Tha Seanadh Èireann a Tuath air bhòtadh an-diugh airson casg a chur air teiripe iompachaidh co-sheòrsachd.
Bhòt 59 airson a ghluasad agus 24 na aghaidh.
Tha an toradh a-nis a’ ciallachadh gu bheil mandat soilleir aig Ministear nan Coimhearsnachdan an casg a sgrìobhadh ann an reachdas ro deireadh na teirm làithreach.
Tha tagraiche neo-eisimeileach à Shealtainn fo chàineadh as dèidh dha ràdh gum faodadh an galar sgaoilte COVID-19 a bhith na thoradh pòsadh aon-sheòrsach a dhèanamh laghail.
Bidh Peter Tait a’ seasamh airson sgìre Shealtainn ann an taghadh Pàrlamaid na h-Alba an ath mhìos.
Thuirt Mgr Tait ri Shetland News gu bheil pòsadh aon-sheòrsach, a tha air a bhith laghail ann an Alba o chionn 2014, na chuspair a tha “a’ cur Dia an-aghaidh ar dùthaich” agus gu bheil e a’ dol “an-aghaidh lagh Dhe ma a tha e sgrìobhte anns a’ Bhìoball”.
Sheas Mgr Tait ann am fo-thaghadh 2019 nuair nach dh’fhuair e ach 31 bhòt.
Thuirt Kerrie Meyer, stèidheadair ShetlandLGBTQ.org.uk, gur e amaideas a th’ ann agus gum bu chòir dhan tagraiche dol air ais dhan toll primeval aige.
Thuirt i cuideachd gum faodadh am beachd amaideach aige gràin air daoine gèidh agus e a’ dol an-aghaidh Achd na Co-ionannachd 2010.
San eadar-ama, chaidh na tagraichean eile a bhios a’ seasamh airson sgìre Shealtainn ann an taghadh na h-ath mhìos a dhearbhadh, is iad: Martin Kerr, Am Pàrtaidh Làbarach; Brian Nugent, Restore Scotland; Nick Tulloch, Am Pàrtaidh Tòraidheach; Tom Willis, Pàrtaidh Nàiseanta na h-Alba; agus Beatrice Wishart, Libearalaich Deamocratach.
