An Gèidheal Ùr

Cuairt-litir #129

2025-09-19T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Nigel Farage

Tha Nigel Farage, a tha air dà sgaradh-pòsaidh fhaighinn, air ràdh gur ann eadar fear agus bean a tha an dàimh as seasmhaiche. Bha Farage a’ cumail co-labhairt naidheachd ag ainmeachadh gu bheil Danny Kruger air gluasadh gu Reform UK nuair a chaidh a fhaighneachd air nan robh e ag aontachadh le beachd Kruger gur e pòsadh eile-sheòrsach bun-stèidh sòisealtas sàbhailte agus soirbheachail. Chaidh Farage a chàineadh leis a’ BhP Làbarach, Nadia Whittome, a thuirt gun robh e ri gràin co-sheòrsachd, agus gum biodh còraichean na coimhearsnachd LGBT+ ann an cunnart fo riaghaltas Reform.

Stiùireadh an EHRC

Tha seann cho-cheannard nan Uaineach, Carla Denyer, air ìmpidh a chur air an riaghaltas leigeil le buill-phàrlamaid stiùireadh ur an EHRC air àiteachan aon-sheòrsach a dheasbad mus tèid a chur an gnìomh. Cha deach an stiùireadh ùr fhoillseachadh fhathast, ach tha dragh ann gum bi daoine tar-ghnèitheach air an casg bho bhith a’ cleachdadh seòmraichean-locair, taighean-beaga agus seirbheisean eile nach eil a’ co-fhreagairt ris a’ ghnè a chaidh a bhuileachadh orra aig àm am breith. Sgrìobh Denyer gu bheil dragh mhòr air daoine tar-ghnèitheach anns an roinn-phàrlamaid aice nach biodh iad comasach a bhith beò nam beathannan làitheil le prìobhaideachd agus urram.

Àiteachan aon-sheòrsach

Tha còrr ‘s 650 gnìomhachasan, Ben & Jerry’s, Lucy & Yak, agus Lush Cosmetics nam measg, air sgrìobhadh chun an Riaghaltas air thoiseach air foillseachadh stiùireadh ùr an EHRC ‘s iad ag ràdh nach obraicheadh casg air daoine tar-ghnèitheach bho àiteachan aon-sheòrsach. Thuirt iad gum biodh air luchd-obrach a bhith mar oifigearan-poileis a’ faighneachd ceistean sàrachail no sgrìobhainnean air daoine gus an gnè aca a dhearbhadh agus gum biodh iad ann an cunnart gearanan agus cùisean-lagha fhaighinn bho gach taobh.

Fox & Friends

Tha preasantair Fox News air ràdh gur e cùram-slàinte daingneachadh gnè ag adhbharachadh daoine tar-ghnèitheach a bhith a’ dèanamh gnìomhan ainneartach. Bha Rachel Campos Duffy, Lawrence B. Jones agus Kevin Corke a’ bruidhinn mu dheidhinn Tyler Robinson, a thug ionnsaigh mhairbhteach air an neach-iomairt on làimh dheis Charlie Kirk air Fox & Friends Didòmhnaich. Thuirt Jones gun deach Kirk a losgadh fhad ‘s bha e a’ bruidhinn mu dheidhinn luchd-losgaidh tar-ghnèitheach agus gun ro Robinson ann an dàimh le cuideigin a tha tar-ghnèitheach nuair dh’fhaighnich Campos-Duffy gu “dè a tha na drugaichean [a bhios iad a’ gabhail gus eadar-ghluasad] a’ dèanamh ris na bòdhagan agus nan inntinnean.

Nancy Mace / Ronny Jackson

Tha na Riochdairean Nancy Mace (Carolina a Deas) agus Ronny Jackson (Teagsas) air ràdh gum bu chòir do dhaoine tar-ghnèitheach a bhith air an cur gu ospadalan-inntinn ann an agallamhan fa-leth mun ionnsaigh mhairbhteach air an neach-iomairt on làimh dheis Charlie Kirk. Thuirt Mace gu bheil “tinneas air na daoine seo” agus gum bu chòir dhaibh a bhith air an glacadh ann an “straitjacket with a hard steel lock”. Chaidh iarraidh air Jackson nam bu chòirear ospadalan-inntinn a thoirt air ais agus thuirt e gur e ceannairciche a th’ ann an daoine tar-ghnèitheach, gu bheil trioblaidean saidhg-eòlach orra agus gum bu chòir dhaibh a bhith air an toirt far na sràidean.

Michigan

Tha luchd-poileataigs Poblachdach ann am Michigan air bile a chur a-steach feuchainn ri casg a chur air pòrn agus susbaint sam bith co-cheangailte ri daoine tar-ghnèitheach agus luchd-taisbeantais draga. Nan tèid a dhèanamh ‘na lagh, tha am bile a’ moladh binn suas ri 20 bliadhna sa phrìosan agus/no peanas-airgid suas ri $100,000 air duine sam bith a thèid a dhìteadh fodha.

Cuairt-litir #126

2025-08-29T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Ball-coise

Chaidh neach-taice Baile Eilginn a chur a-mach à Stèideam Borough Briggs rè geama an aghaidh Baile Dhùn Èideann Disathairne às dèidh dhaibh droch-bheul homafòbach a thoirt do chluicheadair à Dùn Èideann. Thuirt a’ chlub gur e eucoir gràin a th’ ann an gràin co-sheòrsachd agus gun àireamh nan stiùbhart aig geamannan san àm ri teachd àrdachadh.

Middlesbrough

Tha diùraidh ann am Middlesbrough air tar-bhoireannach fhaighinn ciontach de thrì chasaidean drabastachd. Chaidh Ciara Watkins, 21, a chur an greim fo chasaid gun tug i ionnsaigh feiseil air fireannach, nach robh air ainmeachadh, o chionn ’s nach tuirt i ris gun bheil i tar-ghnèitheach mus an robh iad ri gnìomhan feiseil. Thuirt an neach-lagha aice ged a tha i air a bhith ag aithneachadh mar bhoireannach fad ochd bliadhna, nach eil i air cùram-slàinte daingneachadh gnè sam bith fhaighinn fhathast agus gu bheil e follaiseach nach e boireannach bith-eòlasach a th’ innte. Thuirt am fireannach ge-tà nach robh fios aige gus an do dh’innis i dha ann an teachdaireachd às dèidh làimhe agus mar sin co-dhùin an diùraidh nach robh am fireannach comasach air aonta fiosraichte a thoirt seachad. Thuirt am britheamh gum bi aice ris a h-ainm a cur ri clàr nan drabastairean ro cheann trì latha agus gun tèid binn a chur oirre air an 10mh den Dàmhair an dèidh do dh’aithisg chùl-fhiosrachaidh a bhith air a cur ri chèile.

Murt Jesse Baird agus Luke Davies

Chaidh seann oifigear-poilis anns a’ Chuimrigh Nuadh a Deas, Beau Lamarre-Condon às àicheadh gun do mhurt e càraid ghèidh ann an Sydney anns a’ Ghearran 2024. Chaidh cuirp Jesse Baird, 26, agus Luke Davies, 29, a lorg air làrach dùthchail ann am Bungonia, baile beag mu 115 mìle taobh a-muigh Sydney, ochd latha as dèidh dhaibh air an dol a dhìth, agus iad air a bhith air an losgadh le gunna. Chaidh Lamarre-Condon, seann bhràmair Bhaird, a chur an greim an dèidh mar a chaidh fuil agus peilear bho a ghunna a lorg aig taigh Bhaird.

An Fhraing

Tha fireannach Tuiniseach gun dachaigh an greim ann an Paras fo chasaid gun do mhurt e ceathrar fhear. Chaidh na fireannaich ainmeachadh mar Franz, Frangach 48 bliadhna a dh’aois a chaidh a dhìth 11 An Lùnastal; Sami, Aildireach 21 bliadhna a dh’aois a chaidh a dhìth 7mh An Lùnastal ; Abdellah, Arabach 21 bliadhna a dh’aois a chaidh a dhìth 26mh an t-Iuchar; agus Amir, Tuiniseach 26 bliadhna a dh’aois 31d an t-Iuchar. Thuirt na Poilis gun robh dithis aca leth-rùisgte agus bheil iad dhen bheachd gur e gràin co-sheòrsachd a tha air cùlaibh air na muirt an dèidh mar a chaidh na cuirp a thoirt a-mach as an t-Seine faisg air làrach far a bhios fireannaich gèidh a’ coinneachadh ri chèile.

Idaho

Tha fireannach, 51, an greim ann Caldwell, Idaho, fo chasaid gun do mhurt e a nighean. Dh’aidich Delbert Cornish ris na Poilis gun do loisg e Onyx Cornish, 18, na ceann mus do suain e a corp ann am bratach-pròise mar chuimhneachan oirre. Nuair a ràinig a mhac dhachaigh às an sgoil, dh’innis e dha na rinn e agus thomh e a’ ghunna ris ach bha am balach comasach air athair a dhì-armachadh mus do chur e gairm ris na Poilis.

Ceinia

Tha cùirt ann an Ceinia air an riaghaltas òrdachadh reachdas a thoirt a-steach gus dìon laghail a thoirt do thar-bhoireannaich agus tar-fhireannaich. Bha an cùirt a’ riaghladh air cùis Shieys Chepkosgei, tar-bhoireannach a chaidh a chur an grèim ann an 2019 fo chasaid breug-riochdachaidh. Riaghail a’ chùirt gun deach a còraichean a briseadh nuair a chaidh a rùsgadh agus a chur fo iomadh sgrùdadh meadaigeach gus a gnè a dhearbhadh. Fhuair Chepkosgeil 1,000,000 tastan Ceineach (mu £5,700) de dh’airgead-dìolaidh.

Cuairt-litir #120

2025-07-20T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Àrd-choimiseanair nan Dùthchannan Aonaichte airson Còraichean Daonna

Tha ro-aithisg bho Oifis Àrd-choimiseanair nan Dùthchannan Aonaichte airson Còraichean Daonna ag ràdh gu bheil neo-shàstachd gnè leanmhainneach agus gu bheil iomairt eadar-nàiseanta a’ criomadh còraichean bhoireannach le bhith ag atharrachadh am mìneachadh laghail a th’ aig fireannach agus boireannach. Tha an aithisg ag ràdh gu bheil buill-stàite an UN a tha a’ gabhail ri tar-bhoireannaich a’ diùltadh aithne laghail eadar-dhealtaichte do bhoireannaich, buidheann so-leònta a tha feumach air dìon fo lagh eadar-nàiseanta. Mhol ùghdar na h-aithisge, Reem Alsalem, co-dhùnadh Prìomh-chùirt na Rìoghachd Aonaichte air dè a th’ ann am boireannaich. Tha i a’ moladh casg air daoine sam bith fo aois 18 bho bhith a’ dèanamh eadar-ghluasad laghail no sòisealta, is i ag ràdh gum bu chòir dhaibh dol fo leigheas saidhg-eòlach na’ àite.

PrEP

Chaidh iomairt ùr a chur air bhog gus fireannaich gèidh agus dà-sheòrsach, agus gu h-àraid an fheadhainn òg agus dubh, a brosnachadh PrEP (leigheas ro-chasgach airson daoine a tha gu bhith ann an cunnart HIV fhaighinn) a chleachdadh. Bidh an iomairt, PrEP Protects, a’ ruith fad an t-samhraidh. Tha e a’ tighinn as dèidh gun deach stiùireadh meadaigeach ùr fhoillseachadh a tha ag ràdh gum bu chòir do PhREP a bhith air a thoirt don a h-uile neach a tha ga iarraidh gun a bhith a’ faighneachd orra mun ghnìomhachd feise aca. A-rèir Buidheann Tèarainteachd Slàinte na Rìoghachd Aonaichte, chan eil 36% den fheadhainn fo aois 25 a tha ann an cunnart HIV a’ gabhail PrEP, an taca ri 24% den fheadainn eadar 25-34. Tha fireannaich dubh cuideachd mòran nas eu-coltaiche PrEP a ghabhail na tha fireannaich geal. Faodar barrachd fhiosrachaidh mu PhREP fhaighinn aig https://www.startswithme.org.uk

RSHE

Tha Roinn an Fhoghlaim air an stiùireadh aca air foghlam feise agus dhàimhean ùrachadh is ag innse do sgoiltean gum bu chòir dhaibh a bhith mothachail gu bheil deasbad a’ dol mu dhearbh-aithnean gnè, agus nach bu dhaibh a bhith gan teagaisg mar firinn shuidhichte. Thuirt Rùnaire an Fhoghlaim, Gillian Keegan, gun robh an stiùireadh feumach air ùrachadh gus dèanamh cinnteach gu bheil clann air an dìon bho susbaint neo-iomchaidh. Thèid an stiùireadh ùr a chur an gnìomh air a’ chiad latha den t-Sultain 2026.

Draghan mu chòirichean tar-ghnèitheach

Tha Coimiseanair airson Còraichean Daonna aig Comhairle na Roinn-Eòrpa, Michael O’Flaherty, air draghan nochdadh mun làimhseachadh den fheadhainn thar-ghnèitheach anns an Rìoghachd Aonaichte. Thuirt e gu bheil tar-fhireannaich agus tar-bhoireannaich air a bhith air an cur dhan iomall, agus iad air a bhith air an cur fo mion-sgrùdadh poilitigeach agus poblach.

Poilis air riaghailtean neo-phàirteachd a bhriseadh

Tha britheamh air riaghladh gun do bhris Poilis Northumbria riaghailtean neo-phàirteachd nuair a thug iad pàirt ann an Northern Pride an-uiridh. Tha e a’ tighinn as dèidh do leasbach, Lindsey Smith, ath-sgrùdadh laghail iarraidh orra airson taic a nochdadh do “ideòlas-gnè” le bhith a’ caismeachd le bratach-pròise progress - bratach bogha-froise le dathan a bharrachd a’ riochdachadh nan coimhearsnachdan tar-ghnèitheach, eadar-sheòrsach agus daoine LGBT+ de dhath. Ged a dh’aithnich am britheamh nach deach amharas a tharraing air neo-phàirteachd an fheachd air fad, thuirt e gun robh faireachdainn ann gun robh am feachd agus/no an Àrd-chonstabal air taic a nochdadh do “ideòlas gnè agus còraichean tar-ghnèitheach” o chionn ‘s gun robh na h-oifigearan a bha an làthair a’ caismeachd mar bhuidhean le deisean-poilis orra agus brataichean-pròise aca.

Boghadaireachd

Tha buidheann riaghlaidh boghadaireachd na Rìoghachd Aonaichte, Archery GB, air casg a chur air tar-bhoireannaich bho fharpaisean bhoireannach ri linn co-dhùnadh na prìomh-chùirte air gnè. Ann an suidheachaidhean nuair nach eil gnè an neach-bogha soilleir, tha na riaghailtean ùra aca ag ràdh gum faod iad farpais, agus gun tèid ath-sgrùdadh a dhèanamh air an tachartas leis na rèitearan. Tha iad ag ràdh gun faodar stad a chur air farpaisean ma tha deasbad ann, ach iad a’ moladh gun a bhith a’ dèanamh sin ach ann an suidheachaidhean far a bhios cuideigin ann an cunnart.

Cùram-slàinte daingneachadh gnè ann an Èirinn

Chomharraich Achd Aithneachadh Gnè na h-Èireann 10 bliadhna air an 15mh den Iuchar, agus tha iomairtichean a’ cleachdadh an tachartais gus gairm airson ath-leasachadh air còraichean tar-ghnèitheach agus eadar-sheòrsach.

Tha buidheann-iomairt na Gender Rebels air ath-chuinge a chur gu Ministear Slàinte na h-Èireann, Jennifer Carroll MacNeil ag iarraidh orra cùram-slàinte tar-ghnèitheach ath-leasachadh agus buidheann-gnìomha stèidheachadh gus siostam ùra a co-dhealbhachadh còmhla ris a’ choimhearsnachd tar-ghnèitheach. Thuirt am buidheann gu bheil an siostam làithreach briste, le euslaintich a’ feitheamh còrr ‘s deich bliadhna airson cothrom fhaighinn air cùram-slàinte daingneachadh gnè. Thuirt iad cuideachd gu bheil neo-ghnìomhachd na stàite ag adhbharachadh cron agus dh’ainmich iad rannsachadh a rinn TENI (Lìonra Èireannach na Co-ionnannachd Tar-ghnèithich) ann an 2013 a sheall gun robh 84% de dhaoine tar-ghnèitheach nach eil air cùram-slàinte daingneachadh gnè fhaighinn fhathast beachdachadh air làmh a chur nam beathannan fhèin, an taca ri dìreach 4% de dhaoine a tha air cothrom fhaighinn air.

Bha còrr ’s 10,000 neach an-làthair aig Trans & Intersex Pride ann am Baile Àtha Cliath Disathairne agus tha eagraichean an fhèis air litir a chur gu grunn phàrtaidhean poileataigeach ag iarraidh orra an taic a chur ri còraichean tar-ghnèitheach agus eadar-sheòrsach.

Ionnsaigh air tar-chaileag

Chaidh casaidean a chur às leth còignear deugairean gun tug iad ionnsaigh air tar-chaileag a bha air a suidheachadh ann an ionad glacas do bhalaich ann an Washington D.C. Dh’fhulang i peirceall briste agus bha aice ri dol a dh’ospadal airson cùram.

Riaghailtean nas fhosgailte a thaobh fala a thoirt seachad ann an Astràilia

Tha Astràilia air na riaghailtean a-thaobh a bhith a’ toirt seachad fala a lùghdachadh. Fon na riaghailtean ùra, bidh fireannaich gèidh, fireannaich dà-sheòrsach agus tar-bhoireannaich uile comasach air fuil agus plasma a thoirt seachad cho fhad ’s nach eil iad air a bhith ri feise le cèile ùr, no iomadh chèile, anns na trì mìosan a dh’fhalbh. Bidh daoine a bhios a’ gabhail PrEP a-nis comasach air plasma a thoirt seachad, ach iad fhathast air an casg bho bhith a’ toirt seachad fala. Cuideachd tha fhathast casg air daoine air a bheil HIV, agus na cèilean aca, bho bhith a’ toirt seachad fala no plasma.

Casg air cluicheadair ball-coise Astràilianach

Tha Lìg Ball-coise Astràilia air casg ceithir geama a chur air an cluicheadair sgioba an West Coast Eagles, Jack Graham, as dèidh gun do chleachd e cànan homafòbach an-aghaidh cluicheadair na Giants rè gheama ann am Peairt air an 4mh latha den Iuchar. Leig Graham fhèin fios dhan AFL mu dheidhinn, agus rinn e leisgeul prìobhaideachd do chluicheadair na Giants agus do Cheann-suidhe an AFL. Bidh e cuideachd a’ frithealadh a’ chùrsa-trèanaidh Pride in Sport.

Cuairt-litir #119

2025-07-11T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Carragh-cuimhne Nàiseanta Stonewall

Tha Riaghaltas nan Stàitean Aonaichte air iomraidhean air daoine dà-sheòrsach a chur à làrach-lìn Carragh-cuimhne Nàiseanta Stonewall. Tha e a’ tighinn as dèidh gun do chur iad às iomraidhean air daoine tar-ghnèitheach bhon làrach-lìn anns a’ Ghearran. Tha seann dreachan den làrach-lìn, a ghabhas fhaicinn ann an Wayback Machine an Internet Archive, a’ sealltainn gun deach an giorrachadh LGBTQ+ a chur às dhan làrach-lìn anns a’ Ghearran agus LGB a chur na’ àite, ach tha e air tighinn am follais gun deach ùrachadh a-rithist anns a’ Ghiblean gus “gay and lesbian” a chleachdadh an àite LGB. A dh’aindeoin na h-atharrachaidhean, tha dealbhan de daoine tar-ghnèitheach agus dà-sheòrsach, leithid Marsha P. Johnson agus Sylvia Rivera, fhathast a’ nochdadh air an làrach-lìn. Tha còrr is 47,000 neach air ath-chuinge an-aghaidh nan atharrachaidhean a shoidhnigeadh.

Caraid aon-sheòrsach air aithneachadh le cùirt Ucràineach

Tha cùirt anns an Ucràin air aithne oifigeil a thoirt do charaid aon-sheòrsach airson a’ chiad turas. Tha Zoryan Kis agus Tymur Levchuk air a bhith a’ fuireach còmhla o chionn 2013, agus phòs iad anns na Stàitean Aonaichte ann an 2023. Thug iad Ministreachd nan Dùthchannan Cèin gu cùirt ann an 2024 as dèidh gun do dhiùlt iad am pòsadh aithneachadh. Thuirt a’ chùirt o chionn ‘s gu bheil an Ucràin na soidhniche don ECHR (Cùmhnant Eòrpach nan Còraichean Daonna), tha dleastanas aca air aithneachadh laghail agus dìon a thoirt do theaghlaichean aon-sheòrsach. Chaidh reachdas a dhèanadh companasan-catharra laghail a thoirt don phàrlamaid ann an 2023, ach tha adhartas air a bhith gu math slaodach ri linn a’ chogaidh an-aghaidh na Ruise.

Tar-bhoireannach dubh air a murt ann an Washington D.C.

Tha na Poilis ann an Washington D.C. a’ sireadh fhiosrachaidh mu mhurt tar-bhoireannaich dhuibh. Bha Dream Johnson, 28, air a losgadh le gunna iomadh turas, agus chaidh a lorg anns an t-sràid tràth madainn Disathairne. Chaidh a toirt a dh’ospadal, ach cha do mhair beò i. Tha na Poilis air ràdh nach eil fianais sam bith ann fhathast gur e eucoir-gràin a bh’ ann, ach thuirt a teaghlaich ri pàipear-naidheachd an Washington Blade gun robh iad air aithris fhaighinn bho neach-fianais gun deach triùir fireannaich na comhair i agus gun do dh’èigh iad ainm lùghdachail dhi mus deach a losgadh iomadh turas le fear dhiubh. Tha na Poilis a’ tabhann $25,000 airson fiosrachadh sam bith a bheireas am murtair gu ceartas.

Ball-coise

Tha Comann Ball-coise Shasainn air ainmeachadh gum bi e riatanach do chluicheadairean tar-fhireannach ri aithris-àichidh a shoidhnigeadh nam biodh iad airson cluiche an ath sheusan. Feumaidh iad aontachadh gur e “boireannaich bith-eòlasach” a th’ annta agus gu bheil iad fo chunnart nas motha a’ cluich an-aghaidh fireannaich bith-eòlasach. Bidh e cuideachd riatanach gum bidh ìre de theisteostaron eadar 7.7 agus 29.4 nanomoles anns gach liotair de fhuil aca. Tha tar-bhoireannaich air a bhith air an casg bho bhith a’ cluich an-aghaidh boireannaich bith-eòlasach bho thoiseach an Ògmhios.

Cuairt-litir #116

2025-06-20T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Alba

Làraichean gnè shingilte

Tha am buidheann chòraichean bhoireannach, Sex Matters, air litir a chur do Riaghaltas na h-Alba ag ràdh gun toir iad an riaghaltas gu cùirt airson fàilligeadh a chur riaghladh na Prìomh Chùirte air gnè bith-eòlasach agus làraichean gnè shingilte an gnìomh. Tha am buidheann For Women Scotland cuideachd air ràdh mar-thà gun toir iad an riaghaltas gu lagh dàil a chur air làraichean gnè shingilte. Tha Riaghaltas na h-Alba air ràdh gu bheil iad a’ gabhail ri riaghladh na Prìomh Chùirte ach gu bheil iad a’ feitheamh ri stiùireadh bhon EHRC (Coimisean na Co-ionnannachd agus Còraichean Daonna)

An Rìoghachd Aonaichte

Bratach-pròise air a ghoid

Tha rannsachadh a’ leantainn ann an Congleton as dèidh gun deach bratach-pròise a mhilleadh airson an t-seasamh uair anns na trì bliadhna mu dheireadh. ‘S e na thachair an turas mu dheireadh, gun deach am bratach a mhilleadh 13 An t-Ògmhios, chaidh bratach ùr a chur ‘na àite, ach chaidh an tè sin a ghoid an aon oidhche. Dh’iarr na Poilis air neach sam bith le fiosrachadh fòn a chur gu 101 agus àireamh na cùise IML 2110748 a thoirt seachad.

An Roinn-Eòrpa

Ospadal an Naomh Seumas

Tha Ospadal an Naomh Seumas ann am Baile Àtha Cliath air an leisgeul a thabhann do tar-bhoireannach airson leigheas èiginneach a dhiùltadh dhi an-uiridh. Chaidh Paige Behan fo obair-lannsa daingneachadh gnè anns a’ Ghearmailt, ach ghabh i galar as dèidh dhi tilleadh a Èirinn. Chaidh i a dh’Ospadal an Naomh Seumas ach dhiùlt trì roinnean an ospadail leigheas a thoirt dhi. Chaidh i an uair sin a dh’Ospadal Nàiseanta Mhàthrachais air Sràid Holles far an dh’fhuair i leigheas. Rinn i gearain reachdail ag ràdh gun do bhris Ospadal an Naomh Seumas laghan co-ionnannachd na h-Èireann. Dh’aontaich an ospadal coinneachadh ri TENI (Lìonra Co-ionnannachd Tar-ghnèitheach na h-Èireann) gus na draghan mun chùram-slàinte daingneachadh gnè a tha ri fhaighinn do dh’euslaintich tar-ghnèitheach a tha a’ tilleadh a Èirinn à thall thairis a dheasbad. Thuirt Paige nach e ach cìrean de thrioblaid siostamach anns an HSE (Seirbheis Slàinte na h-Èireann) a th’ ann, agus nach eil i a’ cur earbsa ann an comas na dùthcha a bhith a’ gabhail cùram air na saoranaich tar-ghnèitheach aice tuilleadh.

Pròis Bhudapest

Tha na Poilis anns an Ungair air casg a chur air Pròis Bhudapest na bliadhna seo, ach tha am Mèar Gergely Karacsony ag ràdh gun tèid e air adhart co-dhiù no co-dheth. Tha e mì-laghail anns an Ungair co-sheòrsachd a bhrosnachadh do chlann, agus thuirt am Prìomhaire Viktor Orban anns a’ Ghearran nach biodh tachartas na bliadhna seo a’ dol air adhart. Anns a’ Mhàrt ghabh an riaghaltas aige ri lagh a leigeas ris na Poilis siostaman aithneachaidh-aodainn a chleachdadh gus freastalaichean aig tachartas sam bith a bhrosnaicheas co-sheòrsachd do chlann aithneachadh agus peanas-airgid eadar £14 agus £420 a chur orra. Tha fhathast dùil gum bi na deichean mhìltean a’ shiubhal a Budapest às an Ungair agus nas fhaide air falbh airson an tachartas air an 28mh latha den Ògmhios.

Aimearaga a Tuath

Loidhne-taice òigridh LGBT+ ann an cunnart dùnadh

Tha carthannas an Trevor Project, a bhios a’ toirt comhairleachadh èiginneach do dh’òigridh LGDTCEN+ ann an cunnart làmh a chur nam beathannan fhèin, air ràdh gu bheil rianachd a’ Chinn-shuidhe Trump air dùnadh an loidhne-taice speisealaichte aca òrdachadh bhon 17mh latha den Iuchair. Thuirt neach-labhairt an Taighe-ghil “nach ann airson seirbheis còmhraidh far a bheil clann air am brosnachadh gabhail ri ideòlas gnè radaigeach le ‘luchd-comhairleachaidh’ gun chead am pàrantan a tha airgead an luchd-pàighidh cìse”. Tha an Trevor Project air litir fosgailte, a chaidh a shoidhnigeadh le Daniel Radcliffe, Pedro Pascal, Ariana Grande, Troye Sivan agus mòran a bharrachd, fhoillseachadh air an làrach-lìn aca ag iarraidh air an riaghaltas an loidhne-taice a shàbhaladh.

Faodaidh Tennessee casg a chur air cùram-slàinte daingneachadh gnè

Tha Prìomh Chùirt nan Stàitean Aonaichte air bhòtadh 6-3 gus leigeil le Stàit Tennessee casg a chur air cùram-slàinte daingneachadh gnè do dh’euslaintich fo aois 18. Chaidh an cùis a thoirt gu lagh le buidhean de theaghlaichean aig a bheil clann tar-ghnèitheach. Thagair an neach-lagha aca gun robh an casg a’ briseadh laghan co-ionnannachd leis gu bheil e a’ cur casg air dotairean bho bhith a’ toirt casgan-inbhidheachd no teiripe ionadachadh bhrodagan do mhion-aoisich tar-ghnèitheach ach gum faod iad fhathast an toirt do mhion-aoisich cios-ghnèitheach. ’S e co-dhùnadh na Prìomh Chùirte ge-tà nach ann air mion-aoisich tar-ghnèitheach a tha an casg a-mach, ach mion-aoisich sam bith, gun umhail air an gnè aca, air a bheil neo-shàstachd gnè no mì-rian dearbh-aithne gnè agus tha an eadar-dhealachadh sin a’ ciallachadh nach eil e ri leth-bhreith. Tha dùil ann a-nis gun tèid an co-dhùnadh seo a chleachdadh mar ro-shampall airson cùisean-lagha mar seo ann an stàitean eile.

Fireannach an greim ann an Siorrachd Marion Florida

Chaidh fireannach 35 bliadhna a dh’aois a chur an greim ann an Siorrachd Marion, Florida as dèidh gun do mhaoidh e gun loisgeadh e air tachartas pròise aig Central Florida Fairgrounds Disathairne a chaidh. Chaidh Michael Wilcox a chur an greim Dihaoine as dèidh gun deach fios a leigeil dhan FBI gun robh e air an tachartas a mhaoidheadh ann am postaichean air Facebook agus Instagram le dealbh de chuideigin a’ luchdachadh gunna is an caipsean “Can’t expect God to do all the work”.

Fireannach an greim ann an Wilton Manors, Florida

Chaidh fireannach 31 bliadhna a dh’aois a chur an greim Disathairne ann an Walton Manors, Florida as dèidh gun do dh’fheuch e a’ dol tro lorgaire-meatailte aig tachartas-pròise le gunna. Thathar ag aithris nach do stad Michael Monheit as dèidh dha an lorgaire-meatailte a chur dheth, agus gun do leig e seachad oifigearan a thuirt ris stad. Nuair a chaidh a chur an greim lorg na Poilis gunna-làimhe agus dà mhagazine 9mm luchdaichte air.

Cuairt-litir #108

2025-04-25T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Bile Riochdachadh nan Gnèithean air Bùird Phoblach

Tha Riaghaltas na h-Alba air ràdh gun tèid Bile Riochdachadh nan Gnèithean air Bùird Phoblach atharrachadh as dèidh don Phrìomh Chùirt riaghladh air dè th’ ann am boireannach. Gu ruige seo, tha tar-bhoireannaich agus boireannaich cios-ghnèitheach air a bhith air an cunntadh ri chèile nuair a bhathar a’ coimhead air àireamhan riochdachaidh air bùird phoblach. Dhearbh an Riaghaltas cuideachd nach eil planaichean aca tuilleadh Bile Ath‑leasachadh Aithneachadh Gnè ath-bheothachadh.

John Swinney

Chaidh faighneachd air Prìomh-mhinistear na h-Alba, John Swinney, iomadh turas nan robh e a’ creidsinn gur boireannaich a th’ anns an tar-bhoireannaich rè coinneamh naidheachd ann an Glaschu Diciadain. Nuair a chaidh ìmpidh air gum freagair e, thuirt e gu bheil e a’ gabhail ri co-dhùnadh na prìomh-chùirte.

Raibeart Paulin

Chaidh binn dà bhliadhna sa phrìosan air fireannach eucoirean feiseil air dithis bhalach ann an Inbhir Nis eadar 2012 agus 2014.

Bha Raibeart “Robbie” Paulin na choidse aig Highland Wildcats, sgioba ball-coise Aimeireaganach stèidhte ann an Inbhir Nis, nuair a stiùir e dithis bhalach fo 18 bliadhna a dh’aois ri bhith a’ dèanamh dealbhan is bhidiothan drùiseantach a dhèanamh.

Chuala a’ chùirt gun do thog Paulin dealbhan de bhod bhalaich, a bha 17 bliadhna a dh’aois, agus gun do chlàr e bhidio fhad ’s a bha am balach ri fèin-bhrodadh.

Chuala iad cuideachd gun do thog Paulin dealbhan de bhod bhalach eile, a bha 15 bliadhna a dh’aois, agus gun do dh’fheuch e ri bhidio den bhalach a chlàradh fhad ’s a bha e ri fèin-bhrodadh.

Tha an dithis a-nis anns nam ficheadan, ’s thuirt iad ris a’ chùirt gun tuirt Paulin dhaibh gum b’ ann airson stuth-teagaisg a bha na dealbhan ’s bhidiothan.

Bha Paulin air a dhol às àicheadh nan casaidean ’s e a’ cumail a-mach gu bheil na balaich diombach ris, ach fhuair an diùraidh ciontach e.

A bharrachd air binn prìosain, chaidh Paulin a chur air clàr nan drabastairean fad deich bliadhna.

Maggie Chapman

Tha neach-lagha Albannach ag iarraidh leisgeul bhon a’ BhPA Uaineach, Maggie Chapman, as dèidh gun tuirt i gun robh co-dhùnadh na Prìomh Chùirte claon-bhreitheach agus làn gràin.

Bha Chapman a’ bruidhinn aig togail-fianais an aghaidh a’ cho-dhùnaidh ann an Obar Dheathain Disathairne nuair a thuirt i: “We say not in our name to the bigotry, prejudice and hatred that we see coming from the Supreme Court and from so many other institutions in our society.”

Dh’iarr Roddy Dunlop KC leisgeul “làn agus luath” oirre agus dh’fhaighnich e am bu chòir dhi leigeil dhith a dreuchd mar Leas-chathraiche Comataidh Co-ionnanachd Pàrlamaid na h-Alba

Keir Starmer

Chan eil Keir Starmer fhathast a’ creidsinn gur e boireannaich a th’ ann an tar-bhoireannaich.

Thuirt Starmer ri pàipear-naidheachd The Times anns a’ Mhàrt 2022: ‘’S e inbheach boireann a th’ ann am boireannach, agus a bharrachd air sin ‘s boireannaich a th’ ann an tar-bhoireannaich, agus chan e dìreach mo bheachd a tha sin - ‘s ann an lagh a tha sin a-cheana”.

Chaidh a fhaighneachd air Neach-labhairt a’ Phrìomhaire ma tha e fhathast a’ creidsinn sin às dèidh don Phrìomh Chùirt riaghladh air dè a th’ ann am boireannach, ‘s thuirt e: “Chan eil, tha co-dhùnadh na Prìomh-chùirte gu math soilleir a-thaobh Achd na Co-ionnannachd gur e boireannach bith-eòlasach a th’ ann am boireannach”.

A bharrachd air sin thuirt Starmer fhèin ri ITV West Country: “’S e inbheach boireann a th’ ann am boireannach, agus tha a’ chùirt air sin a dhèanamh gu tur soilleir.

Bridget Phillipson

Tha am Ministear airson Boireannaich agus Co-ionnannachd ann an Westminster, Bridget Phillipson, air ràdh ann an agallamh air BBC Radio 4 gum bu chòir do thar-bhoireannaich taighean-beaga a tha a’ co-fhreagairt ris an “gnè bith-eòlasach” aca a chleachdadh. Chur am preasantair, Anna Foster, ìmpidh air Phillipson an uair sin gun soilleirich i nan robh sin a’ ciallachadh gum bu chòir do thar-bhoireannaich taighean-beaga fireannach a’ chleachdadh nuair a tha iad a-muigh is a-mach, ach thuirt Phillipson gu bheil taighean-beaga uile-sheòrsach aig mòran gnìomhachasan san latha an-diugh.

Stèisean Waverley

Tha Network Rail air ràdh nach eil geàrdan-faire ag iarraidh air daoine na cairtean-aithneachaidh aca a shealltainn mus faigh iad a-steach gu na taighean-beaga aig Stèisean Waverley.

Bha aca ri aithris a dhèanamh as dèidh gun deach post a cho-roinneadh air nam meadhanan-sòisealta a leugh: “Warning. I attended the trans protest in Edinburgh today, before I joined the protest I needed to use the bathroom (like a normal person) I ended up going to the toilets at Waverley and noticed that the security were asking for ID…1. Why? 2. wtf? 3. I walked away because I’m not being asked for ID to f***ing pee”.

Thuirt neach-labhairt Network Rail ri pàipear-naidheachd an National “nach eil fìrinn sam bith anns an sgeulachd”.

Togail-fianais

Bidh buill na coimhearsnachd LGDTCEN+ a’ togail fianais ann an Inbhir Nis Disathairne an-aghaidh riaghladh na Prìomh Chùirte.

Cruinnichidh iad taobh a-muigh Talla a’ Bhaile aig 2f agus bidh fàilte air a h-uile neach a tha airson pàirt a ghabhail ann.

Taighean-beaga sgoile

Tha britheamh air ràdh gun cur i òrdugh air sgoiltean-stàite ann an Alba gus taighean-beaga fa-leth a thabhann do nigheanan agus balaich stèidhte air gnè aig àm am breithe.

Tha e a’ tighinn as dèidh gun tug pàrantan Bun-sgoil Earlston gu lagh mu taighean-beaga uile-sheòrsach aig an sgoil agus as dèidh riaghladh na Prìomh Chùirte air dè th’ ann am boireannach.

A-rèir am P&J, tha taighean-beaga uile-sheòrsach aig Acadamaidh Alanais, Àrd-sgoil Inbhir Ùige, Acadamaidh Rìoghail Inbhir Nis agus Acadamaidh Bhaile Theàrlaich agus Comhairle na Gàidhealtachd a-nis a’ measadh buaidh an òrduigh orra.

Maraton Lunnainn

Tha stiùiriche Maraton Lunnainn, Hugh Brasher, air ràdh nach tèid na riaghailtean aca atharrachadh ri linn co-dhùnadh na Prìomh Chùirte, agus gum faod tar-bhoireannaich fhathast clàradh airson ruith ann an rèis nam ban Didòmhnaich. Thuirt e gu bheil iad a’ feitheamh ri stiùireadh oifigeil bho Choimisean na Co-ionnanachd agus Chòraichean Daonna mus dèan iad co-dhùnadh air na riaghailtean airson rèisean san àm ri teachd.

Mississippi

Tha Prìomh Chùirt Mhississippi air riaghladh nach fhaod daoine tar-ghnèitheach fo 21 bliadhna a dh’ aois na h-ainmean aca atharrachadh air sgàth ’s nach eil iad sean gu leòr airson co-dhùnadh cho chudromach ri sin a dhèanamh. A dh’aindeoin sin, ge-tà, tha an stàit fhathast a leigeil le balaich 17 bliadhna a dh’aois is nigheanan cho òg ri 15 bliadhna a dh’aois pòsadh agus teaghlaichean a thòiseachadh (cho fhad ’s a tha cead phàrant aca).

Minnesota

Tha Àrd-neach-tagraidh Mhinnesota, Keith Ellison, air cùis-lagha a thogail an-aghaidh rianachd Dhòmhnaill Thrump airson casg a chur air tar-chaileagan bho bhith a’ gabhail pàirt ann an spòrs a tha a’ co-fhreagairt ris an dearbh-aithne gnè aca. Tha an cùis-lagha a’ tagairt gu bheil an òrdugh, a shoidhnig Trump air an 5mh latha den Ghearran, a’ briseadh Title IX agus Bun-reachd nan Stàitean Aonaichte. Thuirt Ellison aig coinneamh naidheachd Dimàirt gu bheil “Minnesota air a’ chùis-lagha seo a thogail gus stad a chur air Ceann-suidhe Trump bho bhith a’ burraidheachd clann so-leònta anns an stàit seo”.

Cuairt-litir #86

2024-11-15T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Murchadh Friseal

Tha Ball Tòraidheach ann am Pàrlamaid na h-Alba air gearan a thogail an aghaidh Poileas Alba an dèidh gun deach post a sgrìobh e mun fheadhainn neo-bhìnearaidh a chlàradh mar thachartas gràin.

Chaidh aithisg a dhèanamh dhan phoileas mu phost a cho-roinn Murchadh Friseal air na meadhanan sòisealta anns an t-Samhain 2023. Sgrìobh e: “Choosing to identify as ‘non-binary’ is as valid as choosing to identify as a cat.”

Co-dhùin oifigearan nach e eucoir gràin a bh’ ann, agus chaidh a chlàradh mar thachartas gràin no NCHI (Non-Crime Hate Incident) an àite sin.

Bhagair Friseal air Poileas Alba a thoirt gu lagh agus dh’iarr e orra an NCHI a chur às, ach dhiùlt iad e.

Tha Friseal a-nis air gearan oifigeil a thogail an aghaidh Poileas Alba, agus e a’ cumail a-mach gun deach a làimhseachadh ann an dòigh neo-chothromach agus gun deach a chòir air saor-labhairt a bhriseadh.

Aithisg an Dtr. Cass

Tha còrr ‘s 200 saidhg-eòlaiche air litir fosgailte do Rùnaire an Fhoghlaim Bridget Phillipson a shoidhnigeadh ‘s iad a’ nochdadh draghan mun sgrùdadh a rinn an Dtr. Hilary Cass air cùram-slàinte don fheadhainn thar-ghnèitheach anns an Rìoghachd Aonaichte.

Chaidh an litir a co-sgrìobhadh leis an Dtr. Dan O’Hare, àrd-òraidiche aig Oilthigh Bhristol, an Dtr. Cora Sargeant, àrd-cho-eòlaiche na teagaisg aig Oilthigh Southampton agus Christie Ghent, foghlainneach saidhg-eòlais.

Sgrìobh iad: “We welcome the diverse range of opinions of colleagues on the question of how professional psychologists can best support gender-diverse children and young people. We are concerned, however, that there are approaches to the discussion that invalidate the experiences and identities of trans and gender-diverse children and young people.”

“Such invalidation is fundamentally discriminatory, contrary to equality and human rights legislation, and has the potential to cause harm. We reaffirm our commitment to act in accordance with the Health and Care Professions Council’s standards of proficiency, and kindly but firmly challenge discrimination where we identify it.”

“While we appreciate that not all children and young people with diverse-gender experiences will seek transition-related healthcare, we agree with the fundamental finding of the review and the worldwide consensus that transition-related healthcare should be available and accessible to the children and young people who need it”.

“Holistic-transition-related healthcare becomes challenging in an overstretched and under-funded health care system [and the recommendations are] likely to continue to influence policy decisions which perpetuate existing inequality.”

“Gender diversity is a genuine aspect of the human experience, present across cultures and throughout history. Exploration and education about this diversity are welcome, but we hold that we should always refrain from attempting to change someone’s gender identity.”

Chaidh aithisg an Dtr. Cass a fhoillseachadh anns a’ Ghiblean ‘s am measg rudan eile mhol i faiceall ann a bhith a’ toirt seachad casgan inbhidheachd - mar thoradh air a sin, chaidh casg gun chrìoch a chur air dotairean san Dùbhlachd bho bhith a’ toirt seachad casgan-inbhidheachd do dh’euslaintich fo aois 18 bliadhna a dh’aois.

Dh’iarr na soidhnichean air Phillipson:

fàilte a chur air càineadh air molaidhean an Dtr. Cass;
coinneachadh riutha;
agus a taice a chur ri casg air na cleachdaidhean gu lèir ris an canar “teiripe iompachaidh”.

Ionnsaighean Grindr ann am Baile Àtha Cliath

Dh’aidich fireannach, 24, gun do chleachd e an aplacaid Grindr gus triùir fhear a thargaid, ionnsaigh a thoirt orra agus an robaigeadh.

Chaidh Micheal Quinn, à Choolock, Baile Àtha Cliath, a chur an greim anns an Iuchar 2024 fo dà chasaid robaidh agus aon chasaid oidhirp air robadh.

Chaidh Quinn a dhìteadh ann an Èirinn agus Sasainn roimhe de dh’ionnsaigh, dh’ionnsaigh a dh’adhbhraich cron, mhèirle, robadh agus casaid gun robh cainb aige.

Chur am britheamh dàil air binn, ach thèid Quinn a chumail an grèim fhad ‘s a thathas a’ feitheamh ri aithisgean. Thuirt am britheamh ge-tà gum bu chòir do Quinn a bhith an dùil ri binn phrìosain.

Usbagastàn

Tha ceannard a’ phàrtaidh phoilitigeach Milliy Tiklanish, a tha ann an co-bhanntachd còmhla ri pàrtaidh riaghlaidh na h-Usbagastàn, air ràdh gu bheil an riaghaltas a’ dreachdadh reachdas a chuireadh casg air “propaganda” LGDTCEN+.

Tha co-sheòrsachd mì-laghail ann an Usbagastàn, agus faodaidh fireannaich binn 3 bliadhna sa phrìosan fhaighinn nan tèid a dhìteadh dheth.

Bryan Smith

Tha rannsachadh a’ leantainn an dèidh gun do bhàsaich an DJ mòr-chòrdte gèidh Bryan Smith ann an Washington DC.

Chaidh Smith fhaighinn gun mhothachadh air an t-sràid mu 5m 27mh An Dàmhair.

Chaidh a thoirt a dh’ospadal ionadail, far an deach ainmeachadh an ceann greis.

Chaidh a ghluasad gu ospadal ann an Virginia an dèidh sin far an do bhàsaich e 7mh An t-Samhain.

Tha na poilis air ràdh gu bheil fios aca gun deach Smith

Cuairt-litir #85

2024-11-08T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Burraidheachd

Tha sgrùdadh a rinn a’ charthannas LGDTCEN+, Just Like Us, a’ sealltainn gu bheil 10% de sgoilearan tar-ghnèitheach eadar aois 10 agus 18 anns an Rìoghachd Aonaichte air burraidheachd fhulang gach latha - sin an taca ri 2% de sgoilearan cios-ghnèitheach.

Oidhche chlub ùr do bhoireannaich LGDTCEN+

Cuiridh Table 45, Baile Àtha Cliath fàilte air boireannaich leasbach, dà-sheòrsach, neo-bhìnearaidh agus tar-ghnèitheach aig oidhche chlub an Rose Party 14mh An t-Samhain.

Gheibhear tiocaidean an-seo.

Ionnsaigh ann am Bellingham, Washington

Tha poilis a’ rannsachadh ionnsaigh air tar-bhalach, 16 bliadhna a dh’aois, ann am Bellingham, Washington 22 An Dàmhair. Tha am Bellingham Herald ag aithris gun do thilg buidheann chloinne tàthagan a bha ri oillt thar-ghnèitheach air a’ bhalach fhad ’s a bha iad ga phutadh agus ga bhualadh, agus gun deach a thoirt a dh’ospadal ‘s leth-dhùil gun robh criothnachadh-eanchainn air.

Teiripe iompachaidh ann an Sealainn Nuadh

Tha boireannach ag iarraidh air Riaghaltas Sealainn Nuaidh aideachadh gun deach a cur fo chreòtachd air sgàth ’s a taobhadh-feise.

Dh’fhulang Joan Bellingham call-cuimhne, losgadh mu a ceann, agus doille eadar-mheadhanach an dèidh gun deach i fo theiripe ECT (dealan-ghrad-chlisgeach) còrr ‘s 200 turas nuair a bha i fo chùram Ospadal na Bana-phrionnsa Mairead ann an Christchurch eadar 1970 agus 1982.

Tha i air airgead-dìolaidh còrr ‘s $15,000 (NZ) fhaighinn mar-thà, ach i airson ‘s gun aidich an riaghaltas gur e creòtachd a th’ ann an teiripe iompachaidh agus nach e leigheas meadaigeach a th’ ann.

Cuairt-litir #84

2024-11-01T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Seirbheis Phrìosan na h-Alba

Tha Poileas Alba a’ rannsachadh mar a chaidh boireannach cios-ghnèitheach a chur gu prìosan fireannach o chionn ’s gun do ghabh na h-ùghdarrasan i airson fireannach.

Chaidh a chur gu HMP Perth, ach chaidh a cumail na h-aonar nuair a chaidh am mearachd a lorg. Chaidh a toirt gu HMP Cornton Vale an ath latha.

Ball-coise Gàidhealach

Tha Na Gaeil Aeracha air tighinn a’ chiad sgioba LGDTCEN+ gus geama deireannach cupa a bhuannachadh ann an eachdraidh an GAA (Cumann Lúthchleas Gael).

Dh’ainmich an LGFA (Cumann Peil Gael na mBan) gu robh an sgioba air a’ chupa a bhuannachadh as dèidh dhaibh ath-sgrùdadh a dhèanamh air a’ gheama a chluich iad an-aghaidh CLG Naomh Breandáin anns an Lùnastal.

Tha Na Gaeil Aeracha air a bhith a’ cluich ball-coise Gàidhealach nam ban o chionn 2021, ball-coise Gàidhealach o chionn 2022, camanachd Èireannach o chionn 2023 agus thòisich iad air camanachd Èireannach nam ban a chluich na bu tràithe air a’ bhliadhna.

EMBER

Tha an AIIHPC (All Ireland Institute of Hospice and Palliative Care), LGBT Ireland agus an Irish Hospice Foundation air bileag-iùil ùr fhoillseachadh le fiosrachadh mu na dùbhlain shònraichte a dh’fhaodadh a bhith air daoine LGDTCEN+ nuair a tha iad a’ dèiligeadh ri bhàs, chaoidh agus chùram deiridh-bheatha. Gheibhear am bileag-iùil, EMBER, an-seo.

Iapan

Chaidh Àrd-chùirt Tokyo an dàrna cùirt gus riaghladh gu bheil an casg a th’ air pòsadh aon-sheòrsach ann an Iapan neo-bhun-reachdail.

Ruig cùirt nas ìsle an aon cho-dhùnadh ann an 2022.

Mhòl an Àrd-chùirt gum bu chòir dhan lagh a bhith air atharrachadh gus còireachan co-ionnann a thoirt do chàraidean aon-sheòrsach ach thuirt an riaghaltas gun cumadh iad sùil air cùisean lagha eile a tha a’ feitheamh.

Teagsas

Tha Stàit Theagsais a’ toirt dàrna dotair gu cùirt airson cùram slàinte daingneachadh gnè a thabhann do mhion-aoisich.

Chaidh aithris roimhe gu bheil an stàit a’ toirt Dtr. May C. Lau gu cùirt airson teiripe ionadachadh bhrodagan a thoirt do 21 euslaintich ann an Dallas an dèidh gun deach casg a chur air a bhith ga thabhann do mhion-aoisich an-uiridh.

Tha an cùirt a-nis a’ toirt Dtr. Hector M. Granados gu cùirt airson casgan inbheachd agus/no teiripe ionadachadh bhrodagan a thabhann do 21 mhion-aoisich ann an El Paso.

Faodar an dithis aca na ceadan-meadaigeach aca a chaill nan tèid an dìteadh agus tha an cùis-lagha an-aghaidh Granados ag iarraidh air airgead-dìolaidh suas ri $1,000,000 a phàigheadh.

Cuairt-litir #83

2024-10-24T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Glasgow & Clyde Rape Crisis

Tha an t-ionad-taice Glasgow & Clyde Rape Crisis air dealachadh bhon bhuidheann charthannais Rape Crisis Scotland air sgàth aimhreit mu ghnè. Tha iad ag ràdh nach eil iad airson tar-bhoireannaich fhastadh, gu bheil iad airson seirbheis do dh’aon ghnè a tha air a ruith le boireannaich a-mhàin a thabhann agus gu bheil seo eu-coltach ris a’ bhuidhinn nàiseanta.

Ball-basgaid

Thèid a’ chiad gheama bhuill-bhasgaid LGDTCEN+ a-riamh ann an Èirinn a chumail Disathairne 9mh An t-Samhain. Bidh Shamrock Síoga agus Belfast Dykesketball a’ cluiche an-aghaidh a cheile 4f ann an Clontarf, Baile Atha Chliath ’s iad a’ togail airgead airson a’ charthannas TENI (Transgender Equality Network Ireland). Cosgaidh tiocaidean €5 agus bidh fàilte chridheil air a h-uile neach. Gheibhear barrachd fhiosrachaidh an-seo.

An Ruis

Tha na Poilis ann am Mosgo air còrr ‘s 50 neach an grèim an dèidh dhaibh dà bhar LGDECEN+ a rannsachadh 11 an Dàmhair.

Thathar ag aithris gun dh’fhuair iad gearanan mu thaisbeanaidhean draga agus gnìomhachd aon-sheòrsach a’ dol air adhart ann am follais a’ phobaill.

Ann an 2013 chur Riaghaltas na Ruise casg air “propaganda LGDTCEN+” do mhion-aoisich, agus chaidh an casg a mheudachadh gu daoine de gach aois ann an 2022.

Ann an 2023 thuirt Àrd-chùirt na Ruise gur e gluasad “eastramach” a th’ anns an “gluasad LGBT eadar-nàiseanta”.

Dòmhnall Trump

Tha Dòmhnall Trump air mì-fhios a sgaoileadh mu chlann tar-ghnèitheach a-rithist. Bha e a’ dèanamh òraid iomairt aig Knockout Barber anns a’ Bhronx Diardaoin ’s e a’ bruidhinn mu fhoghlam nuair a thuirt e: “Reading, writing and arithmetic. No transgender, no operations. You know, they take your kid. There are some places, your boy leaves for school, comes back a girl. Without parental consent. What’s that about?”

Carolina a Deas

Tha cùirt ann an Carolina a Deas air binn-bheatha a chur air Daqua Lameek Ritter airson murt tar-bhoireannaich anns an Lùnastal 2019. Chaidh Pebble LaDime Doe a losgadh le gunna trì tursan na ceann. Cha tug an diùraidh ach ceithir uairean gus Ritter fhaighinn ciontach nuair a nochd e air am beulaibh sa Ghearran.

Teagsas

Tha òrdanas ùr ann an Odessa, Teagsas a’ leigeil ri neach sam bith, seach oifigearan an riaghaltais, neach tar-ghnèitheach a thoirt gu cùirt ma chleachdas iad taigh-beag a tha a’ co-thaobhadh ris an gnè.

Tha an òrdanas ag ràdh gum bi aig an neach tar-ghnèitheach cosgaisean na cùirte agus an neach-lagha a phàigheadh agus airgead-dìolaidh £10,000 air a’ char as lugha a phàigheadh don neach-agairt.

A bharrachd air sin thèid am faighinn ciontach de Mhì-ghnìomh Ìre C agus thèid peanas-airgid $500 orra.

Tha daoine ciorramach a tha air an cuideachadh le neach de ghnè eile neo-bhuailteach don òrdanas.

Pagastàn

Tha na Poilis ann am Pagastàn air triùir fireannaich a chur an grèim fo chasaid gun do mhuirt iad dithis thar-bhoireannach.

Chaidh an luchd-fulaing ainmeachadh mar Salmanu agus Nazik, agus bha iad air an sàthadh gu bas Oidhche Dhòmhnaich anns an dachaigh aca ann am Mardan. Thathar ag aithris gun robh daoine tar-ghnèitheach eile san taigh aig an aon àm, ach gun robh iad am falach ann an taigh beag.

Chaidh an luchd-amharais a chur an grèim Diciadain ’s iad air na muirt aideachadh.

Cuairt-litir #82

2024-10-18T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Trans Kids Deserve Better

Leig am buidheann-iomairt, Trans Kids Deserve Better, mu 6,000 greollan mu sgaoil aig co-labhairt buidhinn tar-thoirmeasgach an LGB Alliance ann an Lunnainn Dihaoine sa chaidh.

Chaidh an LGB Alliance a stèidheachadh ann an 2019 mar roghainn tar-thoirmeasgach eile an àite Stonewall.

Chaidh a’ cho-labhairt fhosgladh le òraid bhon t-ùghdar, JK Rowling, a tha air a tighinn ainmeil airson na beachdan gnè-chriotaigeach aice.

Thuirt Trans Kids Deserve Better gur b’ e amas a’ cho-labhairt nam biodh e air a dhol air adhart oillt thar-ghnèitheach agus mì-fhios a sgaoileadh.

Èirinn

Tha Seanadh na h-Èireann air Bile nan Eucoirean gràin aontachadh.

Cuirear am lagh ùr binnean nas fhada air an fheadhainn a thèid a dhìteadh de dh’eucoirean-gràin.

Èirinn a Tuath

Nochd fireannach ann an cùirt ann am Bèal Feirste Diardaoin fo chasaid gun deach e an riochd chaileige òige gus dealbhan mì-iomchaidh fhaighinn bho chaileagan gèidh eile.

Chuala a’ chùirt gun do thargaidich Alexander McCartney, 26, à Chonntaidh Àird Mhaca, còrr is 70 clann-nighinn eadar aois 10 agus 16 air feadh an t-saoghail.

Chuir caileag Aimeireaganach 12 bliadhna a dh’aois làmh na beatha fhèin anns a’ Chèitean 2018 an dèidh do McCartney mhaoidh oirre a dealbhan a leigeil mu sgaoil.

Dh’aidich McCartney casaid de dhuine-mharbhadh, 59 casaidean de dhubh-chìs, agus 70 casaid gun do bhrosnaich e leanabh-nighinn ri gnìomhachdan feiseil. Dh’aidich e cuideachd iomadh chasaid de bhith a’ dèanamh agus a’ sgaoileadh dealbhan mì-iomchaidh de chlann-nighinn.

Thèid binn air an ath-sheachdain.

Janne Puhakka

Chaidh Janne Puhakka fhaighinn marbh ann an Espoo, An Fhionnlann Didòmhnaich.

Ann an 2019, chaidh Puhakka a’ chiad chluicheadair hocaidh deigh proifeiseanta anns an Fhionnlann gus tighinn a-mach mar ghèidh.

Tha na Poilis air fireannach, 65, a chur an greim fo amharas gun do loisg e Puhakka, 29, le gunna, agus tha aithrisean ann gur e a dhuine, Rolf Nordmo, a th’ ann.

An Eadailt

Tha Seanadh na h-Eadailte air bhòtadh 84-58 airson reachdas an-aghaidh ionadachadh a leasachadh.

Tha ionadachadh mì-laghail anns an Eadailt mar-thà, ach cuiridh an lagh ùr seo casg air an fheadhainn a bhios airson a dhol thall-thairis gus màthair-ionaid a lorg agus faodar 2 bhliadhna sa phrìosan agus càin suas ri €1m air an fheadhainn a thèid a dhìteadh fodha.

Ged a tha an lagh ùr a’ buntainn ris na h-uile, thathar an dùil gun toir e buaidh nas motha air càraidean LGDTCEN+ a tha nas buailtiche a bhith an urrachd ri ionadachadh.

Teagsas

Tha Stàite Theagsais a’ toirt dotair à Dallas gu cùirt airson cùram slàinte daingneachadh gnè a thabhann do 21 mhion-aoisich.

Chaidh cùram-slàinte daingneachadh gnè do mhion-aoisich a dhèanamh mì-laghail ann an Teagsas ann an 2023.

Thathar ag aithris gun tug May C. Lau teiripe ionadachadh bhrodagan an dèidh gun deach an casg a chur an gnìomh.

Faodar i an cead-meideagach aice a chaill nan tèid a dìteadh.

Cuairt-litir #81

2024-10-11T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Baile Àtha Cliath

Tha Cùirt Sgìreil Baile Àtha Chliath air binn 14 mìos sa phrìosan a chur air fireannach a thilg tàthag homafòbach air fireannach eile mus do bhreab e a chù.

Gay Project

Tha buidheann LGDTC+ an Gay Project air ionad-coimhearsnachd ùr a cheannach ann an Corcaigh.

Tha e feumach air beagan ath-nuadhachadh gus a dhèanamh cinnteach gu bheil e làn-ruigsinneach dha na h-uile, ach tha dùil gun solaraich e àite sònraichte don choimhearsnachd LGDTC+ airson cruinneachaidhean sòisealta, bùthan-obrach agus seirbheisean taice.

Scéalta ár Stampaí

Anns an t-sreath seo ionnsaigh sianar mu na h-ìomhaighean a tha rim faicinn air stampaichean na h-Èireann, nam measg tha an stampa suaicheanta “Bród”.

Faodar a choimhead air TG4 a-nis.

Poblachd nan Deideanach / An Ruis

Tha buidhean chòraichean daonna an SK SOS ann am Poblachd nan Deideanach air aithris gu bheil an Ruis a’ sparradh air prìosanaich ghèidh sabaid an uchd a’ bhlàir anns an Ucràin.

Thathar ag aithris gun deach sparradh air co-dhiù seachdnar fhear gèidh taghadh eadar “tairgsinn” a dhol gu uchd a’ bhlàir no èirig 1.5m rùbal (mu £10,000) a phàigheadh.

Oilthigh Wyoming

Chur sgioba ball-bholaidh nam ban aig Oilthigh Wyoming dheth geama an-aghaidh Oilthigh Stàit San José air sgàth ’s gu bheil cluicheadair tar-ghnèitheach air sgioba San José.

Bha iad gu bhith a’ cluich an-aghaidh a chèile 5 An Dàmhair, ach chaidh an geama a chur dheth 1 An Dàmhair.

Chaidh aithris gun do chur Riaghladair na Stàite, Cheri Steinmetz, agus eadar 15-20 luchd-lagha an ainmean ri litir fosgailte gu Ceann-suidhe an Oilthighe, Ed Seidel, agus Stiùiriche-spòrs, Tom Burman, a’ cur ìmpidh orra an geama a chur dheth.

’S e Oilthigh Wyoming an treasamh sgioba gus geama an-aghaidh San José a chur dheth.

Pennsylvania

Tha sgìre-sgoile ann am Pennsylvania air $8,700 a chosg gus uinneagan faire a stàladh ann an taighean-beaga gnè-neodrach aig Emory H. Markle Middle School ann an Hanover.

Cha deach uinneagan a stàladh ann an taighean-beaga do sgoilearan cios-ghnèitheach.

Leigidh na h-uinneagan air an fheadhainn a-muigh fhaicinn taobh a-staigh raon sinc nan taighean-beaga, gun a bhith a’ faicinn taobh a-staigh nan stàilichean fèin, agus mar sin tha Ceann-suidhe Bòrd na Sgìre-sgoile Matthew Gelazela air ràdh nach eil iad a’ briseadh a-steach air prìobhaideachd nan sgoilearan.

Tha Bòrd na Sgìre-sgoile cuideachd air ràdh nach fhaod luchd-teagaisg ach ainmean agus riochdairean laghail nan sgoilearan a chleachdadh.

Uganda

Tha Uganda air eadar $470m agus $1.6b a chaill bhon a chur i lagh an-aghaidh co-sheòrsachd an gnìomh anns a’ Chèitean 2023.

Sin a-rèir aithisg a tha Open for Business, buidheann de gnìomhachasan eadar-nàiseanta a bhios a’ brosnachadh ion-ghabhaltas, air fhoillseachadh.

Thuirt Banca na Cruinne goirid as dèidh sin gun cuireadh iad stad air iasadan ùra don dhùthaich, o chionn ’s gun robh an reachdas a’ dol an-aghaidh an luachan.

Tha Open for Business ag ràdh gu bheil an dùthaich air seilbheachd cèin, taic-airgead, agus airgead bho mhalairt agus turasachd a chiall cuideachd agus iad air measadh gun caill an dùthaich eadar $2.3 agus $8.3b thairis air còig bliadhna.

Cuairt-litir #80

2024-10-04T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

JK Rowling

Tha JK Rowling air ràdh air X/Twitter gun do chlàraich i a creideamh mar “believer in biology” air Cunntas-shluaigh na h-Alba 2022.

A-rèir figearan a’ chunntas-shluaigh bha Rowling, a tha iomraiteach airson na beachdan gnè-chriotaigeach aice, a-measg 2,883 neach a sgrìobh gu bheil iad a’ creidsinn ann am bith-eòlas.

Bha iad a’ gabhail pàirt ann an iomairt leis a’ bhuidheann For Women Scotland a dh’iarr air daoine fianais a thogail an aghaidh na ceistean mu ghnè a nochd anns a’ chunntas-sluaigh. Natasha Reddington Romanov

Chaidh tar-bhoireannach fhaighinn marbh Disathairne ann an Abhainn Tàimis, Lunnainn.

Chaidh Natasha Reddington Romanov, 55, fhaicinn mu dheireadh ann an Soho mu 2m air 21d latha den t-Sultain.

Cha do nochd i aig a obair Diluain agus fhuair na Poilis fios air an 24mh latha den t-Sultain gun robh i air a dhol a dhìth.

Fhuairear a corp air bruach na h-aibhne faisg air Vauxhall Bridge madainn Disathairne. Thuirt na Poilis nach robh dad amharasach mun chùis agus gun tèid aithisg a chur dhan chrùnair.

An t-Aonadh Eòrpach

Tha Cùirt-cheartais na h-Eòrpa air riaghladh gum feum dùthchannan an Aonaidh Eòrpaich aithneachadh laghail a thoirt do dhaoine a tha air an gnè atharrachadh ann an dùthchannan eile taobh a-staigh an AE.

Tha an riaghladh air tighinn an dèidh gun do dhiùlt Romàinia aithneachadh laghail a thoirt do tar-fhireannach Romàineach a bha air a ainm is a ghnè atharrachadh fhad ’s a bha e a’ fuireach anns an Rìoghachd Aonaichte eadar 2008 agus 2020.

Thuirt a’ chùirt gu bheil gnè “na phàirt bhunaiteach” de dhearbh-aithne neach” agus mura biodh ball-stàit ga aithneachadh gun dèanadh e duilgheadasan nam beatha làitheil agus gun cuireadh e bacadh air an còir aca a bhith a’ gluasad agus a’ fuireach air feadh an Aonaidh Eòrpaich.

A’ Chairtbheil

Tha Neach-labhairt Pàrlamaid na Cairtbheile air bile an-aghaidh muinntir LGDTCEN+ a shoidhnigeadh ‘na lagh an dèidh gun do dhiùilt Ceann-suidhe na Dùthcha, Salome Zourabichvili, a shoidhnigeadh.

Mar a chaidh aithris roimhe, tha an lagh ùr a’ cur casg air pòsadh aon-sheòrsach, cùram slàinte daingneachadh gnè, daoine LGDTCEN+ anns nam meadhanan, brataichean pròise ann an àiteachan poblach agus tachartasan pròise.

KCFD

Tha KCFD (Kansas City Fire Department) air $1.3m a phàigheadh do neach-smàlaidh leasbach a tha air sàrachadh a fhulang fad dà dheichead.

Chaidh Rebecca Reynolds na neach-smàlaidh aig aois 40 agus chaidh a targaideachadh gu tric leis na co-obraichean agus na àrd-chinn aice air sgàth ’s an aois agus an taobhadh-feise aice.

Thathar ag aithris gur e seo an rèiteachadh as motha ann an eachdraidh an KCFD, rud a tha neo-shuarach ann an stàit far a bheil leth-bhreith a-thaobh taobhadh-feise fhathast laghail.

Washington D.C.

Tha McDonalds air $930,000 a phàigheadh do neach-obrach tar-ghnèitheach an-dèidh dhi sàrachadh a fhulang san àite-obrach.

Thoisich Diana Portillo Medrano ag obair aig McDonalds ann an 2011 an-dèidh dhi gluasad bho El Salvador agus mus d’rinn i eadar-ghluasad sòisealta.

Thòisich na àrd-cinn agus na co-obraichean a sàrachadh nuair a thoisich i air eadar-ghluasad a dhèanamh. Rinn i gearan mu a dheidhinn agus chaidh a chur às a dreuchd. Cho-dhùin an diùraidh gun deach leth-bhreith a dhèanamh oirre o chionn ’s gu bheil i tar-ghnèitheach agus chaidh airgead-dìolaidh luach $700,000 a thoirt dhi agus $230,000 a bharrachd airson am mòr-dhragh a bh’ oirre.

Cuairt-litir #70

2024-09-29T12:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Dùthaich nan Tàidh

Chaidh Dùthaich nan Tàidh a’ chiad dhùthaich ann an taobh an ear-dheas na h-Àisia gus pòsadh aon-sheòrsach aithneachadh an dèidh gun do shoidhnig an Rìgh Maha Vajiralongkorn reachdas ùr Dimàirt. Chan eil pòsadh aon-sheòrsach ceadaichte ach ann an dà dhùthaich Àisianach eile; Taidh-Bhàn (2019) agus Neapàl (2023). Tha dùil ris a’ chiad bhainnsean aon-sheòrsach ann an Dùthaich nan Tàidh san Fhaoilleach.

Fèin-mhurt

Tha sgrùdadh a rinn carthannas an Trevor Project air 35,196 deugairean tar-ghnèitheach aois 13-17 anns an 19 stàitean a tha air laghan a tha ri oillt thar-ghnèitheach a chur an gnìomh a’ sealltainn gu bheil an àireamh dhaibh a tha air feuchainn làmh a chur nam beathannan fhèin air àrdachadh 72% bho chaidh na laghan a chur an gnìomh.

Thathar a’ measadh gun robh mu 508 bilean an-aghaidh na coimhearsnachd LGDTCEN+ a thoirt a-steach air feadh nan Stàitean Aonaichte ann an 2023 a-mhàin agus tha eòlaichean ag ràdh ged nach do shoirbhich a h-uile bile tha am bagairt air buaidh mhòr a thoirt air slàinte-inntinn dhaoine thar-ghnèitheach òga. Faodar an sgrùdadh leughadh an-seo.

Tottenham Hotspur FC

Tha Tottenham Hotspur FC air cuid de na luchd-taice aca a chàineadh airson faclan homafòbach a channtaireachd rè gheama an aghaidh Manchester United na bu tràithe an-diugh.

Thuirt a’ chluba gun robh e “mì-iomchaidh” agus “ro-oilbheumach” agus gun obraicheadh iad còmhla ris a’ chomann LGDTCEN+ aca, Proud Lilywhites, gus dèanamh cinnteach gu bheil fàilte air a h-uile neach-taice aig geamannan.

Thuirt Proud Lilywhites: “We’re all Spurs fans just like you. When you sing these songs you’re telling us we don’t belong; and we do, as much as you do”.

Cuairt-litir #78

2024-09-20T13:30:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

A’ Chairtbheil

Tha na Poilis anns a’ Chairtbheil air fireannach, 26 bliadhna a dh’aois, a chur an grèim fo chasaid muirt an dèidh mar a chaidh am modail tar-ghnèitheach, Kesaria Abramidze, 37, a shàthadh gu bàs aig an taigh Diciadain.

Thachair e aon latha an dèidh gun do ghabh buill-phàrlamaid ri lagh ùr a tha a’ cur cuingealachaidhean cruaidh air còraichean na coimhearsnachd LGDTCEN+.

Leigidh an lagh ùr le ùghdarrasan casg a chur air brataichean pròise ann an àiteachan poblach is tachartasan pròise, agus caisgireachd a dhèanamh air filmichean is leabhraichean. Tha e cuideachd a’ cur casg air obair-lannsa daingneachadh gnè.

Tha casg air daoine gèidh bho bhith a’ pòsadh no ag uchd-mhacachadh cloinne mar thà.

Wyoming

Tha Bòrd Cead-saoraidh Wyoming air diùltadh cead-saoraidh a thoirt do Russell Henderson a chaidh a dhìteadh de chasaidean muirt agus de dh’eucoirean gràin an dèidh gun do mhurt e agus Aaron McKinney an t-oileanach gèidh, Matthew Shepard, ann an 1998.

Tha murt Shepard fhathast aon de na eucoirean gràin as miosa ann an nua-eachdraidh nan Stàitean Aonaichte.

Chaidh a bhualadh agus a chreòtachadh mus deach a cheangal ri feansa agus a fhàgail a dhol gu bàs. Chaidh a lorg ann an còma an dèidh 18 uair a thìde agus chaidh aithris gun robh aodann làn còmhdaichte le fuil ach far an deach a ghlanadh leis a dheòir.

Chaidh a thoirt a dh’ospadal, ach bha cròn mòr air a dhèanamh air eanchainn agus bhàsaich e an dèidh sia latha air siostam taice-beatha. Bha e 21 bliadhna a dh’aois.

Dh’fheuch McKinney gu neo-shoirbheachail ris an “gay panic defense” a chleachdadh sa chùirt - ’s e sin nuair a bhios ciontaiche a’ cur coire air neach-fhulang gèidh le bhith ag ràdh gun do dh’fheuch an neach-fhulang ri ionnsaigh dhrabasta a thoirt orra.

Chaidh dà bhinn-bheatha leantach a chur air an dithis aca.

Chaidh an Matthew Shepard and James Byrd, Jr., Hate Crimes Prevention Act a chur an gnìomh ann an 2009 agus e a’ cur binnean nas làidire air an fheadhainn a tha air an dìteadh de dh’eucoirean gràin.

Minnesota

Chaidh binn 30 bliadhna sa phrìosan a chur air Damarean Kaylon Bible, 25 bliadhna a dh’aois, an dèidh mar a chaidh a dhìteadh den thar-bhoireannach Chùbach agus Thùsanach, Savannah Ryan Williams, a mhurt anns an t-Samhain 2023.

Chuala a’ chùirt gun do ghabh Bible amharas de Williams, 38, an dèidh dha obair-shèididh fhaighinn bhuaipe agus gun do loisg e le gunna na ceann i.

Carolina a Tuath

Thuirt Michele Morrow, a tha a’ seasamh airson a bhith na Stiùireadair Seirbheisean Foghlaim ann an Carolina a Tuath, an t-seachdain-sa gu bheil an soidhne “+” a tha a’ nochdadh ann an LGDTCEN+ a’ toirt a-steach spùinneadairean-cloinne.

Bha Morrow a’ toirt ionnsaigh air an neach-dùbhlain aice, Mo Green, agus an taic a fhuair e bhon bhuidheann Equality North Carolina nuair a sgrìobh i air na meadhanan sòisealta:

“Mo Green has stated that the Parental Bill of Rights ‘Does more harm than good’ and he states he is ‘proudly endorsed’ by Equality NC, whose mission statement is to promote LGBTQ+ power

NEWSFLASH…the ‘+’ includes PEDOPH*L*A!!

Mo Green will NOT keep our children safe!”

Kentucky

Shoidhnig an Riaghladair Andy Beshear àithne-ghnìomha Diciadain a chur casg air cleachdaidhean ris an canar “teiripe iompachaidh” ann an Kentucky.

Chleachd e na cumhachdan-gnìomha aige an dèidh don Phàrtaidh Phoblachdach bhòtadh an aghaidh caisg grunn thuras sna bliadhnaichean roimhe.

Tha teiripe iompachaidh a-nis mì-laghail ann an 23 stàitean Aimeireaganach.

Trans Library

Tha sgioba de cheathra teiripichean air goireas ùr a chur a bhog gus muinntir thar-ghnèitheach a chuideachadh le bhith a’ dèiligeadh ri rudan a-leithid neo-shàstachd gnè, mì-ghnèitheachadh, droch-dhìol agus stiogma.

Faodar an Trans Library lorg am broinn na h-aplacaide, Voda, a ghabhas a stàladh bho seo.

Cuairt-litir #77

2024-09-13T13:30:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Malta

Chaidh lagh ùr a chur an gnìomh ann am Malta an t-seachdain-sa a tha a’ leigeil le Maltaich nas sìne na 16 bliadhna a dh’aois clàradh mar neo-bhìnearaidh air sgrìobhainnean oifigeil leithid teisteanasan-breithe agus pàipearan-aithne - thèid an gnè aca riochdachadh air na sgrìobhainnean leis an litir X.

Teagsas

Tha cùirt ann an Teagsas air binn sia bliadhna sa phrìosain a chur air Francisco Ricardo Sotello Baez, 23 bliadhna a dh’aois, as dèidh dha a mhac a dhòrnadh mu aodann iomadh turas.

Chuala a’ chùirt gun robh dragh air Baez gun robh a mhac, a tha dìreach 2 bhliadhna a dh’aois, gèidh o chionn ‘s gum biodh e a’ cluich le doilichean Barbie an àite robotairean, càraichean, agus bàlaichean-coise.

Chuala iad cuideachd gun robh e air ionnsaigh a thoirt air màthair a’ bhalaich roimhe, agus gun robh e air cùrsaichean fhrithealadh gus smachd fhaighinn air a fhearg.

Thuirt am britheamh, Stephanie Boyd, gun robh binn 6 bliadhna sa phrìosain iomchaidh air sgàth miosad na h-eucorach agus chur i casg air bho bhith ann an taic ris a’ bhalach, an ceathrar cloinne eile aige, no mion-aoisich sam bith eile.

Arizona

Tha cùirt ann Arizona air riaghladh ann am fàbhar dithis thar-chaileagan, 12 agus 16 bliadhna a dh’aois, a thug na sgoiltean aca gu lagh an dèidh gun deach innse dhaibh gum feumadh iad cluich air sgiobaidhean bhalach nam biodh iad airson pàirt a ghabhail ann an spòrs-sgoile.

Thuirt am Britheamh Morgan Christen nach eil buannachd a bharrachd aig tar-chaileagan nach eil air dol fo inbheachd fireannach air caileagan eile.

Pagastàn

Tha gnìomhachas ann an Lahore, Pagastàn air seirbheis tagsaidh do bhoireannaich is tar-bhoireannaich a-mhàin a chur air bhog.

Thuirt Ammaz Farooqi, Àrd-oifigear SheDrives, gur e prìomh amas a’ chompanaidh tar-bhoireannaich a dhìon bho leth-bhreith agus sàrachadh.

Cuairt-litir #76

2024-09-06T13:30:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Co-labhairt an SNP

Tha buill an SNP air bhòtadh ann am fàbhar ghluasaid a dhèanamh e nas fhasa cothrom fhaighinn air cùram slàinte daingneachadh gnè.

Chaidh an gluasad a mholadh le làmh LGDTCEN+ a’ phàrtaidh, Out for Independence.

Dh’aithnich co-labhairt a’ phàrtaidh nach e tinneas-inntinn a th’ ann an neo-shàstachd gnè, agus gu bheil ùineachan feitheimh fada, gu bheil an riatanas air breithneachadh meadaigeach a’ cur mòr-dhragh air luchd tar-ghnèitheach, agus gum bu chòir don riatanas seo a bhith air a chur às.

Dh’aontaich iad cuideachd gum bu chòir do dhotairean agus luchd-obrach slàinte eile barrachd thrèanadh fhaighinn gus am bi iad nas comasaiche air taic a thoirt do na euslaintich tar-ghnèitheach aca.

Cùram-slàinte Daingneachadh Gnè an Alba

Dh’ainmich Riaghaltas na h-Alba Dimàirt gum biodh iad a’ gabhail ris na molaidhean a rinn an Dtr Hilary Cass anns an aithisg aice air cùram slàinte daingneachadh gnè ann an Sasainn.

Am measg nan rudan eile a mhol i, thuirt Dtr Cass nach chòir do dh’euslaintich òga cùram slàinte daingneachadh gnè fhaighinn anns an aon àite sa bhios inbhich agus mar thoradh air a shin, tha am Ministear airson Slàinte Poblach agus nam Boireannaich, Jenni Minto, a-nis air ainmeachadh nach biodh clionaig an Sandyford a’ toirt seachad cùram slàinte daingneachadh gnè do dh’euslaintich nas òige na 18 bliadhna a dh’aois tuilleadh agus gum biodh lìonra de sheirbheisean roinneil nas iomchaidhe.

Tha Oilthigh Ghlaschu a’ rannsachadh nam buaidhean a bhios cùram slàinte daingneachadh gnè a’ toirt air daoine òga agus thuirt Minto gu bheil dùil ann ri tòraidhean an rannsachaidh ro dheireadh na bliadhna.

Teiripe Iompachaidh

Thuirt Pàrtaidh Uaine na h-Alba Diciadain gu bheil dragh orra nach bi Riaghaltas na h-Alba a’ dol air adhart le planaichean a chur casg air cleachdaidhean ris an canar “teiripe iompachaidh”.

Tha e air tighinn as dèidh do Phrìomh-Mhinistear na h-Alba, John Swinney, ràdh gum biodh an riaghaltas aige a-nis a’ cur an taic do reachdas a bhios iomchaidh air feadh na Rìoghachd Aonaichte seach ann an Alba a-mhàin.

Thuirt an Rìgh Teàrlach san Iuchar gun chuireadh an riaghaltas ùr Làbarach ann an Westminster casg air “teiripe iompachaidh”, ach b’ e seo an treasamh turas o chionn 2018 gu bheil Òraid a’ Mhonairc air a’ chasg a ghealltainn.

Cuairt-litir #75

2024-08-30T13:30:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Murdo Fraser

Tha Murdo Fraser, a tha a’ seasamh airson ceannard nan Tòraidhean ann an Alba, air ràdh nach eil e a’ toirt taic do phòsadh aon-sheòrsach.

Bha Fraser a’ bruidhinn ri phàipear-naidheachd an Daily Mail aig cur air bhog na h-iomairte aige nuair a thuirt e gur e Crìosdaidh a th’ ann, gu bheil beachd àraidh aige air dè bu chòir dha bhith ann am pòsadh, gun do bhòt e an aghaidh pòsadh aon-sheòrsach a dhèanamh laghail, agus nach eil am beachd sin air atharrachadh.

Ann an 2020, dh’iarr Fraser air Riaghaltas na h-Alba bacaidhean a chur air dotairean bho bhith a’ toirt seachad casgan inbhidheachd do dh’euslaintich òga agus ann an 2022, bhòt e an aghaidh ath-leasachaidhean aithneachadh gnè.

Trans Kids Deserve Better

Tha buidheann de dheugairean tar-ghnèitheach a’ togail fianais taobh a-muigh oifisean Roinn an Fhoghlaim ’s iad ag iarraidh foghlam sàbhailte is ion-ghabhalach agus còraichean thar-ghnèitheach.

Tha e air tighinn as dèidh do Rùnaire na Slàinte, Wes Streeting, an casg a th’ air doctairean bho bhith a’ toirt seachad casgan inbhidheachd do dh’euslaintich òga a leudachadh.

Chleachd Rùnaire na Slàinte a bh’ ann roimhe, Victoria Atkins, cumhachdan èigeannach gus an casg a chur an gnìomh air thoiseach air an Taghadh Coitcheann agus bha e gus ruith gu ruige an 3mh den t-Sultain.

San Iuchar, dhìrich dhithis bhuill a’ bhuidhinn leac taobh a-muigh prìomh-oifisean NHS Shasainn ’s iad a’ togail fianais an aghaidh a’ chaisg.

Togail-fianais ann am Beul Feirste

Chruinnich mu 100 neach ann am Beul Feirste oidhche Mhàirt airson fianais a thogail an aghaidh a’ chaisg a tha Riaghaltas Èirinn a Tuath a chur air dotairean bho bhith a’ toirt seachad casgan inbhidheachd do dh’euslaintich ùra nas òige na 18 bliadhna a dh’aois.

Chaidh an casg a chur an gnìomh ann an Èirinn a Tuath Dimàirt as dèidh gun do chleachd am Prìomh-mhinistear agus an Leas-Phrìomh-mhinistear na cumhachdan-gnìomha aca gus a shoidhnigeadh ‘na lagh gun a bhith a’ dol tron phàrlamaid.

Bha luchd-togail fianais air an cluinntinn ag èigheachd “when trans rights are under attack, stand up, fight back”.

Tha an Riaghaltas air seasamh airson a’ chasg. Thuirt an DUP, aig a bheil oifis an Leas-Prìomh-Mhinisteir, gur e co-dhùnadh ciallach a bh’ ann is gun deach a stèidheachadh air comhairle fhiosrachail bho luchd-meadaigeach.

Thuirt am Prìomh-Mhinistear, Michelle O’Neill, gu bheil a pàrtaidh, Sinn Féin, ag iarraidh gum faigheadh clann agus daoine òga tar-ghnèitheach an cùram slàinte as fheàrr.

Burraidheachd san àite-obrach

Tha suirbhidh a chaidh a dhèanamh le Number Cruncher Politics às leth an TUC a’ sealltainn gu bheil 52% de luchd-obrach LGDTCEN+ agus 79% de luchd-obrach tar-ghnèitheach anns an Rìoghachd Aonaichte air burraidheachd no sàrachadh fhulang san àite-obrach.

Sheall i cuideachd gu bheil 19% de luchd-obrach LGDTCEN+ air droch-bheul fhulang sa chòig bliadhna mu dheireadh; còrr is an ceathramh cuid air faclan a bha ri oillt cho-sheòrsach, oillt dhà-sheòrsach, no oillt thar-ghnèitheach a chluinntinn; agus 5% air fòirneart, bagairtean agus eaglachadh fhulang mar thoradh air an taobhadh-feise aca.

Thuirt an TUC ‘s beag an t-iongnadh gu bheil cha mhòr 30% de luchd-obrach LGDTCEN+ fhathast sa chlòsaid.

Ionnsaigh dhrabasta ann am Manchester

Tha na Poilis ann am Manchester air dealbhan CCTV a sgaoileadh as dèidh mar a tha ionnsaigh dhrabasta a thoirt air fireannach.

Thathar ag aithris gun do choinnich an neach-fhulaing, 21, ri fireannach eile mu 1.30m air an 14mh latha den Iuchar.

Chaidh e ann an laigse, agus dhùisg e ann an seòmar an taigh-òsta aige an ath mhadainn.

Thuirt na Poilis gu bheil dealbhan CCTV a’ sealltainn gun deach a choimheadachadh dhan t-seòmar le fireannach neo-aithnichte air an robh briogais dorcha, cochallag phinc, agus seacaid North Face dhubh is ghlas.

Dh’iarr na Poilis air neach sam bith aig a bheil fiosrachadh fios a chur thuca air 0161 856 4259 is an àireamh 855 den 14mh latha den Iuchar 2024 a thoirt seachad.

Tar-bhoireannach Taidh-Bhànach air aithneachadh laghail a bhuannachadh

Tha cùirt ann an Taidh-Bhàn air riaghladh gum faod tar-bhoireannach na sgrìobhainnean aithne aice ùrachadh gun a bhith a’ dol fo obair-lannsa daingneachadh gnè.

Thathar ag aithris gur ise an còigeamh Taidh-Bhànach tar-ghnèitheach gus cùis-lagha mar seo a bhuannachadh am-bliadhna.

Cùirt Innseannach air riaghladh an-aghaidh co-ionnannachd pòsaidh

Tha Àrd-chùirt nan Innseachan air diùltadh pòsadh aon-sheòrsach a dhèanamh laghail.

Thuirt iad anns an riaghladh aca gu bheil e an urra ris a’ phàrlamaid no reachdadaireachdan stàite laghan co-cheangailte ri phòsadh a chur an-gnìomh, ach thuirt iad gu bheil còir co-ionnann agus saorsa aig daoine cuèir dol an sas ann an aonadh le chèile.

Cuairt-litir #74

2024-08-24T08:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Casgan inbhidheachd

Chaidh an casg air casgan inbhidheachd a leudachadh gu Èireann a Tuath.

Thathar ag aithris gun do cleachd am Prìomh-mhinistear agus an Leas-Phrìomh-mhinistear na cumhachdan-gnìomha aca gus an casg a shoidhnigeadh ‘na lagh gun a bhith a’ dol tron phàrlamaid.

Thèid an casg a chur an gnìomh an Èireann a Tuath Dimàirt 27mh An Lùnastal.

Leabhraichean LGDTC+ gan casg ann an sgoiltean na Rìoghachd Aonaichte

Tha rannsachadh a rinn a’ bhuidheann neo-phrothaide, Index on Censorship, a’ sealltainn gu bheil còrr ‘s 50% de leabhar-lannan sgoile anns an Rìoghachd Aonaichte air iarrtasan fhaighinn ag iarraidh orra leabhraichean LGDTC+ a thoirt às na sgeilpeachan aca.

Thàinig an dàrna leth de dh’iarrtasan bho phàrantan agus thuirt 56% de leabhar-lannaichean gun do ghèill iad riutha.

Am-measg nan leabhraichean a chaidh an toirt às, bha This Book is Gay le Juno Dawson; Julián is a Mermaid le Jessica Love; ABC Pride le Louie Stowell; agus mòran a bharrachd.

Dithis dheugaire air cùis-lagha a thoirt an-aghaidh casg leth-bhreitheach

Tha dithis dheugaire thar-ghnèitheach air cùis-lagha a thoirt an-aghaidh Stàit New Hampshire an dèidh dhaibh air a bhith air an casg bho bhith a’ cluiche ball-coise.

Fon lagh ris an canar “Fairness in Women’s Sports”, a chaidh a chur an gnìomh Didòmhnaich, chan fhaod tar-chaileagan is tar-bhoireannaich gabhail ann an sgiobaidhean sgoile no oilthighe.

Tha na caileagan a’ tagairt gu bheil an casg neo-bhun-reachdail agus gu bheil e a’ briseadh laghan fheadarail an-aghaidh leth-bhreith.

Teagsanaich thar-ghnèitheach gan casg bho bhith ag ùrachadh na ceadan-draibhidh aca

Tha Stàit na Teagsas air casg a chur air Teagsanaich thar-ghnèitheach bho bhith ag ùrachadh an gnè a nochdas air a’ chead-draibhidh aca.

Cùirt Shìneach air riaghladh gum faod màthair leasbach a nighean fhaicinn

Tha cùirt anns an t-Sìona air riaghladh gu bheil còir aig màthair leasbach air a nighean fhaicinn an dèidh dhaibh air a bhith air an cumail air leth fad ceithir bliadhna.

Phòs Didi agus a bean ann an 2016 agus dh’fhàs an dithis aca trom na bu anmoiche air a’ bhliadhna an dèidh dhaibh dol fo leigheas IVF. Chleachd iad uighean a mnà agus sìol-ghinidh bho thabhartaiche agus ann an 2017 rug Didi nighean agus rug a bean mac.

Dhealaich iad ann an 2019, agus o chionn ‘s nach eil dàimh ghinteil eadar Didi agus an dithis chloinne thug a bean leatha iad.

Tha cùirt a-nis air riaghladh gu bheil còir aig Didi air a nighinn fhaicinn o chionn ‘s gun tug i bhreith oirre. Thuirt iad ge-tà nach eil an aon chòir aice air a mac o chionn ‘s gun tug a bean breith airsan.

Innseanaich a’ sireadh riaghailtean fala nas fhosgailte

Tha an sgrìobhadair agus neach-iomairt, Sharif Rangnekar, air tagradh a chur a-steach gu Àrd-chùirt nan Innseachan mun chasg a th’ air fireannaich ghèidh, dhà-sheòrsach is thar-ghnèitheach bho bhith a’ toirt seachad fala.

Tha lagh na dùthcha a’ cur casg orra bho bhith a’ toirt seachad fala air sgàth ‘s air a’ chunnart nas motha gu bheil HIV/AIDS orra.

Tha an Àrd-chùirt air iarraidh air an riaghaltas freagairt a chur ri Mhgr Rangnekar.

Cuairt-litir #73

2024-08-17T08:28:00+00:00

Geàrr-chunntas sgrìobhte de naidheachdan LGDTCEN+ ionadail, nàiseanta ‘s bho air feadh an t-saoghail.

Manuel Guerrero Aviña air tilleadh dhachaigh

Tha fear gèidh a chaidh a chur an grèim ann an Catar an dèidh dha air a bhith a ribeadh leis na Poilis air a bhith air a leigeil mu sgaoil is e air tilleadh dhachaigh dhan Rìoghachd Aonaichte.

Chaidh Manuel Guerrero Aviña gu ionad ann an Doha anns a’ Ghearran is e an dùil coinneachadh ri fireannaich ghèidh eile ris an robh e a’ bruidhinn air an aplacaid suirghe, Grindr.

Ach b’ e na Poilis a bha a’ conaltradh ris a-cheana, agus chaidh a chur an grèim fo chasaid gun robh drugaichean aige.

Thuirt Aviña, air a bheil HIV, gun deach a’ chungaidh-leighis aige a thoirt dheth fhad ‘s a bha e an grèim, agus gun deach a sparradh air sgrìobhainnean Arabais nach robh e a’ tuigsinn a shoidhnigeadh.

Thuirt e cuideachd gun deach a sparradh air aithne a thoirt air na fireannaich ghèidh eile a bha anns an fhòn aige.

Leabhraichean LGDTC+ gan casg ann an sgoiltean Iowa

Tha Cùirt Ath-Thagraidh nan Stàitean Aonaichte airson an Ochdamh Sgìre air riaghladh gum faod Iowa reachdas a chuireas casg air leabhraichean LGDTC+ ann an seòmraichean-teagaisg a chur an-gnìomh.

Fon bhile, SF 496, bidh aig tidsearan cead phàrant fhaighinn gus leabhar anns a bheil susbaint LGDCT+ a thoirt do phàiste.

Leabhar-lann sgoile air dùnadh

Tha leabhar-lann Àrd-sgoil Green Hill ann an Tennessee air dùnadh rè ùine gus na leabhraichean aca a sgrùdadh a dhèanamh cinnteach gu bheil iad uile iomchaidh do chlann.

Tha e air tighinn an dèidh gun deach lagh ùr a chur an gnìomh san Iuchar ag iarraidh air sgoiltean a dhèanamh cinnteach nach eil leabhraichean mì-iomchaidh anns na leabhar-lannan aca.

Tha an lagh ag ràdh gu bheil leabhraichean anns a bheil “nudity, or descriptions or depictions of sexual excitement, sexual conduct, excess violence, or sadomasochistic abuse” mì-iomchaidh do sgoilearan K-12 (5-18 bliadhna a dh’aois).

Tar-bhoireannach air a murt ann an Teagsas

Tha Iomairt nan Còraichean Daonna (HRC) ag aithris gun deach tar-bhoireannaich a murt ann an Denton, Teagsas Dimàirt 23 An t-Iuchar.

Thathar ag aithris gun deach Dylan Gurley, 20, fhaighinn gun mhothachadh is gun robh i air a sàthadh iomadh turas.

Chaidh a thoirt a dh’ospadal far an do bhàsaich i.

A-rèir an HRC, tha a-nis co-dhiù 23 neach tar-ghnèitheach air a bhith air am marbhadh anns na Stàitean Aonaichte bho thoiseach 2024.

Tar-bhoireannach air a murt ann an Nigeria

Chaidh corp neach-brìgh tar-ghnèitheach a lorg ri taobh mòr-rathad ann an Abuja, Nigeria Diardaoin.

B’ e TikToker mòr-chòrdte a bh’ ann an “Abuja Area Mama”, mar as fheàrr a dh’aithnichear i, a bhruidhinneadh mu a beatha mar thar-bhoireannach agus obraiche-feise.

Thathar ag aithris gun robh i air a phronnadh agus gu bheil an amharas ann gur e murt a bh’ ann.

Chaidh a mhì-ghnèitheachadh leis na Poilis a thuirt gun robh rannsachadh a’ leantainn an dèidh dhaibh “corp fireannaich air an robh aodach boireannach a lorg gun dòigh-aithneachaidh sam bith air“.

Casg air cluicheadair ball-stèidhe

Chaidh casg dà gheama a chur air a’ chluicheadair ball-stèidhe Jarren Duran an dèidh dha ana-cainnt homafòbach a thilgeil air neach-taice rè gheama eadar Boston Red Sox agus Houston Astros 11 An Lùnastal.

Dh’ainmich sgioba an Red Sox cuideachd gun tèid an tuarastal a bhiodh e air fhaighinn airson an dà gheama (mu $8,172) a thoirt don charthannas LGDTC+, PFLAG (Parents, Families, and Friends of Lesbians and Gays).