airson sgrùdadh a dhèanamh air sgoiltean a tha càirdeil ri dhaoine LGDTC+ gus “eucoirich agus spùinneadairean-cloinne” a sireadh.
Tha e a’ tighinn as dèidh gun deach liosta de na sgoiltean as in-ghabhalaiche air an dùthaich fhoillseachadh na bu tràithe air a’ mhìos ‘s nochd àrd-sgoil Collegium Gedanense ann an Gdańsk aig mullach an liosta.
Chaidh an liosta, a tha stèidhichte air bhòtaichean nan sgoilearan, a thòiseachadh le Dominik Kuc ann an 2018 gus cothrom a thoirt do dh’oileanaich air sgoil “fosgailte agus ceadach” a lorg.
Romàinia
Tha an ECHR (Cùirt Eòrpach nan Còraichean Daonna) air riaghladh gum feum Romàinia càraidean aon-sheòrsach aithneachadh.
Thàinig an co-dhùnadh as dèidh gun tug aon chàraid air fhichead cùis-lagha an-aghaidh na dùthcha.
Co-dhùin an EHCR gun robh an dùthaich air Artaigeil 8 de Chunnradh an Aonaidh Eòrpaich a briseadh le bhith a’ diùltadh aithneachadh laghail do dh’aonaidhean-catharra.
EuroPride 2023
Chaidh ainmeachadh gum bi Christina Aguilera na prìomh sheinneadair aig EuroPride 2023.
Thèid EuroPride na bliadhna seo a chomharrachadh ann an Valleta, Malta le sreath de thachartasan eadar 7mh agus 17mh den Sultain ‘s caismeachd pròise agus consairt air an 16mh.
Dh’ainmich an ILGA Malta na dùthaich as càirdeil do dhaoine LGDTC+ san Roinn Eòrpa airson an ochdamh bliadhna leantainneach na bu tràithe air a’ mhìos seo - thùit An RA gu àireamh 17.
• • •
Cuairt-litir #4
Geàrr-chunntas sgrìobhte de naidheachdan LGDTC+ ionadail, nàiseanta ‘s bho air feadh an t-saoghail.
Rugbaidh nam Bàn
Tha cluicheadair rugbaidh tar-ghnèitheach air mìltean a thogail gus cùis laghail a thoirt an-aghaidh an RFU (Aonadh Ball-coise Rugbaidh) airson casg a chur air tar-bhoireannaich bho fharpaisean nam ban.
Thuirt Julie-Anne Curtiss ri ESPN san t-Sultain 2022 gu bheil an casg a’ toirt buaidh mhòr air an slàinte-inntinn aice agus aig cluicheadairean tar-ghnèitheach eile agus i a-nis air maoineachadh de £6,585 a thogail air an làrach-lìn Crowd Justice gus cùis-lagha a thoirt ‘na aghaidh.
Florida
Tha buidheann, a tha air a dhèanamh suas le Penguin Random House, ùghdarran, pàrantan agus buidheann saor-labhairt, air cùis-lagha a thogail an-aghaidh Escambia County School District agus Escambia County School Board ann am Pensacola, Florida mar thoradh air casg air leabhraichean co-cheangailte ri cuspairean cinnidh agus LGDTC+ ann an leabhar-lannan sgoile.
Siubhal gu Florida
Tha NAACP (National Association for the Advancement of Colored People) air rabhadh a thoirt do dhaoine a tha a’ planaigeadh siubhail gu Florida ‘s iad ag ràdh gu bheil an stàit nàimhdeil do dhaoine dhubha agus daoine LGDTC+.
Nebraska
Bhòt luchd-lagha ann an Nebraska 33-15 Dihaoine gus casg a chur air cùram-slàinte gnè do dh’òigridh thar-ghnèitheach agus casgan-breith as dèidh deich seachdain.
Meagsago
Tha Meagsago air a’ chiad cead-siubhail neo-bhìnearaidh a thoirt a-mach.
Fon phoileasaidh ùr faodaidh do dhaoine neo-bhìnearaidh an gnè a chlàradh mar “X” an àite a bhith taghadh eadar boireannach no fireannach.
Tha a’ ciallachadh gu bheil Meagsago air tighinn na siathamh dùthaich deug san t-saoghal gus aithneachadh laghail a thoirt do dhaoine neo-bhìnearaidh.
• • •
Balach-sgoile air a dhroch leòn ann an Èirinn
Tha na Gardí ann an Navan, Contae na Mí, air dearbhadh gun deach còignear deugaire a chaidh a chur an grèim as dèidh ionnsaigh air balach-sgoile gèidh, 14 bliadhna a dh’aois, an saoradh gun chasaid.
Chaidh bhideo den ionnsaigh a cho-roinneadh fad is farsaing air Twitter.
Thathar ag aithris gun deach am balach a dhroch leòn mun aodann ‘s a cheann agus gun deach a cholann a leòn cuideachd.
Thuirt na Gardí gu bheil iad fhathast a’ rannsachadh na h-ionnsaigh ‘s iad ag iarraidh air neach sam bith aig a bheil fios mu a deidhinn fios a chur gu Stèisean Garda Nevan air 046 9079930 no fios dìomhair a chur thuca air 1800 666 111.
Tha Bile Eucoirean Gràin a’ dol tro Phàrlamaid na h-Èireann an-dràsta, ach cha deach a dhèanamh na lagh fhathast.
• • •
Dìonan tar-ghnèitheach gan cur às bho phoileasaidh Twitter air giùlan gràineil
Tha Twitter air am poileasaidh aca air giùlan gràineil ùrachadh gu sàmhach gus earrann a thug dìon do chleachdaichean tar-ghnèitheach bho mhì-ghnèitheachadh (misgendering) is mharbh-ainmeachadh (deadnaming) a chur às.
B’ àbhaist dhan poileasaidh a ràdh:
“We prohibit targeting others with repeated slurs, tropes or other content that intends to dehumanize, degrade or reinforce negative or harmful stereotypes about a protected category. This includes targeted misgendering or deadnaming of transgender individuals.”
ach chaidh atharrachadh 8mh den Ghiblean gus an rosgrann mu dheireadh a chur às.
Tha am poileasaidh fhathast a’ toirmeasg ionnsaighean a-thaobh cinnidh, cinnidheachd, tùs-àite, dual-fhine, taobhadh feise, gnè, fèin-aithne gnè, creideimh, aoise, ciorraim no droch-thinneis.
• • •
SQIFF: 'The Trans-Generational Tour April-June 2023'
Bidh an fhèis-film LGDTC+, SQIFF, a’ taisbeanadh sreath de fhilmichean air an dèanamh leis a’ choimhearsnachd tar-ghnèitheach aig Cùirt an Easbaig, Inbhir Nis air an deireadh-sheachdain.
Thèid na filmichean a thaisbeanadh aig An Lanntair, Steòrnabhagh san Ògmhios cuideachd.
Gheibhear barrachd fhiosrachaidh an-seo.
• • •
Bùth-obrach: 'What's happening in trans healthcare?'
Bidh Scottish Trans a’ stiùireadh bùth-obrach an-asgaidh mu chùram-slàinte tar-ghnèitheach 2f Disathairne 29mh den Ghiblean san Ionad Spectrum, Inbhir Nis. Gheibhear barrachd fhiosrachaidh agus tiocaidean an-seo.
• • •
Athchuinge an-aghaidh Bile na h-Aithne Gnè air a chur air dòigh leis a' Phàrtaidh Alba
Tha am pàrtaidh poileataigeach, Alba, air athchuinge a chur air dòigh a tha a’ feuchainn ri stad a chur air Bile Ath-leasachadh Aithneachadh Gnè (Alba) bho bhith a’ dol na lagh.
Tha e a’ tighinn as dèidh gun do dh’ainmich Riaghaltas na h-Alba Diciadain gun dèan iad dùbhlan laghail an-aghaidh mar a chur Riaghaltas na RA stad air a’ bhile.
Chaidh am bile, a dhèanadh e nas fhasa do dhaoine thar-ghnèitheach GRC (teisteanas aithneachadh gnè) fhaighinn, aontachadh le Pàrlamaid na h-Alba san Dùbhlachd ach thuirt Riaghaltas na RA gun dèanadh e sgaradh eadar diofar dhùthchannan na Rìoghachd Aonaichte agus chleachd iad Earrann 35 de dh’Achd na h-Alba gus stad a chur air bho bhith a’ dol na lagh.
Sgrìobh Alba air an làrach-lìn aca Diardaoin gum bu chòir do Riaghaltas na h-Alba fòcas a dhèanamh air cùisean a tha cudromach do mhuinntir na h-Alba an àite a bhith beò-ghlacte le gnè ach tha Riaghaltas na h-Alba air ràdh gum feum iad a dhol air adhart le dùbhlan laghail an-aghaidh Riaghaltas na RA gus deamocrasaidh na h-Alba a dhìon.
• • •
Seachdnar air an EHRC fhàgail mar a tha oillt thar-ghnèitheach a' sìor-fhàs sa bhuidheann
Tha Vice News ag aithris gu bheil seachdnar àrd-oifigeach - ball-bùird, stiùiriche-gnìomha, ceathrar stiùiriche agus ball-comataidh - air an EHRC (Coimisean nan Còraichean Daonna is na Co-ionnannachd) fhàgail air sgàth ’s gu bheil oillt thar-ghnèitheach a’ sìor-fhàs sa bhuidheann.
Chaidh an coimisean a stèidheachadh ann an 2007 gus sùil a chumail air laghanan co-ionnannachd agus a dhèanamh cinnteach gun tèid an cur an-gnìomh air feadh Shasainn, na Cuimrigh is na h-Alba.
Chaidh an coimisean a chàineadh seachdain seo chaidh ge-tà as dèidh gun tug iad comhairle ri Kemi Badenoch, Ministear nam Bàn is na Co-ionnannachd, air mar a ghabhas Achd na Co-ionnannachd ath-leasachadh gus bacadh a chur air daoine tar-ghnèitheach bho àiteachan aon-sheòrsach - seòmraichean-éididh, taighean-beaga agus m.s.a.a. - le bhith a’ dèanamh sgaradh nas soilleire eadar mìneachadh laghail nam faclan “gender” agus “sex”.
A-rèir Vice News b’ e obair-ullachaidh a’ chomhairle seo a thug air na h-oifigich an coimisean fhàgail.
• • •
Bànrigh draga Albannach ag amas air a' chrùn
Bidh bànrigh draga à Dùn Dè a’ taisbeanadh aig ro-fharpais Miss Continental Northern Europe ann an Rotterdam as t-samhradh.
Sgrìobh Miss Peaches air Instagram gu bheil i air bhiorain gur ise “a’ chiad bhànrigh Albannach a-riamh gus an dùthaich againn a riochdachadh san taisbeanadh chliùiteach seo”.
Bidh còrr is 40 ro-fharpais air feadh an t-saoghail mus tèid na buannaichean gu Chicago airson a’ chuairt dheireannach agus crùnadh Miss Continental 2023 san t-Sultain.
• • •
Dùbhlan laghail do Riaghaltas na RA air ainmeachadh
Dh’ainmich Prìomh-mhinistear na h-Alba, Humza Yousaf, gu h-oifigeil an-diugh gun dèan Riaghaltas na h-Alba dùbhlan laghail an-aghaidh Riaghaltas na RA mun cho-dhùnadh aca bacadh a chur air ath-leasachadh gnè an Alba.
Chaidh am bile, a dhèanadh e nas fhasa do dhaoine thar-ghnèitheach teisteanas aithneachadh gnè fhaighinn, tro Phàrlamaid na h-Alba san Dùbhlachd ach chleachd Westminster Earrann 35 de dh’Achd na h-Alba gus stad a chur air bho bhith a’ faighinn aonta rìoghail.
B’ e seo a’ chiad turas a-riamh gun deach an earrann seo a chleachdadh bho chaidh Pàrlamaid na h-Alba a stèidheachadh.
• • •
Tar-bhoireannaich toirmeasgte bho fharpaisean snàimh nam ban
Tha Swim England air ainmeachadh gun tèid casg a chur air boireannaich tar-ghnèitheach bho fharpaisean snàimh nam ban.
A-rèir am poileasaidh ùr aca cha bhi ach boireannaich cios-ghnèitheach comasach air farpais san roinn bhoireannach is thèid roinn fhosgailte a chruthachadh do snàmhadairean fireannach, neo-bhìnearaidh agus tar-ghnèitheach.
Sgrìobh iad air an làrach-lìn aca gur e seo an dòigh as fheàrr cothromachd na farpais a dhìon.
Thèid am poileasaidh ùr a chur an gnìomh air a’ chiad latha dhen t-Sultain 2023.