Inbhe athair air a dhiùltadh do thar-fhireannach
Tha an Àrd-chùirt ann an Lunnainn air co-dhùnadh nach fhaod tar-fhireannach, Freddy McConnell, clàradh mar athair air teisteanas-breith an leanabh aige air sgàth ’s gun do rug e an leanabh.
Thuirt Mgr McConnell gu bheil e brònach mun cho-dhùnadh ach gu bheil e a’ beachdadh air ath-thagradh a dhèanamh na aghaidh.
Ann an agallamh le The Guardian, far a bhios e ag obair, thuirt e:
“Tha dragh orm mu na bhios seo a’ ciallachadh, chan ann a-mhàin dhomhsa, ach do dhaoine tar-ghnèitheach eile a tha airson a bhith nam pàrantan.”
“Tha buaidh mhòr aige air structaran teaghlaich neo-thraidiseanta. The e a’ daingneachadh a’ bheachd nach eil ach seòrsaichean teaghlaich traidiseanta air a aithneachadh gu ceart no air a làimhseachadh gu co-ionann. Chan eil e cothromach.”
Mhothaich McConnell gun robh e tar-ghnèitheach ann an 2010 agus tha e air a bhith a’ fuireach mar fhireannach fad iomadh bliadhna.
Ann an 2013 thòisich e air leigheasan teisteostaron fhaighinn agus fhuair e obair-lannsa gus stuth a chìochan a thoirt air falbh.
Ann an 2016 fhuair e comhairle bho chlionaig sìolachaidh mu fhàs trom agus stad e na leigheasan teisteostaron.
Dh’fhàs e trom ann an 2017 agus rug e an leanabh ann an 2018.
‘S e co-dhùnadh an àrd-chùirt gur e màthair a th’ ann an neach a tha air leanabh a bhreith ge b’ e dè an gnè laghail aca.
Thuirt Sir Andrew McFarlane, Ceann-suidhe Roinn Teaghlaich na h-Àrd-chùirte, gu bheil eadar-dhealachadh susbainteach eadar gnè neach agus an inbhe aca mar phàrant agus gur e màthair a th’ ann an neach a tha air dol tron phròiseas bith-eòlasach an-sàs ann an leanabh a bhreith.
• • •
Litir homafòbach air a chur gu bùth cèice
Bha iongnadh air luchd-obrach aig bùth cèice ann am Baile Udain Diardaoin as dèidh dhaibh litir homafòbach fhaighinn tron phost.
Chaidh an litir, a ghabhas a leughadh gu h-ìseal, a chur gun ainm dhan bhùth Special Days Cakes.
‘S ann le Mìcheal Burns agus Steafan Whyteside a tha am bùth.
Thuirt Mìcheal ri Pink Saltire:
“Cha do smaoinich sinn airson diog gun d’ thàinig an litir bho chliant sam bith againn, ach is dòcha bho chuideigin a bha airson ar nàrachadh air sgàth ’s gu bheil sinn co-sheòrsach. Tha sinn air a bhith còmhla fad ochd bliadhna deug agus ’s e seo an 10mh ceann-bliadhna pòsaidh againn san Dùbhlachd, ach chan fhaca sinn dad mar seo a-riamh. Bha mi a’ smaointinn gur e rud a thachair san àm a dh’fhalbh a bh’ ann an gràin na co-sheòrsachd ach chaidh mo chur ann an tuaineal le seo an-diugh.”
Chaidh aithris air na thachair a thoirt do Phoileas Alba a bhios ga làimhseachadh mar eucoir-gràin.
Ma tha sibh airson barrachd leughadh mun sgeulachd seo tadhalaibh air làrach-lìn Pink Saltire: Scottish business owners receive targeted homophobic hate mail.
• • •
Tatù air a dhiùltadh do dhuine le HIV
Tha a’ BhBC ag aithris gu bheil bùth tatù ann an Dùn Dè air duine a dhiùltadh air sgàth ’s gu bheil HIV air.
Chaidh Deejay Bullock dhan bhùth san Iuchar gus tatù ùr fhaighinn airson a cho-là-breith ach chaidh a dhiùltadh nuair a dhearbh e air foirm aithris-àichidh gu bheil HIV air.
Thathar ag aithris nuair a thug an tatùdair sùil air an fhoirm, thuirt e, “Chan eil mi a’ dol a chur mi-fhìn, mo cho-obraichean no duine sam bith eile ann an cunnart”.
Thuirt Deejay gun do chuir e iognadh air gun deach a dhiùltadh air sgàth ’s gun robh e air dà thàtu fhaighinn ann am bùth Obair Dheathain gun thrioblaid sam bith bho dh’ionnsaich e gu bheil HIV air ann an 2009.
Thuirt e ri BBC Scotland gun robh e doirbh dha nuair a dh’ionnsaich e gun robh HIV air agus gun do lughdaich a shlàinte-inntinn mar toradh air.
O chionn 2012 tha e air a bhith ag obair ann an slàinte LCDT agus e ag ràdh gu bheil seo air a mhisneachd a bhrosnachadh agus air a chuidheachadh leis an inbhe aige aontachadh.
Tha HIV Scotland agus buidhnean HIV eile ag ràdh nach eil am bhìoras a’ cur bacadh air daoine a tha airson tatù, tolladh no làimhseachadh cosmaigeach fhaighinn.
A-rèir an stiùireadh oifigeil aca, tha e mì-laghail fo Achd Co-ionannachd 2010 cliantan a dhiùltadh air sgàth ’s gu bheil HIV orra agus chan eil e ceart fo reachdas dìon datà faighneachd ma tha HIV orra.
Bu chòir do thatùdairean agus cliantan a bhith air an dìon le modhan sàbhailteachd àbhaisteach a-leithid seasgachadh an uidheamachd agus cleachdadh miotagan, inc agus snàthadan ùr a airson gach cliant.
• • •
Iomairt airson tachartas pròise a chumail ann am Moireabh
Chaidh iomairt a stèidheachadh gus fèis-pròise a chumail ann am Moireabh an ath-bhliadhna.
Chaidh an iomairt a stèidheachadh leis a’ bhuidheann LGBT Moray agus tha iad gu bhith a’ cumail a’ chiad choinneamh dealbhaidh aca Dihaoine 6mh dhen Sultain aig 5:30f anns a’ Chaberfeidh, Eilginn.
Ma tha thu airson an coinneamh a fhrithealadh cuir fios dhaibh air Facebook.
• • •
Carragh-cuimhne do dhaoine co-sheòrsach a dh’fhulaing geur-leanmhainn nan Nàsach air a mhilleadh
Tha AP News anns a’ Ghearmailt ag aithris gun deach carragh-cuimhne do dhaoine co-sheòrsach a dh’fhulaing geur-leanmhainn nan Nàsach a mhilleadh.
Chaidh an carragh-cuimhne “Denkmal für die im Nationalsozialismus verfolgten Homosexuellen” a thaisbeanadh ann an 2008 ann am Pairc Tiergarten, Berlin.
Am-broinn an carragh tha fosgladh anns a chìthear bhideo de chàraid co-sheòrsach a’ pògadh.
Thathar ag aithris gun deach a lorg le geàrdan-faire Diluain gun deach am fosgladh a chòmhdachadh le peant rè na h-oidhche.
Tha am Poileas air ràdh nach eil duine sam bith fo amharas fhathast agus cha chanadh iad an deach an eucoir a chlàradh air CCTV.
• • •
Còrr ‘s 9000 mìle an lathair aig Fèis-pròise Ghlaschu ann am meadhan connspaid ùr
Thathar a’ meas gun robh còrr ‘s 9,000 duine an lathair aig Fèis-pròise Ghlaschu an-dè.
Thuirt Crìsdean Tait, cathraiche an fhèis:
“Thathar a’ meas gun tàinig còrr ‘s 9,000 neach còmhla fo bhràtach sìtheil agus toilichte ri càirdean, teaghlaich no mar phàirt de bhuidheann.”
“Tha e air a bhith gu math soirbheachail. Bha nas lugha na an-ùiridh an-lathair ach bha faireachdainn iongantach aig a’ chaismeachd.”
A dh’aindeoin sin tha an tachartas ann am meadhan connspaid ùr as deidh dhan aonadh-ciùird Unite dearbhadh Diardaoin nach biodh iad an-làthair air sgàth malairteachadh an tachartaIs agus air sgàth ‘s gu bheil companaidhean mòra a’ cleachdadh pride airson barrachd luchd-ceannaich fhaighinn.
Bha tiocaidean a’ cosg £120 do bhuidhnean LCDTQ+ agus £420 do bhuidhneana malairteach agus chosg e £600 airson carbad-fèille a chur anns a’ chaismeachd.
Tha tachartas Disathairne cuideachd air beagan deasbaid a thogail am measg na coimhearsnachd air sgàth carbad-tiodhlachaidh a nochd anns a’ chaismeachd ann an dathan a’ bhogha-froise.
Tha mòran daoine air Twitter ag ràdh gu robh an carbad-tiodhlachaidh mì-iomchaidh air sgath an àireamh de dhaoine LCDTQ+ a bhios a’ basachadh mar thoradh fèin-mharbhadh agus AIDS.
Tha seo a’ leatainn connspaid an-ùiridh nuair a chaidh cus tiocaidean a reic airson an tachartas a’ ciallachadh nach robh cuid de dhaoine comasach air a dhol ann. Cuideachd bha gearanan mu dheidhinn droch-làimhseachadh de chleasaichean agus luchd-aoigheachd.
As t-fhoghar chaidh a dhearbhadh gun robh am poileas a’ toirt sùil air ionmhas na buidhne agus aig coinneamh poblach as t-Samhain dhearbh Stiùirich na Buidhne, Chris Laing, gun robh £32,500 fhathast aca ri phàigheadh ris a’ chomhairle.
Anns an aithisg bliadhnail aca dhan riaghlaiche carthannais OSCR, a ghabhas a leughadh an-seo, dhearbh iad call còrr ‘s £46,000 an-uiridh, a’ toirt a-steach caiteachas mì-cheadaichte de £41,422.
• • •
Òraidean Fèis-pròise Inbhir Nis 2019
Bhidio dhe na h-òraidean aig Fèis-pròise Inbhir Nis 2019.
• • •
Cha tèid bratach a' bhogha-fhroise a thaisbeanadh le CNES rè Fèis-pròise na h-Innse Gall
Tha Comhairle nan Eilean Siar air dearbhadh nach tèid bratach a’ bhogha-fhroise a thaisbeanadh taobh a-muigh nan oifisean aca ann an Steòrnabhagh rè Fèis-pròise na h-Innse Gall a bhios a’ dol air adhart sa bhaile a-màireach.
Sgrìobh a’ chomhairle post-d ri eagraichean an tachartais air thòiseach air a’ chiad caismeachd aca an-uiridh anns an tuirt iad gur e poileasaidh a’ chomhairle gun a bhith a’ taisbeanadh diofar brataichean taobh a-muigh nan oifisean aca air sgàth an àireamh de dh’iarrtasan a bhios iad a’ faighinn agus iad airson a bhith cothromachd dhan a h-uile duine.
Tha am P&J ag aithris gu bheil a’ chomhairle a-nis air dearbhadh nach eil am poileasaidh seo air atharrachadh.
A dh’aindeoin an co-dhùnadh, tha eagraichean an tachartais air moladh a thoirt air a’ chomhairle airson an taic. Thuirt Susan Erbida, Cathraiche Comataidh Fèis-pròise na h-Innse Gall:
“Feumaidh mi ràdh, gu bheil a’ chomhairle air a bhith glè thaiceil – ged nach eil brathach a’ bhogha-fhroise againn fhathast agus chan fhaigh sinn e ach tha sinn ag obair air sin.”
• • •
Fèis-pròise air a chumail san Òban airson a’ chiad turas
Chaidh caismeachd pròise a chumail san Òban an-dè airson a’ chiad turas a-riamh.
Bha an caismeachd aig teas-mheadhan sreath de thachartasan pròise thairis an deireadh sheachdain le luchd-caismeachd a’ coiseachd bho Cèarnag Stèisean an Òbain gu Markie Dans.
Nam measg bha Ministear airson Co-ionannachd, BPA Christina McKelvie agus Rùnaire a’ Chaibineit, BPA Mìcheal Russell.
A bharrachd air an caismeachd, chaidh bàl a chumail oidhche Shathairne anns an robh cuirm-cluich leis a’ bhanrigh-draga Venus Guytrap agus chaidh Tùr MhicCaig a shoillseachadh ann an dathan bratach a’ bhoga-fhrois.
Thig an tachartas gu crìoch le sgrìonadh sònraichte dhen fhilm, The Adventures of Priscilla, Queen of the Desert, oidhche Dhòmhnaich.
• • •
Draghan aig luchd-poileataigs SNP mu ath-leasachaidhean tar-ghnèitheach
Tha còig-deug neach-poileataigs an SNP air draghan a thogail mu phlanaichean Riaghaltas na h-Alba airson Achd Aithne Gnè ath-leasachadh.
Tha an Riaghaltas airson an achd ath-leasachadh gus am biodh e nas fhasa do dhaoine tar-ghnèitheach an gnè laghail aca atharrachadh.
Ach ann an litir, a chaidh a fhoillseachadh leis a’ phàipear-naidheachd Scotsman, thuirt am buidheann de luchd-poileataigs nach bu chòir dhan Riaghaltas a bhith ann an cabhaig airson mìneachadh nam faclan boireann agus fireann atharrachadh.
Chaidh an litir a shoidhnigeadh le triùir mhinistearan Riaghaltais, Kate Forbes, Ash Denham agus Ivan McKee, còmhla ris na BPA Joan McAlpine, Ruth Maguire, Christine Grahame agus Kenneth Gibson; na BP Carol Monaghan, Angus MacNeil, Joanna Cherry agus Particia; agus na comhairlichean Chris McEleny, Caroline McAllister, Shaun Macaulay agus Lynne Anderson.
Anns an litir aca, thuirt am buidheann gum biodh buaidh air poileasaidhean agus seirbheisean nan robh gnè agus aithneachadh gnè air am co-mheasgachadh agus chaidh draghan a thogail leotha gum faodadh leigeil le daoine an gnè aca fhèin atharrachadh gu laghail cron a dhèanamh air an dìon laghail a tha Achd Co-ionannachd a’ toirt do bhoireannaich.
Cuideachd thuirt iad gu bheil dealas aca uile do “chòirichean daonna, co-ionannachd agus urram dha na h-uile” agus chan eil iad ri gràin an aghaidh daoine tar-ghnèitheach le bhith a’ togail draghan mu na molaidhean.
Tha an litir a’ tighinn seachdain as dèidh dha nochdadh gun robh triùir BPA a’ càineadh seasamh a’ Phrìomh Mhinisteir Nicola Sturgeon a thaobh còirichean tar-ghnèitheach.
Chaidh na teachdaireachdan a lorg ann an còmhradh prìobhaideach air Twitter le seann neach-obrach an SNP a chur air adhart iad ri Phink Saltire.
Anns na teachdaireachdan bha Ash Denham, Ruth Maguire agus Gillian Martin a’ deasbad nan robh Nicola Sturgeon a’ dol an-aghaidh faireachdainn a’ phàrtaidh a thaobh ath-leasachaidhean gnè as dèidh i ràdh nach eil i a’ faicinn barrachd aithneachadh air còirichean tar-ghnèitheach mar chunnart dhi mar bhoireannach neo mar fheimineach.
Dè tha Riaghaltas na h-Alba a’ moladh?
Tha daoine tar-ghnèitheach comasach air an gnè laghail aca atharrachadh fon Achd Aithne Gnè ach airson sin a dhèanamh feumaidh iad dà aithisg mheidigeach a chur a-steach ri phannal a dhearbhas gu bheil mì-rian gnè orra. Cuideachd feumaidh iad dearbhadh gu bheil iad air a bhith a’ fuireach anns ann gnè aithnichte aca fad co-dhiù dà bhliadhna agus gu bheil iad an dùil a dhèanamh airson a’ chòrr dhen bheatha aca.
Tha an Riaghaltas dhen bheachd gur e pròiseas seann-fhasanta agus sàithteach a th’ ann an seo agus iad airson gluasad gu pròiseas fèin-aithneachaidh. Tha iad cuideachd airson an aois aig am faod neach an gnè laghail aca atharrachadh ìsleachadh bho 18 gu 16.
Tha laghan mar seo stèidhichte mar-thà ann an dùthchannan a leithid Èirinn, An Danmhairg, Nirribhidh agus Argentina.
• • •
Buill SNP a’ càineadh a’ Prìomh Mhinisteir airson a seasamh a thaobh còirichean tar-ghnèitheach
Chaidh teachdaireachdan a fhoillseachadh air loidhne anns a bheil triùir BPA SNP a’ càineadh seasamh a’ Phrìomh Mhinistear, Nicola Sturgeon, a thaobh còirichean tar-ghnèitheach agus ath-leasachaidhean air an Achd Aithne Gnè.
Chaidh na teachdaireachdan a lorg ann an còmhradh prìobhaideach air Twitter le seann neach-obrach an SNP a chur air adhart iad ri Phink Saltire.
Anns na teachdaireachdan, a ghabhas a leughadh gu h-ìseal, tha Ash Denham, Ruth Maguire agus Gillian Martin a’ deasbad ma tha Nicola Sturgeon a’ dol an-aghaidh faireachdainn a’ phàrtaidh a-thaobh ath-leasachaidhean gnè as dèidh i ràdh nach eil i a’ faicinn barrachd aithneachadh air còirichean tar-ghnèitheach mar chunnart dhi mar bhoireannach neo mar fheimineach.
‘S e Ruth Maguire BPA airson Coineagan a Deas agus ‘s i Neach-gairm Comataidh Co-ionannachd is Còireachan Daonna ann am Pàrlamaid na h-Alba. Bhiodh uallach oirre sgrùdadh èifeachdach agus cothromach air atharrachaidhean sam bith a mhol an Riaghaltas dhan Achd Aithne Gnè.
‘S e Gillian Martin BPA airson Siorrachd Obar Dheathain an Ear agus ‘s i Neach-gairm Comataidh na h-Àrainneachd, Atharrachadh na Gnàth-shìde agus Ath-leasachadh an Fhearainn.
‘S e Ash Denham BPA airson Dùn Èideann an Ear agus ‘s i na Ministear Chaibineat airson Sàbhailteachd Coimhearsnachd.
Ann an agallamh le Pink Saltire, thuirt an neach a lorg na teachdaireachdan:
“Chuir e iognadh orm an còmhradh fhaicinn. Cha toigh leam idir an dòigh anns a bhios daoine anns an SNP a’ bruidhinn mu dheidhinn daoine tar-ghnèitheach no na tha Joan McAlpine air a ràdh.”
“Chan eil cuid de dhaoine a’ faicinn na tha dha-rìreabh cudromach – gur docha gur e daoine tar-ghnèitheach am buidheann as iomallaiche anns a’ chomann-sòisealta an-dràsta agus gum bu chòir do na h-ìrean fèin-mharbhadh a-mhàin sealltainn gum bu chòir dhuinn dèanamh nas fheàrr.”
Tha eas-aonta mu na h-ath-leasachaidhean gnè air a bhith a’ fàs anns a’ phàrtaidh thairis na seachdainnean a dh’fhalbh le Joan McAlpine a’ càineadh buidhnean iomairt tar-ghnèitheach agus cuid de dhaoine ga càineadh airson beachdan oilbheumach a cho-roinn i air na meadhanan sòisealta.
Tha Riaghaltas na h-Alba, a tha air an stiùireadh leis an SNP, air dearbhadh mar-thà gu bheil iad airson laghan gnè ath-leasachadh gus am bi iad nas fhaisge air cleachdaidhean as fheàrr eadar-nàiseanta.
Mar fhreagairt air na teachdaireachdan thuirt neach-labhairt an SNP:
“Tha an SNP a’ toirt taic do chòirichean tar-ghnèitheach agus còirichean bhoireannach mar phàirt dhen dleastanas làidir againn airson còirichean daonna agus co-ionannachd.”
“Feumaidh daoine tar-ghnèitheach a bhith comasach air beathannan gun bhacaidhean neo-riatanach agus leth-bhreith.”
“Tha e cudromach gun tèid deasbad sam bith mu chòirichean tar-ghnèitheach agus còireachan bhoireannach a chumail le urram.”
Bho chaidh na teachdaireachdan a fhoillseachadh air loidhne tha buill eile an SNP, a leithid Mhairi Black, Stewart MacDonald agus Angela Crawley, air an taic aca do chòireachan tar-ghnèitheach a dhearbhadh air Twitter.
Dh’ iarr Pink Saltire air Ash Denham, Ruth Maguire agus Gillian Martin aithris a dhèanamh ach cha d’fhuair iad freagairt.
• • •
Prògram aithriseach ùr a’ soillseachadh beathannan banrighrean-draga Ghlaschu
Thèid prògram aithriseach ùr a shealltainn air BBC Scotland a-nochd (10f) a bheireas sùil air beathannan triùir bhanrighrean-draga ann an Glaschu.
Bidh am prògram a’ leantainn Barbara Le Bush fhad ‘s a tha i ag ullachadh airson Fèis-pròise Eilean Bhòid 2018, banrigh-draga Instagram Lawrence Chaney, agus Voss, caideat sa chabhlach mharsanta a tha dìreach air drag a thòiseachadh.
Tha fèill mhòr air drag an-dràsta le prògraman eile a leithid Ru Paul’s Drag Race ga thoirt ri ginealach ùr agus tha am prògram ag amas air coimhearsnachd drag Ghlaschu a shoillseachadh.
Faodar Mother Tuckers: Drag Queens of Glaschu fhaicinn air an t-sianal ùr BBC Scotland aig 10f oidhche Mhàirt.